قىتاي ازاماتى «ماڭعىستاۋ مۇناي گازدى» باسقاراتىن بولدى: ول تۋرالى نە بەلگىلى؟
استانا. قازاقپارات - «ماڭعىستاۋ مۇناي گاز» ا ق باس ديرەكتورى بولىپ قىتايلىق ۆەن جياجيۋن تاعايىندالدى، - دەپ حابارلايدى Massaget.kz ءتىلشىسى كومپانيانىڭ باسپا ءسوز قىزمەتىنە سىلتەمە جاساپ.
اكسيونەرلەر تۋرالى كەلىسىم ەرەجەلەرىنە سايكەس «ماڭعىستاۋ مۇناي گاز» ا ق-نىڭ جوعارى بۋىن جانە بولىمشەلەر باسشىلارىن ءار ءۇش جىل سايىن روتاتسيالاۋ قاراستىرىلعان.
«وسىعان وراي 2024 -جىلى 2-جەلتوقساندا م م گ ديرەكتورلار كەڭەسىنىڭ شەشىمىمەن كەزەكتىلىك نەگىزىندە «ماڭعىستاۋ مۇناي گاز» ا ق باس ديرەكتورى بولىپ ۆەن جياجيۋن تاعايىندالدى»، - دەلىنگەن حابارلامادا.
جاڭا باسشى تۋرالى نە بەلگىلى؟
ۆەن جياجيۋن 1978 -جىلى 19-قىركۇيەكتە قىتاي حالىق رەسپۋبليكاسىندا دۇنيەگە كەلگەن.
ول ي. م. گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىن («گەولوگيا جانە پايدالى قازبالاردى بارلاۋ» باعىتى بويىنشا تەحنيكا جانە تەحنولوگيا ماگيسترى) بىتىرگەن.
ەڭبەك جولىن 2005 -جىلى CNDOC كومپانياسىنىڭ وندىرىستىك- تەحنيكالىق ءبولىم ينجەنەرى بولىپ باستاعان. 2005-2024 ج ج. «س ن پ س-اي دان مۇناي» ا ق-دا ەڭبەك ەتىپ، جەتەكشى سۋپەرۆايزەردەن كومپانيا پرەزيدەنتىنە دەيىن كوتەرىلدى. 2024 -جىلدىڭ مامىرىنان 2024 -جىلدىڭ جەلتوقسانىنا دەيىن م م گ باس ديرەكتورىنىڭ ءبىرىنشى ورىنباسارى بولدى.
«ماڭعىستاۋ مۇناي گاز» ا ق باس ديرەكتورىنىڭ ءبىرىنشى ورىنباسارى بولىپ بولات سەيتماعانبەتوۆ تاعايىندالدى. ب. سەيتماعانبەتوۆ 1971 -جىلى 12-اقپاندا ماڭعىستاۋ اۋدانىنىڭ تۇشىقۇدىق اۋىلىندا دۇنيەگە كەلدى.
ب. سەيتماعانبەتوۆ قازاق پوليتەحنيكالىق ينستيتۋتىن «مۇناي جانە گاز كەن ورىندارىن يگەرۋ جانە پايدالانۋ» ماماندىعى بويىنشا، الماتى مەنەدجمەنت ۋنيۆەرسيتەتىن (ىسكەرلىك اكىمشىلىك ماگيسترى) بىتىرگەن.
ەڭبەك جولىن 1993 -جىلى «قالامقاس مۇناي گاز» وندىرىستىك باسقارماسىندا مۇناي جانە گاز ءوندىرۋ وپەراتورى بولىپ باستادى. بۇل مەكەمەدە ءار جىلدارى ينجەنەر-تەحنولوگ، جەتەكشى ينجەنەر، سەح باستىعى، وندىرىستىك باسقارما باستىعى بولىپ جۇمىس ىستەدى. 2022 -جىلعى اقپاننان 2024 -جىلعى جەلتوقسانعا دەيىن «ماڭعىستاۋ مۇناي گاز» ا ق «جەتىباي مۇناي گاز» وندىرىستىك باسقارماسىنىڭ باستىعى قىزمەتىن اتقاردى.
بۇعان دەيىن كىم باسشى بولدى؟
ەسكە سالايىق، بۇعان دەيىن «ماڭعىستاۋ مۇناي گازدىڭ» باس ديرەكتورى مۇرات مۇستافايەۆ قىزمەتىنەن كەتكەن ەدى.
ول 2023 -جىلعى اقپاننان بەرى كومپانيانىڭ باس ديرەكتورى قىزمەتىن اتقارعان ەدى.
