قىتاي ءبىلىم ءمينيسترى ش ى ۇ ەلدەرىندە ءبىلىم سالاسىن دامىتۋ بويىنشا ءۇش ۇسىنىس ايتتى
استانا. KAZINFORM - قىتاي ش ى ۇ- عا مۇشە ەلدەرمەن زاماناۋي تەحنولوگياعا نەگىزدەلگەن ەكوجۇيەنى قۇرۋ ءۇشىن جاساندى ينتەللەكت پەن سيفرلىق ءبىلىم بەرۋدى بىرلەسىپ دامىتۋعا دايىن.
بۇل تۋرالى بۇگىن استانادا وتكەن «جوعارى ءبىلىم بەرۋ جانە ءوندىرىستى ينتەگراتسيالاۋ سالاسىنداعى ىنتىماقتاستىق» اتتى حالىقارالىق سيمپوزيۋمدا ق ح ر ءبىلىم ءمينيسترى حۋاي جينپەن ءمالىم ەتتى.
«قىتاي-قازاقستان دوستىعىنىڭ ۇزاق تاريحى بار. ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 2 مىڭ جىلدان استى، اسىرەسە سوڭعى ۋاقىتتا ۇلكەن جەتىستىكتەرگە جەتتىك. كەشە قازاقستاننىڭ عىلىم جانە جوعارى ءبىلىم ءمينيسترى ساياسات نۇربەك ەكەۋمىز ەكى ەلدىڭ مەملەكەت باسشىلارىنىڭ قاتىسۋىمەن ءبىلىم سالاسىنداعى كەلىسىمدەرگە قول قويدىق. وسىلايشا جاڭا تاريحي كەزەڭ، ياعني «قىتاي-قازاقستان» قارىم-قاتىناسىنىڭ 30-جىلدىعىنا بىرلەسكەن ماڭىزدى قادام جاسادىق. كەشە ق ح ر ءتوراعاسى شي جينپيڭ ءوز سوزىندە قازاقستانعا قىزمەت بابىمەن 5 رەت كەلگەنىن، سوڭعى ساپارى نەبارى 10 اي بۇرىن عانا بولعانىن اتاپ ءوتتى. ەكى ەل كوشباسشىسى قابىلداعان شەشىمدەر ءبىزدى جاڭا جولعا باعىتتايتىنىنا سەنىمدىمىن»، - دەپ باستادى العى ءسوزىن حۋاي جينپەن سيمپوزيۋمدا.
سونداي-اق، مەيمان ق ح ر ءبىلىم مينيسترلىگىنىڭ سيفرلىق ءبىلىم بەرۋدىڭ دۇنيەجۇزىلىك كونگرەسى، كاسىپتىك-تەحنيكالىق ءبىلىم بەرۋدى دامىتۋ ماسەلەسى جونىندەگى دۇنيەجۇزىلىك كونفەرەنسيا، يننوۆاتسيا مەن كرەاتيۆ بويىنشا ستۋدەنتتەرگە ارنالعان حالىقارالىق يننوۆاتسيالىق كونكۋرس سياقتى ماڭىزدى ۇردىستەردە باستاماشى ۆەدومستۆو ەكەنىن مالىمدەدى.
«قازىر ءبىز شاڭحايدا جاھاندىق اۋقىمدا ءبىلىم بەرۋ جۇيەسىنىڭ ساپالى دامۋىنا ۇلەس قوسۋ ءۇشىن UNESCO جانىنداعى STEM ءبىلىم بەرۋدى زەرتتەۋ ۋنيۆەرسيتەتىنىڭ اشىلۋىنا دايىندالىپ جاتىرمىز»، - دەيدى ول.
ودان بولەك، مينيستر قىتاي تاراپىنىڭ ش ى ۇ- عا مۇشە ەلدەرمەن ودان ءارى جۇمىس ىستەۋگە دايىن ەكەنىن جەتكىزىپ، ءبىلىم سالاسىن دامىتۋ بويىنشا 3 ۇسىنىس ايتتى.
«ءبىرىنشى مىندەت - ءبىلىم بەرۋ ىنتىماقتاستىعىنىڭ جاڭا جولدارىن ىزدەۋ. قىتاي تاراپى الداعى ءۇش جىلدا حالىقارالىق قىتاي ءتىلى مۇعالىمدەرىنە 1 مىڭ گرانت، سونداي-اق قىتاي ءتىلى بايقاۋىنىڭ جازعى لاگەرلەرىنە 3 مىڭ كۆوتا بەرۋگە دايىن. ەكىنشى مىندەت – ش ى ۇ- نىڭ ماستەر-كلاسس باعدارلاماسى ەسەبىنەن ش ى ۇ گرانتتارىنىڭ اۋقىمىن كەڭەيتۋ جانە قالىپتاستىرۋ. سونداي-اق، بيزنەسپەن جانە وندىرىسپەن بىرلەسىپ ش ى ۇ- عا مۇشە ەلدەر ءۇشىن يننوۆاتسيالىق ماماندار دايارلاۋعا قوسارلانعان عىلىمي جەتەكشىلەر جۇيەسىن دامىتۋعا دايىنبىز. ءۇشىنشى مىندەت – ش ى ۇ سيفرلىق ءبىلىم ارحيتەكتۋراسىن بىرلەسىپ اشۋدى ۇسىنامىن»، - دەدى ق ح ر ءبىلىم ءمينيسترى حۋاي جينپەن.
بۇعان دەيىن حابارلاعانىمىزداي، ەلىمىزدەگى ۇلتتىق ۋنيۆەرسيتەتتەردە قىتاي ءتىلىن وقىتاتىن كافەدرالار قۇرىلادى.
ال استاناداعى ەۋرازيا ۇلتتىق ۋنيۆەرسيتەتىندە لۋ بان شەبەرحاناسى اشىلادى.
بۇگىن ەلورداداعى Astana IT ۋنيۆەرسيتەتىندە «جوعارى ءبىلىم بەرۋ جانە ءوندىرىستى ينتەگراتسيالاۋ سالاسىنداعى ىنتىماقتاستىق» دەگەن اتاۋمەن حالىقارالىق سيمپوزيۋم ءوتتى.
وعان ق ح ر ءبىلىم ءمينيسترى حۋاي جينپەن، ق ر عىلىم جانە جوعارى ءبىلىم ءمينيسترى ساياسات نۇربەك، جىبەك جولى ۋنيۆەرسيتەتتەرى اليانسىنىڭ حاتشىلىعى، ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى - رەكتورى جانسەيىت تۇيمەبايەۆ، شيان جياوتۋن ۋنيۆەرسيتەتىنىڭ رەكتورى چجان ليتسيۋن، استانا IT ۋنيۆەرسيتەتىنىڭ رەكتورىنىڭ مىندەتىن اتقارۋشى سەرىك ومىربايەۆ جانە 20 جوعارى وقۋ ورنىنىڭ رەكتورى قاتىستى.
