قۇيرىقتىكول كەن ورنىندا بارلاۋ جۇمىستارى اياقتالدى - مينيسترلىك
استانا. KAZINFORM - قۇيرىقتىكول كەن ورنىنىڭ قورى 800 مىڭ توننا، ال بولجامدى رەسۋرستارى 935 مىڭ تونناعا باعالانىپ وتىر. بۇل تۋرالى ونەركاسىپ جانە قۇرىلىس ۆيتسە-ءمينيسترى يران شارحان ءمالىم ەتتى.
- بۇگىندە الەمدىك دەڭگەيدەگى قۇيرىقتىكول سيرەك جەر مەتالدارى كەن ورنىندا بارلاۋ جۇمىستارى اياقتالدى. ونىڭ جيىنتىق قورى 800 مىڭ توننا، ال بولجامدى رەسۋرستارى 935 مىڭ تونناعا باعالانىپ وتىر، ونىڭ ىشىندە سەري مەن لانتانويدتار دا بار. سالانىڭ دامۋى ىشكى وزگەرىستەرمەن قاتار ءجۇرىپ جاتىر، - دەدى يران شارحان ەلوردادا ءوتىپ جاتقان 15- حالىقارالىق تاۋ-كەن مەتاللۋرگيا كونگرەسىندە.
ۆيتسە-ءمينيستردىڭ مالىمدەۋىنشە، گەولوگيالىق بارلاۋ سالاسىندا جانە تەحنيكالىق جوعارى وقۋ ورىندارىندا جەر قويناۋىن مودەلدەۋدە جاساندى ينتەللەكتىگە نەگىزدەلگەن سيفرلىق شەشىمدەر ەنگىزىلىپ جاتىر.
- تۇراقتىلىق ءبىز ءۇشىن جاي ۇران ەمەس - ناقتى مىندەت. ءبىز وندىرىستىك تىزبەكتىڭ بارلىق دەڭگەيىندە قاۋىپسىزدىك، ەڭبەكتى قورعاۋ جانە ەكولوگيالىق جاۋاپكەرشىلىك نورمالارعا اينالۋىن كوزدەيمىز. ءسوزىمدى قورىتىندىلاي كەلە، قازاقستان تاۋ-كەن مەتاللۋرگيا سالاسىنىڭ جان-جاقتى دامۋىنا قاراي جۇيەلى تۇردە ىلگەرىلەپ كەلە جاتىر، - دەيدى ول.
بۇعان دەيىن حابارلاعانىمىزداي، قازاقستان التىن قورى بويىنشا توپ-20 ەلدىڭ قاتارىنا كىردى.
سونداي-اق جاقىن ارادا تاۋ-كەن كەشەنى سالاسىندا 3,5 تريلليون تەڭگەگە 5 ينۆەستيتسيالىق جوبا ىسكە قوسىلادى دەپ جوسپارلانىپ وتىر.
ايتا كەتەيىك، ەلوردادا حالىقارالىق تاۋ-كەن مەتاللۋرگيا كونگرەسى ءوتىپ جاتىر. وعان الەمنىڭ 20 ەلىنەن 1300 دەلەگات قاتىستى.
اۆتور
داۋلەت ىزتىلەۋ
