قىتاي - بيداي ەكسپورتتايتىن نەگىزگى ەلدەردىڭ ءبىرى
استانا. KAZINFORM - ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن وتكەن ەگىن جيناۋ ناۋقانى بويىنشا جەدەل شتابتا ەكسپورتقا استىق جەتكىزۋدى ۇلعايتۋ مۇمكىندىكتەرى قارالدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
«ق ت ج» ۇ ك ا ق باسقارۋشى ديرەكتورى باۋىرجان ورىنباساروۆ بيىلعى 9 ايدا قازاقستاندىق استىق پەن ۇندى تەمىرجولمەن جەتكىزۋدىڭ نەگىزگى نارىقتارىن تانىستىردى. استىقتى تيەپ جونەلتۋدىڭ جالپى كولەمى 6,6 ميلليون توننانى قۇراسا (وتكەن جىلدىڭ وسى كەزەڭىمەن سالىستىرعاندا 21 پايىزعا از)، تارتىلعان ونىمدەردى تاسىمالداۋ كولەمى پروپورتسيونالدى تۇردە وسكەن - 2,7 ميلليون توننا (2023 -جىلدىڭ 9 ايىمەن سالىستىرعاندا 21 پايىزعا ارتىق). 6,6 ميلليون توننا استىقتىڭ 5 ميلليون تونناسى ەكسپورتقا جىبەرىلدى، تەك قىركۇيەكتە عانا 900 مىڭ توننا جونەلتىلدى. تارتىلعان ونىمدەردىڭ ەكسپورتى 2,1 ميلليون توننانى قۇرادى، ونىڭ ىشىندە - 310 مىڭ توننا قىركۇيەك ايىنا تيەسىلى.
«قازاقستاننىڭ استىعى جەتكىزىلەتىن نەگىزگى ەلدەر - ورتالىق ازيا (2,9 ميلليون توننا)، قىتاي (1,3 ميلليون توننا)، اۋعانستان (127 مىڭ توننا)، بۇل بيىلعى 9 اي ىشىندەگى كولەم. سالىستىرمالى تۇردەگى تىنىشتىقتان كەيىن يرانعا 211 مىڭ توننا استىق جەتكىزۋ قايتا جانداندى، ونىڭ 140 مىڭ تونناسى قىركۇيەك ايىنا تيەسىلى. باسقا ەلدەرگە - يتالياعا، تۇركياعا جانە رەسەيگە 423 مىڭ توننا جونەلتىلدى. نەگىزگى ەلدەرگە قاڭتار- قىركۇيەك ايلارىندا 495 مىڭ توننا - ورتالىق ازياعا، 639 مىڭ توننا - قىتايعا، 666 مىڭ توننا - اۋعانستانعا جونەلتىلدى»، - دەپ حابارلادى باۋىرجان ورىنباساروۆ.
وتىرىستا قازاقستاندىق استىقتى قىتايعا جەتكىزۋدىڭ وڭىرلىك دەڭگەيى قارالدى. 9-ايدىڭ قورىتىندىسى بويىنشا استىقتى جابىق ۆاگونداردا تاسىمالداۋ كولەمى 75 پايىزعا جانە استىق تاسىعىشتاردا 5 پايىزعا ءوستى. كونتەينەرلەرمەن جەتكىزۋ 26 پايىزعا تومەندەدى. بۇل جابىق ۆاگوندار مەن استىق تاسىعىشتارداعى داقىلداردىڭ نەگىزگى كولەمىنىڭ قورعاس جانە الاشانكوۋ ستانسالارى ارقىلى سۋاردىڭ بوندتىق ايماعىنا جەتكىزىلۋىمەن بايلانىستى، وندا دايىن ءونىمدى قايتا وڭدەۋ جانە ودان ءارى جونەلتۋ ءۇشىن باج سالىعى جوق. وسىلايشا، قازاقستاندىق بيداي نەگىزىنەن قىتايدىڭ شەكارالىق جانە ورتالىق پروۆينتسيالارىن قامتاماسىز ەتەدى. ق ح ر ىشىنە جەتكىزۋ ءۇشىن 65 پايىز باج سالىعى قولدانىلادى جانە ول باعىتتار بويىنشا استىق نەگىزىنەن كونتەينەرلەرمەن تاسىمالدانادى. بۇل رەتتە ارپا جانە باسقا دا جەمشوپ داقىلدارى ءىرى دايىنداۋشى كومپانيالاردىڭ قاجەتتىلىكتەرىنە سايكەس بۇكىل قىتاي بويىنشا ەكسپورتتالادى.
«ءبىزدىڭ الدىمىزدا بيىل قىتايعا 2 ميلليون توننا استىق جەتكىزۋ مىندەتى تۇر، ءبىز ونىڭ كولەمىن 3 ميلليون تونناعا دەيىن ارتتىرا الامىز. سونداي-اق اۋعانستانعا ۇن جەتكىزۋدى ۇلعايتۋ قاجەت. جاڭا كەلىسىمشارتتار مەن لوگيستيكا الماتىدا وتەتىن قازاقستان- اۋعانستان بيزنەس- فورۋمىنىڭ باستى ماسەلەلەرىنىڭ ءبىرى بولۋى ءتيىس»، - دەدى جەدەل شتاب وتىرىسىنىڭ قورىتىندىسىندا سەرىك جۇمانعارين.
7-قازانداعى جاعداي بويىنشا قازاقستاندا ءداندى داقىلداردىڭ بارلىق القابىنىڭ 94 پايىزى، كارتوپتىڭ 90,5 پايىزى، كوكونىستەردىڭ 84,6 پايىزى، مايلى داقىلداردىڭ 30 پايىزى، قانت قىزىلشاسىنىڭ 23 پايىزى جينالدى. ەگىن جيناۋ ناۋقانى باستالعالى ەليەۆاتورلارعا 4,4 ميلليون توننا استىق ءتۇستى.
