قىسقى دەمالىس: استانادا بالالاردى قايدا اپارۋعا بولادى

استانا. قازاقپارات – 30-جەلتوقسان مەن 8-قاڭتار اراسى — مەكتەپ وقۋشىلارى ءۇشىن قىسقى دەمالىس. وسى 10 كۇن ىشىندە استانادا بالالارعا ارنالعان قانداي مادەني شارالار وتەدى؟ قاي جەرلەردە سىرعاناق تەبۋگە بولادى؟ ارنايى فوتوايماقتار قايدا ۇيىمداستىرىلدى؟

قىستىڭ قىزىعى — سىرعاناق تەبۋ

استانا اكىمدىگىنىڭ مالىمەتىنشە، قالانىڭ 6 اۋدانىندا مۇز ايدىندارى، سىرعاناۋعا ارنالعان توبەشىكتەر، سلايدتار، شاعىن ارحيتەكتۋرالىق نىساندار، فوتوايماقتار — بارلىعى 60 قا جۋىق دەمالىس نىسانى قالا تۇرعىندارى مەن قوناقتارىن قابىلداۋعا ساقاداي ساي تۇر.

سارىارقا اۋدانى

بۇل اۋداندا 12 سىرعاناق تەبۋگە ارنالعان توبەشىك پەن 4 مۇز ايدىنى اشىلعان.

قالالىق الاڭدا ۇلكەن سىرعاناق توبەشىگى مەن مۇز ايدىنى، سونداي-اق مەرەكەلىك فوتوسۋرەت تۇسىرۋگە ارنالعان تاقىرىپتىق فوتوايماقتار مەن تابيعي شىرشا ورناتىلعان.

«بوگەنباي باتىر» داڭعىلى، 43 مەكەنجايىنداعى شاعىن باقتا تابيعي شىرشا ماڭىندا جاسالعان وتباسىلىق مۇز ايدىنى بار.

«كوكتال» ساياباعىندا ءتۇرلى جاستاعى ادامدارعا ارنالعان ەكى سىرعاناق، سونىمەن قاتار جاپپاي كونكي تەبۋگە ارنالعان ۇلكەن مۇز ايدىنى بار.

ەسىل وزەنىنىڭ جاعالاۋىندا ءتۇرلى دەڭگەيدەگى 8 سىرعاناق جانە وزەننىڭ ۇستىندەگى مۇز ايدىنى جۇمىس ىستەپ تۇر.

ا. گەرتسەن جانە وقجەتپەس كوشەلەرىنىڭ قيىلىسىندا قىسقى دەمالىستى كوڭىلدى وتكىزۋ ءۇشىن ءبىر سىرعاناق توبەشىگى جاسالعان.

بايقوڭىر اۋدانى

«جاستار» سارايى (رەسپۋبليكا داڭعىلى، 34) اۋماعىندا مۇز ايدىنى، سىرعاناق جاسالعان جانە جاڭا جىلدىق شىرشا ورناتىلعان.

ج. تاشەنوۆ كوشەسىندەگى ك. اتاتۇرىك اتىنداعى ساياباقتا مۇز ايدىنى مەن سىرعاناق ورناتىلعان.

«جازۋشىلار اللەياسىندا» (اباي داڭعىلى) سىرعاناق، شىرشالار، جاڭا جىلدىق ينستاللياتسيالار مەن شاعىن ارحيتەكتۋرالىق نىساندار ورناتىلعان.

ءوندىرىس ەلدى مەكەنىندە (اقبيداي مەن كەمەڭگەر ۇلى كوشەلەرىنىڭ قيىلىسى) مۇز ايدىنى مەن سىرعاناق اشىلدى.

كيرپيچنىي ەلدى مەكەنىندە (چەحويەۆ جانە جولىمبەت كوشەلەرىنىڭ قيىلىسى) مۇز ايدىنى مەن سىرعاناق بار.

قازقالاشىق ەلدى مەكەنىندە (دوسمۇحامەد ۇلى كوشەسى، 6) بيىكتىگى 2 مەتر سىرعاناق جانە 6 مەترلىك شىرشا ورناتىلعان.

«س م پ» ەلدى مەكەنىندە (كەنشىلەر كوشەسى 5, 126 كوشە) بيىكتىگى 2 مەتر سىرعاناق جانە 6 مەترلىك شىرشا ورناتىلدى. ءدال وسىنداي سىرعاناق 126-كوشەدە دە بار.

قوياندى ساياجاي الابىندا (الاش تاسجولى) بيىكتىگى 4 مەتر سىرعاناق، سونداي-اق بەس مەترلىك شىرشا ورناتىلعان.

