قىرعىزستاندى 20 وكرۋگكە بولمەكشى

بىشكەك. KAZINFORM - قىرعىزستان پرەزيدەنتى سادىر جاپاروۆ وش وبلىسى نووكات اۋدانىنىڭ تۇرعىندارىمەن كەزدەسۋىندە اكىمشىلىك- اۋماقتىق رەفورمانىڭ ەكىنشى كەزەڭىن جاريالادى، دەپ حابارلايدى Kazinform اگەنتتىگىنىڭ بىشكەكتەگى مەنشىكتى ءتىلشىسى.

قىرعىز باسشىسىنىڭ ايتۋىنشا، بيلىك ەلدە وبلىستار مەن اۋدانداردىڭ ورنىنا 20 وكرۋگ قۇرۋدى جوسپارلاپ وتىر.

- قازىرگى ۋاقىتتا رەسپۋبليكادا 44 اۋدان جانە 33 قالا بار. بارلىق وبلىستار مەن اۋداندار تاراتىلىپ، ونىڭ ورنىنا 20 وكرۋگ قۇرىلادى، ءبىراق بۇعان دەيىن ءالى ءۇش-ءتورت جىل بار. باستاپقىدا پيلوتتىق جوبا رەتىندە ءبىر وكرۋگ قۇرىلادى، ال الداعى ەكى-ءۇش جىلدا ءبىز ونى رەسپۋبليكالىق بيۋدجەت قاراجاتىنسىز قالاي باسقارىلاتىنىن باقىلايمىز. ەگەر ءبارى ءساتتى بولسا، اۋداندار مەن وبلىستار تاراتىلىپ، ەل وكرۋگتەرگە بولىنەدى، - دەپ اتاپ ءوتتى قىرعىز رەسپۋبليكاسىنىڭ پرەزيدەنتى.

ونىڭ ايتۋىنشا، بۇل باسقارۋ تيىمدىلىگىن ارتتىرىپ، شىعىنداردى ازايتىپ، ايماقتاردىڭ قارجىلىق دەربەستىگىن نىعايتۋى ءتيىس.

وسىعان دەيىن جاقىن ارادا قىرعىزستاندا SpaceX كومپانياسىنىڭ Starlink سپۋتنيكتىك بايلانىس قىزمەتى ىسكە قوسىلاتىنىن حابارلادىق.