قىس قىزىقتارى: بۋرابايدا قانداي تۋريستىك ورىندارعا بارۋعا بولادى
بۋراباي. KAZINFORM - بۋراباي كۋرورتىندا قىسقى ماۋسىم سالتاناتتى تۇردە اشىلدى. قازاقستاننىڭ ءىنجۋ- مارجانى سانالاتىن بۋراباي قىلقان جاپىراقتى ورمانىمەن، تازا اۋاسىمەن جانە ەمدىك كولدەرىمەن ماقتانا الادى.
قىس كەزىندە دە مۇندا شاڭعى، كونكي، سنوۋبوردپەن سىرعاناپ، لاپلاندياعا، بۇعى-مارال شارۋاشىلىعىنا بارىپ، جابايى تابيعاتپەن تانىسۋعا بولادى.
ايتا كەتەيىك، جىل باسىنان بەرى بۋرابايعا 1 ميلليوننان استام تۋريست كەلگەن. بيىل سالىنعان بۋرابايداعى مۇز قالاشىعى اۋقىمدىلىعىمەن جانە جارقىن اتتراكسيوندارىمەن تاڭعالدىرادى: وندا بيىكتىگى 8 مەترلىك ەكى ۇلكەن سىرعاناق، كەڭ مۇز ايدىنى، كونكي، پليۋشكا جانە باسقا دا قىسقى جابدىقتاردى جالعا الۋ قىزمەتتەرى بار. ونى ۇيىمداستىرعان «بۋراباي دامۋ» ج ش س زاماناۋي تۋريستىك نىسانداردى قۇرىپ، قوناقتارعا جىل بويى جايلى دەمالىس ۇسىنۋدا تابىستى ەڭبەك ەتىپ كەلەدى.
بۋراباي كۋرورتى استانانىڭ سولتۇستىگىنە قاراي 250 شاقىرىم جەردە ورنالاسقان، وعان پويىزبەن، اۆتوبۋسپەن نەمەسە تاكسيمەن جەتۋگە بولادى. قازىرگى ۋاقىتتا استانادان بۋراباي كۋرورتىنا دەيىن ءارتۇرلى كەستەمەن 5 پويىز قاتىنايدى. سولاردىڭ ءبىرى - «استانا - بۋراباي كۋرورتى» جاڭا تۋريستىك ەلەكتر پويىزى تاۋەلسىزدىك كۇنى قارساڭىندا ىسكە قوسىلدى. بۇل باعىتتىڭ ەرەكشەلىگى - كۋرورتتىق ايماققا ەش ايالداماسىز 2 ساعات 26 مينۋتتا جەتۋگە بولادى.
«استانا- بۋراباي كۋرورتى» تۋريستىك باعىتى تاقىرىپقا ساي بەزەندىرىلگەن. وندا 6 ۆاگون بار جانە 574 جولاۋشى سىيادى. پويىز ۆاگوندارى قازاقستاندا جاسالعان (زيكستو) جانە «كومفورت پليۋس» كلاستى ورىندىقتارمەن جابدىقتالعان. بيلەت قۇنى نەبارى 2500-2700 تەڭگە ارالىعىندا.
ەلەكتر پويىزدا ميكروكليمات جۇيەسى، جىلدام قۋاتتايتىن USB- روزەتكالار، Wi-Fi جانە ۆەلوسيپەد بەكىتۋگە ارنالعان قۇرالدار بار. مۇمكىندىگى شەكتەۋلى جولاۋشىلار ءۇشىن ارنايى كوتەرگىشتەر مەن مۇگەدەكتەر اربالارىنا ارنالعان ورىندار قاراستىرىلعان.
سونىمەن قاتار جول بويىندا استانا مەن بۋرابايدىڭ تابيعاتى مەن تاريحى تۋرالى ەكسكليۋزيۆتى اۋديوگيدتى تىڭداۋعا بولادى.
سانتا كلاۋس رەزيدەنسياسىنا ساياحات
قازاقستاندىق لاپلانديا نەمەسە سانتا كلاۋستىڭ رەزيدەنسياسى - بۋرابايدا قىسقى دەمالىستى جوسپارلاعاندار ءۇشىن تاپتىرمايتىن قىزىقتى مەكەن. كەلۋشىلەرگە سانتا رەزيدەنسياسى بويىنشا «الەمنىڭ جەتى كەرەمەتى» اتتى ەكسكۋرسيا ۇيىمداستىرىلادى. ەكسكۋرسيا بارىسىندا ەلفتەر الەمى مەن سانتا كلاۋس كۇتەدى. سونداي-اق، سانتا كلاۋسقا تىلەك حاتىن قالدىرۋعا بولادى.