سونىمەن قاتار، سەليننىي شاعىن اۋدانىنداعى جۇبانوۆ كوشەسى 3, 3/1، 3/2 مەكەنجايىنداعى اۋلالاردىڭ اۋماعىندا ۇلكەن مۇز ايدىنى اشىق تۇر. رەسپۋبليكا داڭعىلىندا جانە ج. تاشەنوۆ كوشەسىندە جاڭا جىلدىق جارىقتاندىرۋلار ىلىنگەن.

ەسىل اۋدانى

ءداستۇرلى تۇردە ەكسپو اۋماعىندا مۇز ايدىنى، سىرعاناقتار جانە شىرشا ورناتىلدى. سونداي-اق، سىرعاناق پريگورودنىي ەلدى مەكەنىندە دە اشىلدى، ال جاڭا جىلدىق شىرشالار مىنا ورىنداردى بەزەندىردى:

- تۇركىستان كوشەسى جاعىنداعى بوتانيكالىق باق؛

- قابانباي باتىر داڭعىلىنداعى كوپىر استىنداعى الاڭ؛

- پريگورودنىي ەلدى مەكەنىندە (ارناساي-جاڭاداريا كوشەلەرىنىڭ قيىلىسى) جانە دوستىق كوشەسى مەن نۇرجول بۋلۆارىنىڭ قيىلىسىنداعى جاڭا الاڭ.

بيىل شىرشالار التى نەگىزگى ورىنعا ورناتىلادى.

الماتى جانە سارايشىق اۋداندارى

مىنا ورىندار جابدىقتالدى:

قازاق ەلى مونۋمەنتىنىڭ الاڭىندا 2 مۇز ايدىنى، سىرعاناق جانە جاڭا جىلدىق شىرشا اشىلدى. الاڭنىڭ اۋماعى شاعىن ارحيتەكتۋرالىق نىساندارمەن، جارىق-ليۋميناتسيالىق پاننولارمەن بەزەندىرىلگەن.

تاۋەلسىزدىك داڭعىلىنداعى وقۋشىلار سارايىنىڭ جانىندا سلايدتار، شىرشالار، شاعىن ارحيتەكتۋرالىق نىساندار، فوتوايماق جانە مۇز ايدىنى جۇمىس ىستەپ تۇر.

ترياتلون ساياباعىندا مۇز ايدىنى مەن سىرعاناق اشىلعان.

«Sana Sport» سپورت كەشەنىنىڭ اۋماعىندا مۇز ايدىنى، شىرشا جانە شاعىن ارحيتەكتۋرالىق نىساندار ورناتىلدى.

تاعى 4 سىرعاناق تەمىرجولشىلار، ونەركاسىپ، ينتەرناتسيونالنىي جانە كۇيگەنجار تۇرعىن الاپتارىندا اشىلدى.

نۇرا اۋدانى

مۇندا ارنايى تاقىرىپتاعى شاعىن ساۋلەت نىساندارى ورناتىلدى، فوتوايماقتار بەزەندىرىلىپ، جەتى سىرعاناق پەن جەتى مۇز ايدىنى اشىلدى.

14-جەلتوقساندا ساعات مۇناراسىنان (تۇران داڭعىلىنىڭ جاعىنداعى ورتالىق ساياباقتىڭ اۋماعى) باستالاتىن 290 مەترلىك جەلىلىك مۇز ايدىنى اشىلدى.

مۇز ايدىنىنىڭ وزىنەن بولەك، ساياباقتا شىرشا مەن تاقىرىپتىق قوندىرعىلار، سونداي-اق جارمەڭكەلەرگە ارنالعان ساۋدا پاۆيلوندارى جانە ت. ب. بار.

«استانا-ارەنا» ستاديونىنىڭ ماڭىندا ەكى مۇز ايدىنى مەن ءبىر سىرعاناق ورناتىلدى. سول سياقتى ۇلكەن مۇز ايدىنى مەن سىرعاناق «زەلەنىي كۆارتال» تۇرعىن ءۇي كەشەنىنىڭ جانىندا اشىلدى.

جاعالاۋ سكۆەرىندە سىرعاناق ورنالاسقان، ۇركەر ەلدى مەكەنىندە سىرعاناق پەن مۇز ايدىنى سالىندى.

بۇدان بولەك، عاشىقتار ساياباعىنىڭ اۋماعىندا، «زەلەنىي كۆارتال» ت ك جانىندا جانە قابانباي باتىر داڭعىلى مەن قورعالجىن تاس جولىنىڭ قيىلىسىندا جاڭا جىلدىق فوتوايماقتار اشىلدى.

