قىس تۋرالى قىزىقتى مالىمەتتەر

 استانا. قازاقپارات - جالپى، قىتىمىر اياز تەك ءبىزدىڭ ەلدە عانا ەمەس، سولتۇستىك امەريكا مەن ەۋروپا مەملەكەتتەرىندە دە توسىن مىنەزىن كورسەتەدى. 

بۇعان دەيىن دە رەكوردتىق دەڭگەيدە قار جاۋىپ، تەرمومەتر باعانىنىڭ -90 گرادۋسقا دەيىن تومەندەگەن كەزدەرى بولعان. ەندەشە، تاريحقا كوز جۇگىرتەيىك.

الەمدەگى ەڭ سۋىق ەلدىمەكەندەردىڭ ءبىرى - ياكۋتياداعى ويمياكون سەلوسى. ونى جۇرت كەيدە «ايازدى پوليۋس» دەپ تە اتايدى. 1916 - جىلى مۇندا اۋا تەمپەراتۋراسى -82 گرادۋسقا دەيىن تومەندەگەن بولاتىن.

ال، جەر بەتىندەگى ەڭ سۋىق نۇكتە انتاركتيداداعى «ۆوستوك» ستانسياسىندا. 1983 - جىلدىڭ 21 - شىلدەسىندە مۇندا تەرمومەتر باعانى -89،2 سەلسيي گرادۋستى كورسەتكەن.

1971 - جىلى ا ق ش-تاعى رەينير تاۋىنىڭ ەتەگىندە ورنالاسقان پارادايس قالاشىعىندا ءبىر جىل كولەمىندە 31،1 مەتر قار جاۋعان. سول ۋاقىتتان بەرى بۇل رەكورد بۇزىلعان جوق.

1944 - جىلدىڭ 30 - ساۋىرىندە ماسكەۋدە كولەمى ادامنىڭ الاقانىنداي بولاتىن قار ۇلپالارى جاۋعان. العاشىندا كوكتەن جاۋىپ جاتقان نە ەكەنىن تۇسىنە قويماعان كەي تۇرعىندار ونى قۇستىڭ قاۋىرسىنى دەپ ويلاعان. ال، تاريحتا قالعان ەڭ ۇلكەن قار ۇلپاسىنىڭ ۇزىندىعى 32 سانتيمەتر.

سولتۇستىك پوليۋستە قاردىڭ قاتتى بولاتىنى سونشا، ونى ساۋساقپەن قاتتى تۇرتكەن كەزدە تەمىردى تۇرتكەندەي دىبىس بەرەدى.