قىتاي بۋدديستەرى وكىلى: دىندەر اراسىنداعى تاتۋلىق پەن ىنتىماقتاستىق - بەيبىتشىلىككە باستار جول

استانا. قازاقپارات - 2025 -جىلعى 16-قىركۇيەكتە استانادا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ جيىرما ءۇشىنشى وتىرىسى ءوتتى.

وتىرىسقا سەزد حاتشىلىعىنىڭ باسشىسى، قازاقستان رەسپۋبليكاسى سەناتىنىڭ ءتوراعاسى ماۋلەن اشىمبايەۆ ءتوراعالىق ەتتى.

جيىن بارىسىندا قىتاي بۋدديستەر قاۋىمداستىعى ءتوراعاسىنىڭ ورىنباسارى، قىتايدىڭ ايگىلى ءدىن قايراتكەرى جين بو ءسوز سويلەدى.

جين بو ءوز سوزىندە ەڭ الدىمەن ۇيىمداستىرۋشىلارعا العىس ءبىلدىرىپ، بارلىق ارىپتەسى مەن قوناقتارىنا ىستىق سالەمىن جولدادى. ونىڭ ايتۋىنشا، قازاقستان ەجەلدەن شىعىس پەن باتىستىڭ توعىسقان مەكەنى ءارى ۇلى جىبەك جولىنىڭ ماڭىزدى تورابى بولىپ كەلگەن. بۇگىنگى تاڭدا دا قازاقستان كوپ وركەنيەتتى توعىستىرعان بىرەگەي قۇندىلىقتاردى پاش ەتىپ، «ءبىر بەلدەۋ، ءبىر جول» باستاماسى اياسىندا مادەني بايلانىستىڭ ماڭىزدى الاڭىنا اينالىپ وتىر.

- الەمدىك دىندەردىڭ تۇپكى مۇرات-ماقساتتارى ورتاق - ول ادامزاتتى قورعاۋ جانە بەيبىتشىلىكتى دارىپتەۋ، - دەدى جين بو.

ول ءوز سوزىندە بۋدديزمنىڭ «سەبەپ پەن شارتتىڭ توعىسۋى» قاعيداتىن ەسكە سالىپ، سونىمەن قاتار حريستيان ءدىنىنىڭ «وزگەنى وزىڭدەي ءسۇيۋ»، يسلامداعى مەيىرىم مەن كەشىرىم، داوسيزمدەگى «تابيعاتپەن ۇيلەسىم» قاعيداتتارىن اتاپ ءوتتى. بۇلاردىڭ بارلىعى، ونىڭ ايتۋىنشا، دىندەر اراسىنداعى ءۇنقاتىسۋ مەن ىنتىماقتاستىقتىڭ بەرىك نەگىزىن قالايدى.

سونىمەن بىرگە ول سەزدىڭ جاھاندىق دەڭگەيدە وي-پىكىر الماسۋدىڭ مىنبەرى بولىپ وتىرعانىن اتاپ ءوتتى.

- ءبىز مۇندا تاجىريبە مەن ىقىلاستى ورتاعا سالىپ جينالدىق. بۇل ديالوگ يدەيالاردىڭ توعىسۋىنا عانا ەمەس، دامۋ مەن بەيبىتشىلىككە باعىتتالعان ناقتى قادامدارعا جول اشادى، - دەدى جين بو.

ول بولاشاقتاعى ىنتىماقتاستىقتى ءسوز ەتە كەلە، دىندەر اراسىنداعى ديالوگتى «تاتۋلىق رۋحىندا» تەرەڭدەتۋ قاجەتتىگىن ايتتى.

سونداي-اق ءدىن ليدەرلەرىنىڭ تۇراقتى كەزدەسۋ تەتىگىن قالىپتاستىرۋدى، جاستاردىڭ قۇندىلىقتارىن قالىپتاستىرۋ مەن وتباسى قۇندىلىقتارىن نىعايتۋ ماسەلەلەرىن تالقىلاۋدى ۇسىندى. ونىڭ ايتۋىنشا، ءدىني مادەنيەت پەن ءداستۇرلى قۇندىلىقتار قوعام ومىرىنە ەتەنە ەنىپ، الەۋمەتتىك قايشىلىقتاردى شەشۋگە، جاھاندىق سىن-قاتەرلەردى ەڭسەرۋگە كومەكتەسۋى ءتيىس.

- جاھاندىق جىلىنۋ، اشارشىلىق، قاقتىعىستار سياقتى مەملەكەتتەر مەن سەنىمدەردەن جوعارى تۇرعان ماسەلەلەردە ءدىن وكىلدەرى ىزگى وي مەن يگى ىستەردى ناقتى ارەكەتكە اينالدىرۋى كەرەك. جاستاردى سەنىم مەن رۋحانيات ارقىلى تاربيەلەپ، بەيبىتشىلىك ءىسىن جالعاستىرۋ - بارشامىزدىڭ ورتاق مىندەتىمىز، - دەدى ول.

ءسوزىنىڭ سوڭىندا جين بو سەگىزىنشى سەزدىڭ تابىستى وتۋىنە تىلەكتەستىك ءبىلدىرىپ، قىتاي بۋدديستەرى الەمدىك ءدىن وكىلدەرىمەن قول ۇستاسا وتىرىپ، بەيبىت ءارى باقىتتى بولاشاق قۇرۋ جولىندا كۇش بىرىكتىرۋگە دايىن ەكەنىن اتاپ ءوتتى.

بەلگىلى بولعانداي، 2025 -جىلعى 17- 18-قىركۇيەكتە استانادا الەمدىك جانە ءداستۇرلى دىندەر ليدەرلەرىنىڭ سەگىزىنشى سەزى وتەدى. فورۋمعا الەمنىڭ تۇكپىر-تۇكپىرىنەن ءدىني جانە قوعام قايراتكەرلەرى قاتىسپاق.

بۇدان بۇرىن وڭتۇستىك كورەيا الەمدىك جانە ءداستۇرلى دىندەر ليدەرلەرىنىڭ VIII سەزىنە قاتىساتىنىن جەتكىزگەن ەدى.

اۆتور

مۇقتار مۇرات