بيىلعى قىستا قازاقستاندىق لاپلانديا رەزيدەنسيانىڭ جاڭارتىلعان ديزاينىمەن قۋانتادى. وندا دەكوراتيۆتى جارىقتار مەن تاقىرىپتىق فوتوزونالار، اياز اتانىڭ پوشتاسى، بىرەگەي جانۋارلارى بار ميني- زووباق، بالالار مەن ەرەسەكتەرگە ارنالعان ويىن ايماقتارى جانە ويىن- ساۋىقتار ۇسىنىلادى. سونىمەن قاتار، كىشكەنتاي قوناقتار ءۇشىن انيماتورلاردىڭ باقىلاۋىمەن بالالاردى قالدىرىپ كەتۋگە بولاتىن ويىن ءۇيى مەن بالالار بولمەسى اشىلعان.
رەزيدەنسيا اۋماعىندا باسقا دا قىزىقتار بار. مىسالى، حاسكي جانە بۇعىعا جەگىلگەن شانامەن سىرعاناۋعا بولادى. جەرگىلىكتى شامان تۋريستەردى ءوز مەكەنىمەن تانىستىرىپ، شامان ءداستۇرى تۋرالى اڭگىمەلەپ بەرەدى. ودان بولەك، پونيعا ءمىنىپ جانە كۆادروتسيكل تەبۋ قاراستىرىلعان.
ايتا كەتەيىك، قازاقستاندىق لاپلانديا جىل سايىن قاراشانىڭ ورتاسىنان باستاپ، كەلەر جىلدىڭ ساۋىرىنە دەيىن جۇمىس ىستەيدى.
اقمولا وبلىسى بۋراباي كەنتىنىڭ ىرگەسىندەگى تەڭبىل بۇعىنىڭ ءمۇيىزى مەن قانىنان ەمدىك ءونىم الاتىن «AQ MARAL» شارۋاشىلىعى جۇمىس ىستەيدى. بۇل دا بۋراباي كۋرورتىن دامىتۋ ماقساتىندا جۇزەگە اسىرىلعان جوبا. شارۋاشىلىقتا پانتوەمدەۋ ورتالىعى، ءداستۇرلى كيىز ۇيلەر مەن ۇلتتىق سالت- داستۇرلەردى ساقتاعان شاعىن ەتنواۋىل جۇمىس ىستەيدى. اسىرەسە شەتەلدىك قوناقتار وسى نىسانعا ەرەكشە قىزىعۋشىلىق تانىتادى.
بۋرابايدىڭ تابيعي ورتاسى مارال وسىرۋگە وتە قولايلى. تاۋلى- ورماندى دالالار مارالداردىڭ قاجەتتى سالماق جيناپ، تابيعي دامۋىنا مۇمكىندىك بەرەتىن تولىققاندى قورەكپەن قامتىلعان. بۇگىندە مارال ءوسىرۋ شارۋاشىلىعىندا شامامەن 200 جانۋار بار. ولار وزدەرىنىڭ تابيعي مەكەنىندە - 600 گەكتاردى قۇرايتىن قالىڭ ورمان القابىندا ەركىن جايىلادى. بارلىق مارال ۆەتەرينارلاردىڭ قاتاڭ باقىلاۋىندا.
- جازدى كۇنى مارالدار كوك شالعىندى قۋالاپ جايلىپ، قولعا كوپ كەلە بەرمەيدى. مەكەندەيتىن شارۋاشىلىق اۋماعى تەمىر تورلارمەن قورشالعان. تەڭبىل بۇعى 14-15 جىل ءومىر سۇرەدى. ونىڭ 3 جاسىنان باستاپ ءمۇيىزىن كەسىپ، ەمدىك ماقساتتا پايدالانامىز. نەگىزىنەن ماۋسىم- تامىز ايلارىندا كەسەمىز. ناۋرىزدىڭ اياعىندا مارالدىڭ ءمۇيىزى وزدىگىنەن تۇسە باستايدى دا، ورنىنا جاڭاسى ءوسىپ شىعادى. سول مۇيىزدەر 10-15 سانتيمەتردەي وسكەن كەزدە تۇبىنەن ەكى ەلى تۇقىلىن قالدىرىپ كەسەمىز. بۇعىنىڭ جاس مۇيىزىندە جان بولمايدى. دۇرىس ولشەپ، كەسسە اۋىرسىنۋدى سەزبەيدى، - دەيدى ورتالىقتىڭ شارۋاشىلىق باسشىسى ايبولات راحماتۋلين.
