قىتاي ا ە س قۋاتى جاعىنان الەمدە ءبىرىنشى ورىندا
استانا. KAZINFORM - بۇگىندە قىتايدا جۇمىس ىستەپ تۇرعان، سالىنىپ جاتقان نەمەسە سالۋعا رۇقسات ەتىلگەن 102 اتومدىق ەنەرگوبلوك بار. بۇل تۋرالى ق ح ر ەكولوگيا جانە قورشاعان ورتا مينيسترلىگىنىڭ سايتىندا ايتىلعان، دەپ حابارلايدى Kazinform مەنشىكتى ءتىلشىسى.
- قىتايدىڭ قۇرلىقتاعى بولىگىندە 58 اتوم ەنەرگوبلوگى جۇمىس ىستەپ تۇر، 31 ءى قۇرىلىسقا ليسەنزيا الدى جانە 13 بلوك قۇرىلىسى ماقۇلداندى. ناتيجەسىندە ەنەرگوبلوكتاردىڭ جالپى سانى 102 گە جەتتى، بەلگىلەنگەن قۋاتى 113 ميلليون كيلوۆاتت. بۇل قىتايعا الەمدە اتوم ەنەرگياسىن ەڭ ءىرى ءوندىرۋشى اتاعىنا يە بولۋعا مۇمكىندىك بەرىپ وتىر، - دەپ مالىمدەدى ق ح ر ەكولوگيا جانە قورشاعان ورتا مينيسترلىگى يادرولىق ەنەرگەتيكا قاۋىپسىزدىگىن قاداعالاۋ دەپارتامەنتىنىڭ ديرەكتورى حوۋ يندۋن.
مەملەكەتتىك ەنەرگەتيكا باسقارماسىنىڭ مالىمەتىنشە، قىتايدىڭ جەل جانە فوتوەلەكتر ستانتسيالارىنىڭ ورناتىلعان قۋاتى 2025 -جىلدىڭ ناۋرىز ايىندا 1 ميلليارد 482 ميلليون كيلوۆاتقا جەتىپ، تاريحتا العاش رەت جىلۋ ەلەكتر ستانتسيالارىنىڭ قۋاتتىلىعىنان اسىپ ءتۇستى.
قىتاي بيلىگى ەكونوميكانى دەكاربونيزاتسيالاۋ ارەكەتتەرىن كۇشەيتكەندىكتەن، ەلدە سوڭعى جىلدارى ەنەرگەتيكانىڭ جاڭا دامۋىنىڭ قارقىندى ءوسۋىن بايقالىپ وتىر.
ايتا كەتەيىك، قىتاي پاناما كانالىنداعى پورتتاردىڭ ساتىلۋىنا تەكسەرۋ جۇرگىزۋدى تالاپ ەتىپ وتىر.