كينوتەاتردا قانداي مۋلتفيلمدەر كورسەتىلىپ جاتىر

ءۇي پەرىسى - كۋزيا/دوموۆەنوك كۋزيا

كۋزيا اتتى ءۇي پەرىسى مىستان كەمپىردىڭ تۇتقىنىنان قاشىپ شىعىپ، ناتاشا ەسىمدى قىز بالانىڭ ۇيىنە تاپ بولادى. ناتاشا جانە تاعى ءبىر ءۇي پەرىسى نافانيامەن بىرگە ول سيقىرلى ساندىقتى ىزدەۋگە شىعادى. الايدا جولدا ولارعا باستى ءارى قاۋىپتى جاۋ - مىستان كەمپىر كەدەرگى بولادى. سيۋجەتى قۇپياعا جانە بولجاپ بولماس بۇلتارىستارعا تولى مۋلتفيلم ناعىز وتباسىلىق كارتينا!

مۋلتفيلمدى 1-قاڭتار كۇنى ەلوردالىق Arman Asia Park ،Chaplin Khan Shatyr ،Chaplin Mega Silk Way كينوتەاترلارىنان تاماشالاۋعا بولادى.

مۋفاسا: ارىستان پاتشايىمى

بۇل ارىستان پاتشا سيمبانىڭ قىزى — مۋفاسانىڭ تاڭعاجايىپ وقيعاسى.

ەرتەرەكتە، مۋفاسا ۇيىنەن الىستا، ءارى قورعانسىز، ءارى جالعىز جۇرگەن شاعىندا تاكا ەسىمدى الانمەن دوستاسادى. ول - پاتشا اۋلەتىنىڭ وكىلى. بۇل تانىستىق شىم-شىتىرىق شىتىرمان وقيعالارعا ۇلاسىپ، نەبىر قيىن ساتتەردە ولاردىڭ دوستىعى سىنعا تۇسەدى. ال ولاردىڭ قارسىلاسى...

مۋلتفيلم تەك بۇگىن Arman Asia Park ،Chaplin Khan Shatyr استانا كينوتەاترلارىندا كورسەتىلەدى. سوڭعى سەانس - 21:30-دا.

سونيك 3

كوز ىلەسپەس جىلدامدىق، سان ءتۇرلى تۇستەردەن جاسالعان كوز تۇندىرارلىق ۆيزۋالدىق ەففەكت - مۇنىڭ ءبارىن سونيك 3 مۋلتفيلمىنەن كورۋگە بولادى. اتاقتى ويىننىڭ كەيىپكەرى بۇل جولى تاعى ءبىر تاڭعاجايىپ وقيعاعا تاپ بولادى. ال ونداعى قورقىنىشتى قارسىلاستاردى دوستارىنىڭ جانە ءوزىنىڭ شاپشاڭدىعىنىڭ ارقاسىندا قاپى قالدىرادى.

مۋلتفيلمدى 1-قاڭتار كۇنى ەلوردالىق Arman Asia Park ،Chaplin Khan Shatyr ،Chaplin Mega Silk Way كينوتەاترلارىنان تاماشالاۋعا بولادى.

قۋىرشاق تەاترىندا نە قىزىق بار

استانانىڭ قۋىرشاق تەاترىندا 3-7-قاڭتار كۇندەرى «كۇلشەقىز جانە عاجايىپ قار» اتتى شىرشا ماڭىنداعى ەرتەڭگىلىكتەر ۇيىمداستىرىلادى. وندا اياز اتا ەرتەگى الەمىنەن كەلىپ، بوبەكتەرمەن بىرگە جاڭا جىل مەرەكەسىن تويلايدى.

ورىس تىلىندە وتەتىن شارا 12:00 دە، قازاق تىلىندەگىسى 16:30 دا باستالادى.

مەرەكەلىك جيىنعا 3 جاستان اسقان بالالار قاتىسا الادى. باعاسى - 2500 تەڭگە.

سونداي-اق، م. گوركي اتىنداعى مەملەكەتتىك اكادەميالىق ورىس دراما تەاترىندا دا 3، 4 جانە 5-قاڭتاردا «عاجايىپ جارتاس» اتتى ءداستۇرلى ەرتەڭگىلىك وتەدى. 3 جانە 5-قاڭتاردا شارا 11:00 دە، ال 4-قاڭتاردا 13:30 دا باستالادى.

وندا اياز اتا مەن قارشا قىزدان بولەك گارري پوتتەر، باستيندا، فەيا سەكىلدى كەيىپكەرلەر بار.

جيىنعا 3 جاسقا دەيىنگى بالالار تەگىن كىرە الادى، ال 3 جاستان اسقان بالا مەن ونىڭ اتا-اناسىنا بيلەت 3000 تەڭگەدەن ساتىلادى. ەرتەڭگىلىك 1 ساعات 50 مينۋتقا سوزىلادى.