پانتوەمدەۋ ورتالىعىندا مارالدىڭ مۇيىزىنەن دارىلىك زاتتار وندىرىلەدى. ويتكەنى مارال مۇيىزىندە يممۋنيتەتتى نىعايتۋعا، بۋىن، جۇرەك اۋرۋلارىمەن كۇرەسۋگە، جۇيكە جۇيەسىن قالپىنا كەلتىرۋگە، ومىرلىك كۇش- قۋاتتى ارتتىرۋعا ارنالعان ءارتۇرلى ميكروەلەمەنتتەر، ۆيتاميندەر جانە بيولوگيالىق بەلسەندى زاتتار بار.
جاڭا مۋلتيمەديالىق كەشەن
بيىل بۋرابايداعى مۋلتيمەديالىق ينتەراكتيۆتى كەشەن اۋقىمدى جاڭعىرتۋدان ءوتىپ، قازاقستانداعى ەڭ جوعارى تەحنولوگيالىق مۋزەيلەردىڭ بىرىنە اينالدى. ونداعى زاماناۋي انيماتسيالىق جانە اۋديوۆيزۋالدىق تەحنولوگيالار ءاربىر كەلۋشىگە قازاق مادەنيەتىنىڭ بىرەگەي اتموسفەراسىنا ەنۋگە جانە ەلىمىزدىڭ تاريحى تۋرالى كوبىرەك بىلۋگە مۇمكىندىك بەرەدى. زاماناۋي كەشەن كۇنىنە 500 كەلۋشىنى قابىلداي الادى.
جاڭا كەشەننىڭ مەدياكونتەنتى تۇراقتى تۇردە جاڭارتىلىپ وتىرادى جانە وعان ويىن- ساۋىق پەن تانىمدىق ماتەريالدار كىرەدى. بۇل تۋريستەرگە ءتۇرلى باعدارلامالاردان ءلاززات الىپ، جاڭا ءارى قىزىقتى اقپارات الۋعا مۇمكىندىك بەرەدى.
مۋلتيمەديالىق ينتەراكتيۆتى كەشەن 9 زالعا بولىنگەن. «قازاقستانعا ساياحات» ءبولىمى - بۋراباي، مەدەۋ، شىمبۇلاق، شارىن كانونى، كاسپي تەڭىزى، تۇركىستان، ءۇستىرت ءۇستىرتى، مۇزتاۋ، «بايقوڭىر» عارىش ايلاعى سەكىلدى ەلىمىزدىڭ تۋريستىك ورىندارىنىڭ بايلىعى مەن سۇلۋلىعىن كورسەتەدى.
زاماناۋي تەحنولوگيالاردىڭ ارقاسىندا كەلۋشىلەر وزدەرىن قازاقستان تاريحىنىڭ ءبىر بولشەگى رەتىندە سەزىنە الادى.
«360 كۋب» زالى - بەينەنى كەسكىندەيتىن بىرەگەي تەحنولوگياسى بار قازاقستانداعى جالعىز زال. بەس پروەكتور مەن ەكى بۇيىرلىك ەكران 270 گرادۋستىق پانورامالىق كەسكىن جاسايدى، بۇل كورەرمەندەرگە ءوزىن فيلمنىڭ ءبىر بولشەگى سەزىنۋگە مۇمكىندىك بەرەدى. اتالعان فورمات پەريفەريالىق كورۋدى قولدانۋ ارقىلى جاڭا سەزىمدەر تۋدىرادى جانە بارلىق كورىنىس بولىگىن كورۋگە مۇمكىندىك بەرەدى.
ال «ابىلاي حان» قىسقامەتراجدى كوركەم فيلمىندە قازاق حالقىنىڭ ءبىرتۋار پەرزەنتى - ابىلاي حان اتانعان بالا ءابىلمانسۇردىڭ ءومىر جولى باياندالادى. باستى ءرولدى قازاقتىڭ بەلگىلى اكتەرى جاندوس ايباسوۆ سومداعان. سونىمەن بىرگە، كەلۋشىلەر ابىلاي حاننىڭ باتاسىن الىپ، ساداق اتىپ جانە كەدەرگىلەردى ەڭسەرىپ جۇرگەن باتىر سياقتى سەزىنۋگە بولادى.
