قىرعىزستاندا جاسىرىن بوسانۋ مەكەمەلەرىن قۇرۋ ۇسىنىلدى

قىرعىزستاندا جاسىرىن بوسانۋ ءۇشىن زاڭدى تۇردە ارنايى بولىمشەلەر قۇرۋ ