قىسقى وليمپياداداعى قازاق ۆولونتەرى: شەتەلدىك وزىق تاجىريبەنى ەلىمە اپارعىم كەلەدى
ليۆينو. KAZINFORM - قازىرگى زاماندا كەز-كەلگەن ءىس-شارا ۆولونتەرسىز وتپەيتىنى بەلگىلى. اسىرەسە وليمپيادا ويىندارى سياقتى حالقارالىق سپورتتىق ءىرى شارالاردا ولاردىڭ ورىنى ەرەكشە.
يتاليايىنڭ ميلان جانە كورتينا-د’امپەتستسو قالالارىندا ءوتىپ جاتقان XXV قىسقى وليمپيادا ويىندارىندا 18 مىڭ ۆولونتەر قىزىمەت كورسەتىپ جاتىر. وسى ورايدا، Kazinform ءتىلشىسى ميلان جانە ليۆينو قالاسىندا ەرىكتى قىزىمەتىن اتقارىپ جۇرگەن قازاق قىزدارىن كەزدەستىرىپ، سويلەسىپ قايتقان ەدى.
ايشات جانە نۇرشات يەمبەرگەن قىزى ەسىمدى وتانداستارىمىز ءبىر وتباسىنىڭ ەگىز قىزدارى. الماتى وبىلىسى، ەڭبەكشىقازاق اۋدانى تاۋقاراتۇرىق اۋىلىندا تۋىپ وسكەن ەگىزدەر جاستايىنان بىلىمگە قۇشتار بولىپ، الماتى قالاسىنداعى قازاق ۇلتتىق اگرارلىق زەرتتەۋ ۋنيۆەرسيتەتىندە ماگيستر دارەجەسىن العان.
الايدا، قىزدار ءبىلىم جولىن شەتەلدە جالعاستىرۋ تۋرالى شەشىم قابىلداپ، تاڭداۋ يتالياعا تۇسكەن.
- شەتەلدە ءبىلىم الىپ، ءوزىڭدى دامىتۋ كەرەك دەگەن ماقساتىمىز بولدى. باستى ارمانىمىز - شەتەلدىڭ وزىق تاجىريبەسىن ەلىمىزگە اكەلۋ. سول سەبەپتى، اعىلشىن ءتىلىن وقىپ، يتالياداعى University of Eastern Piedmont Amedeo Avogadro ۋنيۆەرسيتەتىنىڭ تاعام، دەنساۋلىق جانە قورشاعان ورتا ماماندىعىنا وقۋعا تۇستىك، - دەدى ايشات.
نۇرشات وليمپيادانىڭ ەرىكتى قىزىمەتىنە قالاي كەلگەنىن ايتىپ بەردى.
- ينديالىق دوستارىمىز بولدى. ەڭ العاش ۆولونتەر بولۋ تۋرالى سولاردان ەستىدىك. ميلان قالاسىندا وتكەن ىرىكتەۋدە بارلىق قابىلەتتەرىمىزدى سىناپ كوردى. قورتىندىسىندا، ءبىز باستاپقى ىرىكتەۋدەن سۇرىنبەي ءوتىپ، وليمپيادا ويىندارىنىڭ ەرىكتى قىزىمەتىنە شاقىرتۋ الدىق. دايىندىق كۋرستارىنان ءساتتى وتكەننەن كەيىن، مەن ميلاندا ۇيىمداستىرۋ بولىمىندە، ال ايشات ليۆينو كۋرورتىنىڭ ترانسپورتتىق ۇيىمداستىرۋ بولىمىندە جۇمىس اتقارىپ جاتىرمىز، - دەدى ول.
ەگىزدەر قازاقستاندىق سپورتشىلاردىڭ وليمپياداعى بارلىق جارىسىنا جانكۇيەر بولىپ وتىرعانىن، سونىمەن قاتار 32 جىل كۇتكەن التىن مەدال ءۇشىن شىن جۇرەكتەن قاتتى قۋانعانىن جاسىرمادى.
- شەت جەردە جۇرگەندە وتانداستارىمىز ۇشىراسسا، قاتتى قۋانامىز. ەلىمىزدىڭ ءار سپورتشىسى ءۇشىن جانكۇيەر بولىپ، جەڭىسكە جەتسە ەكەن دەپ تىلەكشى بولىپ وتىرمىز. ميحايل شايدوروۆ التىن مەدال العاندا قۋانىشتان كوزىمىزگە جاس كەلدى. كوپتەگەن شەتەلدىك ۆولونتەر ارىپتەستەرىم قۇتتىقتاۋ جىبەردى، - دەدى ايشات.
قازاق قىزدارى قازىرگى ۋاقىتتا وسىنداي ۇلكەن سپورتتىق ءىس-شارادا ءجۇرىپ كوپتەگەن تاجىريبەلەر جيناپ جاتقانىن باسا ايتتى. ولار الداعى ۋاقىتتا تۋعان جەرى الماتىدا قىسقى ازيا ويىندارىنىڭ وتەتىنى تۋرالى جاڭالىقتى ماقتانىشپەن قابىلداعانىن، سونىمەن قاتار سول شارادا قىزىمەت اتقارعىسى كەلەتىنىن جەتكىزدى.
- الماتىدا قىسقى ازيا ويىندارى وتەتىنىنە قاتتى قۋانامىن ءارى ماقتان تۇتامىن. وسىنداي حالقارالىق دەڭگەيدەگى شارالار ەلىمىزدىڭ بەدەلىن كوتەرىپ، ەلىمىزدىڭ قىسقى سپورتىنىڭ دامۋىنا ايتارلىقتاي ۇلەس قوساتىنىنا سەنىمدىمىن. شىنىمدى ايتسام، تۋعان جەرىمىزدە قىسقى ازيا ويىندارىنا قىزىمەت اتقارىپ، ءبىر كىسىلىك ۇلەسىمىزدى قوسقىمىز كەلەدى، - دەدى نۇرشات.
ايتا كەتەرلىگى، وسىعان دەيىن وليمپيادا ويىندارى ءوتىپ جاتقان ليۆينو شاڭعى كۋرورتى جانە ميلان قالاسى تۋرالى تانىستىرىپ، فوتورەپورتاج ۇسىنعان ەدىك.
اۆتور مۇحتار قاليموللا ۇلى
