قىرعىزستاندا تىيىم سالىنعان اۋعاندىق سۋسىن قازاقستاندا ساتىلىمنان شىعارىلمايدى

استانا. KAZINFORM - اۋعانستاندا وندىرىلەتىن انار ءدامدى Royal گازدالعان سۋسىنى بالالارعا زياندى بولعاندىقتان قىرعىزستاندا ساتۋعا تىيىم سالىندى. الايدا، قازاقستاندا بۇل ءونىمدى نەگە ساتۋعا ءالى دە رۇقسات بەرىپ وتىرعانىن Kazinform اگەنتتىگىنىڭ ءتىلشىسى انىقتادى.

شىلدە ايىنىڭ باسىندا قىرعىزستان دەنساۋلىق ساقتاۋ مينيسترلىگى جانىنداعى مەملەكەتتىك سانەپيدباقىلاۋ Royal انار سۋسىنىنىڭ قۇرامىندا E122 ازورۋبين بوياعىش زاتى بارىن مالىمدەدى. ولاردىڭ ايتۋىنشا، بۇل ەلەمەنت بالالاردىڭ دەنساۋلىعىنا كەرى اسەرىن تيگىزەدى.

وش قالاسىنداعى ساۋدا ورىندارىنداعى سۋسىندار تاركىلەنىپ، ساۋدا جەلىلەرىنىڭ باسشىلارىنا اتالمىش سۋسىندى ساتۋعا تىيىم سالىنعانى تۋرالى ەسكەرتۋ جاسالدى.

بۇل مالىمدەمەگە قازاقستان تاراپى دا جاۋاپ بەردى. ق ر سانەپيدباقىلاۋ كوميتەتىنىڭ مالىمدەۋىنشە، اتالعان سۋسىننىڭ ەلىمىزدە ساتىلۋىنا تىيىم سالۋعا قۇقىقتىق نەگىز جوق. ۆەدومستۆو ونىمگە زەرتحانالىق تالداۋ جاساپ، E122  ازورۋبيننىڭ گازدالعان سۋسىن وندىرىسىنە قولدانۋعا رۇقسات ەتىلەتىنىن ءتۇسىندىردى. كەدەندىك وداقتىڭ تەحنيكالىق رەگلامەنتىندە 1 ك گ ونىمگە 50 م گ قولدانۋعا بولاتىنى ايتىلعان.

- ەگەر كەدەندىك وداققا مۇشە ەلدەردىڭ ءبىرى قانداي دا ءبىر ونىمگە شەكتەۋ قوياتىن بولسا، ەۋرازيالىق ەكونوميكالىق وداق تارتىبىنە ساي ە ا ە و مۇشە ەلدەردىڭ بارىنە ەسكەرتۋى كەرەك. قىرعىز رەسپۋبليكاسىنىڭ دەنساۋلىق ساقتاۋ مينيسترلىگىنەن ءبىز مۇنداي حابارلاما المادىق، - دەدى ق ر دەنساۋلىق ساقتاۋ مينيسترلىگى سانەپيدباقىلاۋ كوميتەتىنىڭ تەحنيكالىق باقىلاۋ جونىندەگى باسقارماسىنىڭ باسشىسى ايگەرىم سادۋبايەۆا.

سونىمەن قاتار اۋعاندىق ونىمگە قاتىستى ۆەدومستۆونىڭ بەلگىلى ءبىر سۇراقتارى دا بار بولىپ شىقتى. ولاردىڭ ءونىمى بەلگىلەنگەن ماركيروۆكاعا ساي بولماي شىقتى. وندا سۋسىننىڭ ونىمدىك قۇندىلىعى، قۇرامى جانە دايىنداۋشىسى تۋرالى مالىمەتتەر جوق.

- ءبىز ايماقتىق بولىمشەلەرگە بارلىق كاسىپكەرلىك سۋبەكتىلەرىنە اتالعان ءونىمنىڭ سايكەستىك دەكلاراتسياسى جوق بولعاندىقتان، ونى ساتۋعا شىعارماي تۇرا تۇرۋىن ەسكەرتۋدى ۇسىندىق، - دەدى مامان.

ول ازىرگە ونىمگە شەكتەۋ قويۋ ءۇشىن وسى دا جەتكىلىكتى، ءبىراق وعان تىيىم سالۋ ءۇشىن ەمەس ەكەنىن اتاپ ءوتتى.

ال، وزبەكستان اۋعانستاننان اكەلىنەتىن Royal سۋسىنىن قايتا تەكسەرەتىن بولدى.

اۆتور
ەركەجان سماعۇلوۆا