قىتاي 2035 -جىلعا دەيىن كومىرتەك شىعارىندىلارىن 7- 10 پايىز قىسقارتپاق
استانا. KAZINFORM - كومىرتەك شىعارىندىلارى بويىنشا الەمدەگى ەڭ ءىرى ەل - قىتاي 2035 -جىلعا قاراي ولاردى 7- 10 پايىزعا قىسقارتپاق.
ءازارتادج حابارلاۋىنشا، بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭ نيۋ-يوركتە وتكەن كليمات سامميتىندە بەينەبايلانىس ارقىلى مالىمدەدى.
ەكونوميكا اۋقىمىندا شىعارىندىلاردى قىسقارتۋ ماقساتىمەن قاتار، شي جينپيڭ الداعى 10 جىل ىشىندە قىتايدا جەل جانە كۇن ەنەرگەتيكاسىنىڭ قۋاتىن 2020 -جىلعى دەڭگەيدەن التى ەسەدەن استام ارتتىرۋ جوسپارلانعانىن ايتتى. سونىمەن بىرگە ەل ىشىندەگى ەنەرگيا تۇتىنۋداعى بەيتاراپ (قازباعا جاتپايتىن) وتىن ۇلەسىن 30 پايىزدان اسىرۋ كوزدەلىپ وتىر.
پەكيندەن تىكەلەي بەينەۇندەۋ جاساعان شي جينپيڭ ەكولوگيالىق تازا كولىكتەردى جاپپاي قولجەتىمدى ەتۋدى جانە «كليماتقا بەيىمدەلگەن قوعامدى قۇرۋدى» ۋادە ەتتى.
قازىرگى تاڭدا الەمدىك كومىرقىشقىل گازى شىعارىندىلارىنىڭ 31 پايىزدان استامى قىتايعا تيەسىلى.
سونىمەن بىرگە شي جينپيڭ دامىعان ەلدەردى كليماتتىڭ وزگەرۋىمەن كۇرەستە بەلسەندى ارەكەت ەتۋگە شاقىردى.
- جاسىل ءارى تومەن كومىرتەكتى ترانسفورماتسيا - بۇل زاماناۋي ءۇردىس. كەيبىر ەلدەر بۇل ۇردىسكە قارسى ارەكەت ەتىپ جاتقانىنا قاراماستان، حالىقارالىق قاۋىمداستىق دۇرىس باعىتتان تايماي، بەرىك سەنىمىن ساقتاپ، تاباندى قادام جاساپ، كۇش-جىگەرىن باسەڭدەتپەۋى ءتيىس، - دەدى شي جينپيڭ جاھاندىق كليمات سالاسىنداعى ىنتىماقتاستىقتى كەڭەيتۋگە ۇندەي وتىرىپ.
