قىسقى ازيا ويىندارى: قازاقستاننان تۋدى كىمدەر ۇستاپ شىعادى
استانا. KAZINFORM - قاڭتار ايىنىڭ اياعىندا IX قىسقى ازيا ويىندارىنا قازاقستان سپورتشىلارىن شىعارىپ سالۋ ءراسىمى وتەدى. بۇل تۋرالى ۇكىمەت وتىرىسىندا ق ر تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.

- ازيا ويىندارىنا شىعارىپ سالۋ ءراسىمىن 30-قاڭتار كۇنى استانا قالاسىنداعى «قازاقستان» جەڭىل اتلەتيكا سپورت كەشەنىندە وتكىزۋ جوسپارلانىپ وتىر. ۇمىتكەرلەردىڭ اراسىندا جوعارى سپورتتىق جەتىستىكتەر مەن مۇمكىندىكتەرگە يە سپورتشىلار قامتىلعان. بياتلوننان 2023-جىلعى قىسقى ۋنيۆەرسيادانىڭ جۇلدەگەرى الەكساندر مۋحين جانە 2019-جىلعى ۋنيۆەرسيادانىڭ ەكى دۇركىن جۇلدەگەرى اسەت دۇيسەنوۆ، شاڭعى جارىستارىنان نادەجدا ستەپاشكينا، كونكيمەن جۇگىرۋ سپورتىنان نادەجدا موروزوۆا، التاي جاردەمبەك ۇلى، سونداي-اق شورت-ترەكتەن ازيا ويىندارىنىڭ قولا جۇلدەگەرى ابزال اجىعاليەۆ جانە 2024-جىلعى الەم چەمپيوناتىنىڭ كۇمىس جۇلدەگەرى دەنيس نيكيشا بار، - دەدى ە. مىرزابوسىنوۆ.
ونىڭ ايتۋىنشا، فريستايل-اكروباتيكادان ايتارلىقتاي پەرسپەكتيۆاسى بار سپورتشىلار: 2023-جىلعى ەۋروپا كۋبوگى كەزەڭىنىڭ جەڭىمپازى شەرزود حاشيربايەۆ، 2023-جىلعى ەۋروپا كۋبوگىنىڭ قولا جۇلدەگەرى ايانا جولداس.
- اتالعان سپورتشىلار ەلىمىزدىڭ جۇلدەلەر قورجىنىنا وز ۇلەسىن قوسادى دەپ ۇمىتتەنەمىز. ۇلتتىق قۇرامالاردىڭ دايىندىعىنىڭ جاۋاپكەرشىلىگى 10 ديستسيپلينا بويىنشا باس باپكەرلەرگە جۇكتەلەدى. ولار - سپورتشىلاردىڭ ءساتتى ونەر كورسەتۋىنە بارلىق كۇش-جىگەرىن سالاتىن بىلىكتى ماماندار. قازاقستاندىق باپكەرلەرمەن قاتار، سپورتشىلاردى ساپالى دايىنداۋ ءۇشىن نيدەرلاندى، پولشا، سلوۆەنيا، بەلارۋس جانە رەسەي فەدەراتسياسىنان 9 جاتتىقتىرۋشى-كونسۋلتانت تارتىلدى. ولار سپورتتىڭ 4 ءتۇرى بويىنشا جۇمىس ىستەيدى: بياتلون، كونكيمەن جۇگىرۋ سپورتى، شورت-ترەك جانە مانەرلەپ سىرعاناۋ، - دەدى مينيستر.
سونىمەن قاتار ۆەدومستۆو باسشىسى ازيا ويىندارىنداعى تۋ ۇستاۋشىلاردى اتادى. بەكەتايەۆ ءادىل مارات ۇلى - قازاقستان رەسپۋبليكاسىنىڭ حوككەيدەن سپورت شەبەرى، جاستار اراسىنداعى الەم چەمپيوناتىنىڭ قولا جۇلدەگەرى جانە جەڭىمپازى. تيحونوۆا ولگا الەكساندروۆنا - شورت-ترەكتەن حالىقارالىق دارەجەدەگى سپورت شەبەرى، 2017-جىلى وتكەن ازيا ويىندارىنىڭ قولا جۇلدەگەرى، سونداي-اق دۇنيەجۇزىلىك ۋنيۆەرسيادا جۇلدەگەرى.
بۇدان بۇرىن حابارلانعانداي، قىتايدا وتەتىن IX قىسقى ازيا ويىندارىنا قازاقستاننان 138 سپورتشى بارادى.