ويىن تۇرىندەگى ينتەراكتيۆتى ەكسپوزيتسيالار بالالار مەن شەتەلدىك قوناقتارعا ۇلتتىق مۋزىكالىق اسپاپتار، ويۋ- ورنەكتەر، سونداي- اق قازاق دالاسىنىڭ جانۋارلار الەمى مەن وسىمدىكتەرى تۋرالى بىلۋگە كومەكتەسەدى. شەجىرە زالىندا ەلدىڭ ينتەراكتيۆتى كارتاسىنان بارلىق قازاق رۋلارىن، ولاردىڭ تاڭباسىن جانە تۇراتىن جەرلەرىن بىرىكتىرەتىن سيمۆولدىق بايتەرەك اعاشى ورنالاسقان. مۇنداعى ماقسات - رۋعا ءبولىنۋ ەمەس، ءار ادامنىڭ شىققان تەگى مەن تاريحىن بىلۋگە كومەكتەسۋ.
ۇلتتىق پارككە كىرۋ تاريفى قالاي وزگەردى
بيىل سالىق كودەكسىنەن ەرەكشە قورعالاتىن تابيعي اۋماقتاردى پايدالانعانى ءۇشىن الىناتىن تولەم رەسپۋبليكالىق بيۋدجەتكە تۇسەتىنى تۋرالى نورمالار الىنىپ تاستالدى. قازىر تولەم تەك قانا ۇلتتتىق پاركتىڭ ارنايى ەسەپشوتىنا تۇسەدى جانە ءاربىر پارك ءوزىنىڭ تاريفتەرىن بەلگىلەيدى.
− بۋراباي - ەلىمىزدەگى حالىق ەڭ كوپ كەلەتىن ۇلتتىق پارك. بيىل كەلگەن تۋريستەر سانى 1 ميلليوننان استى جانە جىل ساناپ ارتىپ كەلە جاتىر. ارينە، تۋريستەر كوپ بولعان سايىن جەرگىلىكتى تابيعاتقا دا ۇلكەن سالماق تۇسەدى. قوقىس كوبەيەدى، توپىراق ەروزياعا ۇشىرايدى، تاۋ- تاستار بۇلىنەدى. ءورت قاۋپى كۇشەيەدى. جۇمىس كۇشىن كوبەيتۋگە تۋرا كەلەدى. ونىڭ بارلىعى قوسىمشا شىعىندى قاجەت ەتەدى، - دەيدى «بۋراباي» م ۇ ت پ ديرەكتورىنىڭ ورىنباسارى ۆەنەرا نۇعمانوۆا تىلشىلەرگە بەرگەن سۇحباتىندا.
وسىلايشا، پارك اۋماعىنا جەڭىل كولىكپەن كىرۋ قۇنى جۇمىس كۇندەرى - 0,3 ا ە ك (1107 تەڭگە)، دەمالىس جانە مەرەكە كۇندەرى - 0,4 ا ە ك (1476 تەڭگە) بولىپ بەلگىلەنگەن.
تيىسىنشە 16 ورىندىق اۆتوبۋستار ءۇشىن كىرۋ اقىسى - 1 جانە 1,5 ا ە ك (3692 جانە 5538 تەڭگە)، 16-32 ورىندىق اۆتوبۋستار ءۇشىن 2 جانە 2,5 ا ە ك (7384 جانە 9230 تەڭگە)، 32-دەن ارتىق جولاۋشىعا ارنالعان اۆتوبۋستار ءۇشىن - 3 جانە 3,5 اەك (11076 جانە 12922 تەڭگە).
سونداي-اق، «بۋراباي» ۇلتتىق پاركىنىڭ اۋماعىندا تۇراتىن، ۇلتتىق پاركپەن ىرگەلەس ەلدى- مەكەندەردىڭ 26,5 مىڭ حالقىنان ەش تولەماقى الىنبايدى. ولاردىڭ اۆتوكولىك ءنومىرى ەلەكتروندى بازادا تىركەلگەن. قازىرگى تاڭدا «بۋراباي» پاركىنە كىرەتىن تۇستاردا اۆتوماتتاندىرىلعان 5 وتكىزۋ- باقىلاۋ بەكەتى جۇمىس ىستەپ تۇر. تولەمدى Kaspi جانە Halyk Bank QR- كودتارى ارقىلى جاساۋعا بولادى.
ايجان سەرىكجان قىزى
اۆتور
