قىسقى 25- وليمپيادا جانە پاراليمپيادا ويىندارىنىڭ مەدالدارى قانداي
استانا. KAZINFORM - يتاليانىڭ ۆەنەتسيا قالاسىندا XXV قىسقى وليمپيادا جانە پاراليمپيادا ويىندارى مەدالدارىنىڭ سالتاناتتى تانىستىرىلىمى ءوتتى.
حالىقارالىق وليمپيادا كوميتەتى رەسمي سايتىنىڭ حابارلاۋىنشا، مەدالداردى ميلان- كورتينا قىسقى وليمپيادا ويىندارى مەن قىسقى پاراليمپيادا ويىندارىنىڭ رەسمي دەمەۋشىسى يتاليانىڭ مەملەكەتتىك تەڭگە سارايى مەن باسپا ينستيتۋتى (Istituto Poligrafico e Zecca dello Stato/IPZS) جاساعان.
مەدالدار ەكولوگيالىق تازا، ۋلى ەمەس جانە قايتا وڭدەۋگە بولاتىن مەتالدان شىعارىلادى. IPZS پايدالاناتىن ەنەرگيا تولىعىمەن جاڭارتىلاتىن كوزدەردەن الىنادى.
- مەدالدار يتالياندىق ديزايننىڭ شەبەرلىگى مەن تاماشالىعىن بىلدىرەدى. ولاردىڭ ءارقايسىسى بىرەگەي تۋىندى، جوعارى دەڭگەيدەگى تەحنولوگيالىق يننوۆاتسيالارمەن بىرىكتىرىلگەن شەبەرلىكتىڭ ناتيجەسى، - دەپ اتاپ ءوتتى IPZS پرەزيدەنتى پاولو پەررونە.
مەدالدىڭ الدىڭعى جانە ارتقى جاعى ءبىر-بىرىنە جالعانعان ەكى جارتى شەڭبەردەن تۇرادى. بۇل ەكى قالا ميلان مەن كورتينا اراسىنداعى ىنتىماقتاستىقتى جانە جەڭىس رۋحى مەن ارمانداردى جۇزەگە اسىرۋ ءۇشىن كۇرەستى بەينەلەيدى.
سونىمەن قاتار مەدالداعى ەكى جارتى بولىك سپورتشىنىڭ مانساپ جولىن جانە وسى جولدا ونىڭ جانىندا بولعان بارلىق ادامدى بەينەلەيدى.
- ءار مەدال، مەيلى وليمپيادالىق بولسىن، مەيلى پاراليمپيادالىق بولسىن، مەتالعا ورنەكتەلگەن تاريح: ول جەڭىس تۇعىرىنا جەتۋ ءۇشىن ءومىر سۇرگەندەردىڭ كۇش-جىگەرى، تاباندىلىعى، قۇرباندىعى جانە ءۇمىتى تۋرالى ايتادى. سونىمەن قاتار ول سپورتتىڭ ەڭ شىنايى قۇندىلىقتارىنا سەنەتىن ەلدىڭ تاريحىن باياندايدى. ونى جەڭىپ العاندار وزدەرىمەن بىرگە تەك قانا يتالياندىق رۋحتىڭ قۇرمەتىن، ءتىرى جەڭىس سيمۆولىن الىپ جۇرەدى. ءبىز بىرگە ارمانداۋعا جانە وعان قول جەتكىزۋگە قابىلەتتىمىز، - دەدى ميلان- كورتينا 2026 قورىنىڭ پرەزيدەنتى دجوۆانني مالاگو.
ەسكە سالايىق، 2026 -جىلعى وليمپيادا ويىندارى 6-22-اقپان ارالىعىندا يتاليانىڭ ميلان جانە كورتينا- د’امپەتستسو قالالارىندا وتەدى.
اۆتور
مۇحتار قاليموللا ۇلى
