قىتاي استاناسىندا سۋ تاسقىنىنان قازا تاپقاندار سانى 44-كە جەتتى

بەيجىڭ. KAZINFORM - قىتاي استاناسى بەيجىڭ قالاسىنىڭ اكىمشىلىگى جاقىندا بولعان سۋ تاسقىنىنان قازا تاپقاندار سانى تۋرالى مالىمەتتى جاريالادى.

Chinanews اقپاراتىنا سۇيەنسەك، 31- شىلدەدە بەيجىڭدە وتكەن سۋ تاسقىنىنا قارسى جانە اپاتتان قۇتقارۋ جونىندەگى باسپا ءسوز ءماسليحاتىندا، قالا اكىمىنىڭ تۇراقتى ورىنباسارى سيا لينماو 31-شىلدە ساعات 12:00-دەگى جاعداي بويىنشا اپات سالدارىنان قازا تاپقاندار سانى 44 ادامعا جەتكەنىن، 9 ادام ءىز-ءتۇزسىز جوعالعانىن حابارلادى.

قازا تاپقانداردىڭ 31- ءى ميۋن اۋدانىنداعى قارتتار ۇيىندە بولعان. جوعالعانداردىڭ ءبىرى قۇتقارۋ قىزمەتكەرى ەكەنى انىقتالدى.

بەيجىڭنىڭ سولتۇستىگىندە ورنالاسقان ميۋن، حۋايجوۋ جانە يانتسين اۋداندارى كەيىنگى بىرنەشە كۇندە نوسەر جاۋىننان زارداپ شەگىپ، اتالعان ايماقتا سۋ تاسقىنى بولدى.

قىتاي باسشىسى شي جينپيڭ 28-شىلدەدە سۋ تاسقىنىنا قارسى جانە اپاتتان قۇتقارۋ جۇمىستارىنا قاتىستى نۇسقاۋ بەرىپ، سۋ تاسقىنى مەن گەولوگيالىق اپاتتاردىڭ «بەيجىڭ، حىبىي، جيلين، شاندۇڭ جانە باسقا دا ايماقتاردا اۋىر ادام شىعىنى مەن مۇلىكتىك شىعىندارعا» اكەپ سوقتىرعانىن مويىندادى جانە حالىقتىڭ ءومىرى مەن مۇلكىن قورعاۋ ءۇشىن بارلىق كۇش-جىگەردى جۇمساۋعا شاقىردى.

قىتايدىڭ ۇلتتىق دامۋ جانە رەفورمالار جونىندەگى مەملەكەتتىك كوميتەتى بەيجىڭدەگى سۋ تاسقىنى اپاتىنان كەيىنگى قالپىنا كەلتىرۋ جۇمىستارىنا 2 ميلليارد يۋان ينۆەستيتسيا ءبولدى. سونىمەن قاتار ەلدەگى قارجى جانە توتەنشە جاعدايلار مينيسترلىكتەرى بەيجىڭ مەن باسقا 8 پروۆينتسيادا قۇتقارۋ جانە كومەك كورسەتۋ جۇمىستارىن قولداۋ ءۇشىن ورتالىق تابيعي اپاتتارعا قارسى قوردان 3,5 ميلليارد يۋان الدىن الا بولەتىنىن مالىمدەدى.

قازىرگى ۋاقىتتا زارداپ شەككەن ايماقتاردان 80 مىڭنان استام تۇرعىن ەۆاكۋاتسيالاندى.

اۆتور

مۇقتار مۇرات