قىتاي 75 ەلدىڭ ازاماتتارى ءۇشىن ۆيزاسىز رەجيم ەنگىزدى
استانا. KAZINFORM - قازىرگى تاڭدا قىتاي ءبىرجاقتى تارتىپتە نەمەسە ءوزارا كەلىسىم نەگىزىندە 75 ەلدىڭ ازاماتتارى ءۇشىن ۆيزاسىز رەجيم ەنگىزدى، دەپ حابارلايدى سينحۋا.
بۇل تۋرالى ەلدىڭ ۆيزالىق ەرەجەلەرىن وڭتايلاندىرۋ جانە حالىقارالىق الماسۋلارعا جاردەمدەسۋ جونىندەگى كۇش-جىگەرى اياسىندا قىتاي حالىق رەسپۋبليكاسىنىڭ كوشى-قون ىستەرى جونىندەگى مەملەكەتتىك باسقارماسىنىڭ باستىعى ۆان چجيجۋن باسپا ءسوز كونفەرەنسياسىندا ءمالىم ەتتى.
2021- 2025 -جىلدارعا ارنالعان 14-بەسجىلدىق كەزەڭ ىشىندە قىتاي ارقىلى ۆيزاسىز ترانزيتكە رۇقسات ەتىلگەن ەلدەر سانى دا ارتتى - ولاردىڭ سانى 55-كە جەتتى. ەلگە كىرۋگە بولاتىن شەكارالىق وتكىزۋ بەكەتتەرىنىڭ سانى 60-قا دەيىن ءوستى، ولار 24 پروۆينتسيانى، اۆتونوميالىق اۋداندار مەن ورتالىققا تىكەلەي باعىناتىن قالالاردى قامتيدى، دەپ حابارلادى ۆەدومستۆو باسشىسى.
سونىمەن قاتار، ۆيزاسىز ترانزيت مەرزىمى 240 ساعاتقا دەيىن ۇزارتىلدى. ۆان چجيجۋننىڭ ايتۋىنشا، بۇل شارالار قىتايعا تۋريستىك، ىسكەرلىك جانە وزگە دە ماقساتتارمەن كەلەتىن شەتەلدىكتەردىڭ ساپارىن ەداۋىر جەڭىلدەتتى.
— جەكە تاجىريبەلەرىنىڭ نەگىزىندە كوپتەگەن شەتەلدىك قوناقتار قازىرگى جانە كوپقىرلى قىتاي تۋرالى تۇسىنىك قالىپتاستىردى، - دەدى ول.
رەسمي دەرەكتەرگە سايكەس، 14-بەسجىلدىق كەزەڭ ىشىندە قىتايدىڭ شەكارالىق باقىلاۋ ورگاندارى ق ح ر اۋماعىنا كىرۋ مەن شىعۋعا 1,556 ميلليارد رەت رۇقسات بەرىپ، ۇشاقتاردى، كەمەلەردى، پويىزدار مەن اۆتوكولىكتەردى قوسا العاندا، 98 ميلليوننان استام كولىك قۇرالىن تەكسەرىپ وتكىزگەن.
- قىتايداعى كەدەندىك راسىمدەۋ جۇيەسى الەمدەگى ەڭ ءتيىمدى جۇيەلەردىڭ بىرىنە اينالدى، - دەپ اتاپ ءوتتى ۆان چجيجۋن.
سونداي-اق ول كوشى-قون ىستەرى جونىندەگى باسقارمانىڭ بىلىكتى كادرلاردى تارتۋعا باعىتتالعان نەعۇرلىم بەلسەندى، اشىق ءارى ءتيىمدى ستراتەگيانى جۇزەگە اسىرۋعا كۇش سالىپ جاتقانىن، سونىمەن قاتار كىرۋ ۆيزالارىن، ۋاقىتشا تۇرۋعا رۇقساتتاردى، تۇرۋعا ىقتيارحاتتاردى جانە باسقا دا ىلەسپە قىزمەتتەردى قامتيتىن كەشەندى قولداۋ جۇيەسىن قۇرۋعا جاردەمدەسىپ جاتقانىن اتاپ ءوتتى.
بۇدان بۇرىن الماتى اۋەجايى قىتايدان جاڭا باعىت بويىنشا العاشقى رەيستى قابىلداعانى بەلگىلى بولدى.
