قىتاي بيلىگى قايتىس بولعانداردى پاتەردە جەرلەۋگە تىيىم سالىندى

استانا. قازاقپارات - قىتاي بيلىگى 31-ناۋرىزدان باستاپ ازاماتتارعا قايتىس بولعان تۋىستارىنىڭ كۇلىن پاتەرلەردە ساقتاۋعا، جەرلەۋگە رەسمي تۇردە تىيىم سالدى. بۇل شەشىم ەلدە سوڭعى جىلدارى كەڭ تاراعان ەرەكشە تاجىريبەگە پاتەردى «وتباسىلىق زيرات» رەتىندە پايدالانۋعا بايلانىستى قابىلداندى، دەپ حابارلايدى  Financial Times.

«جەرلەۋ پاتەرلەرى» - بۇل بوس تۇرعان پاتەرلەردى وتباسى باقيلىق بولعان جاقىندارىن ەسكە الۋ ورنىنا اينالدىرۋ تاجىريبەسى. وندا سۇيەكتەردى ورنالاستىرىپ، پاتەردى اۋلەتتىك كيەلى ورىنعا اينالدىرادى.

بۇل تاجىريبە ۋربانيزاتسيانىڭ جىلدام دامۋى جانە حالىقتىڭ قارتايۋى سالدارىنان كەڭ تارالعان، ويتكەنى زيراتقا ارنالعان جەر ءۇشىن باسەكە كۇشەيگەن.

2020 -جىلى SunLife ساقتاندىرۋ كومپانياسىنىڭ جۇرگىزگەن جاھاندىق زەرتتەۋىنە سايكەس، قىتاي جەرلەۋ راسىمىنە كەتەتىن شىعىن بويىنشا جاپونيادان كەيىن ەكىنشى ورىندا تۇر.

سونىمەن قاتار، 2021- 2025 -جىلدار ارالىعىندا جىلجىمايتىن مۇلىك باعاسى شامامەن %40- عا تومەندەگەن، بۇل شي جينپيڭنىڭ «جىلجىمايتىن مۇلىك سپەكۋلياتسيا ءۇشىن ەمەس، تۇرۋ ءۇشىن ارنالعان» اتتى ناۋقانىنىڭ ناتيجەسى بولسا كەرەك.

قىتايدا بەيىتكە ارنالعان جەرلەر تەك 20 جىلعا جالعا بەرىلەدى، ال تۇرعىن ۇيلەرگە مەملەكەت كەپىلدىك بەرىپ 70 جىلعا پايدالانۋ قۇقىعىن بەرەدى. سول سەبەپتەن، كوپتەگەن قىتايلىقتار پاتەردى سۇيەك ساقتاۋ ءۇشىن زيراتقا قاراعاندا تيىمدىرەك دەپ ەسەپتەيدى.

جەرلەۋ - تۇرعىن ۇيدەن دە قىمبات

BBC جازعانداي، پەكيندە زيراتتىڭ باعاسى 10000 يۋاندان (شامامەن 690000 تەڭگە) 200000 يۋانعا دەيىن (شامامەن 13,8 ميلليون تەڭگە) وزگەرەدى.

جەرلەۋ ءراسىمى دە قىمباتقا تۇسەدى. SunLife زەرتتەۋىنە سايكەس، 2020 -جىلى جەرلەۋ ءراسىمى ورتاشا جالاقىنىڭ جارتىسىن قۇراعان. قىتاي بۇل كورسەتكىش بويىنشا الەمدە جاپونيادان كەيىن ەكىنشى ورىندا.

مۇنداي تىيىم تسينمين مەرەكەسىنەن بىرنەشە كۇن بۇرىن ەنگىزىلدى. بۇل مەرەكە تۋىستاردىڭ قابىرلەرىن رەتكە كەلتىرىپ، ريتۋالدىق سىيلىقتار جاساۋ كۇنى رەتىندە اتالادى.

Weibo (قىتايداعى X انالوگى) جەلىسىندە تىيىمعا بايلانىستى حەشتەگ 7 ميلليوننان استام رەت قارالدى، پايدالانۋشىلار بۇل شاراعا كۇمانمەن قارايتىنىن ولار قالدىرعان پىكىردەن اڭعارۋعا بولادى.

ءبىر قولدانۋشى: «كىم تەكسەرەدى؟ الدە ءار ۋرناعا GPS قويا ما؟» دەپ جازسا، ەكىنشى قولدانۋشى «%90 جەڭىلدىك بەرىلگەن كۇننىڭ وزىندە زيرات تىم قىمبات» دەپ جازبا قالدىرعان.

قارتايۋ ماسەلەسى مەن بالاما شەشىمدەر

قىتايدا حالىقتىڭ قارتايۋى جىلدام دامىپ كەلە جاتقان ەلدەردىڭ ءبىرى. 2025 -جىلى 11,3 ميلليون ادام قايتىس بولسا، 2015 -جىلى بۇل كورسەتكىش 9,8 ميلليونعا جەتكەن، ال سول جىلى 7,9 ميلليون ادام دۇنيەگە كەلگەن.

ولگەندەردىڭ سانى ارتىپ، جەر شەكتەۋلى بولعاندىقتان، شانڭحاي سياقتى ءىرى قالالار بيلىگى «ەكولوگيالىق جەرلەۋ ادىستەرىنە» شىعىنداردى سۋبسيديالايدى. بۇعان تەرەڭ جەرلەۋ نەمەسە كرەماتسيادان كەيىن قالدىقتاردى تەڭىزگە تاستاۋ سياقتى ادىستەر كىرەدى.

2025 -جىلى شاڭحايدا تەڭىزگە جەرلەۋ رەكوردتىق دەڭگەيگە جەتىپ، العاش رەت 10000 جاعدايدان استى.

بۇعان دەيىن قىتاي 5 جىل ىشىندە ءومىر ءسۇرۋ ۇزاقتىعىن 80 جاسقا دەيىن ارتتىرۋدى ماقسات ەتىپ وتىرعانىن جازدىق.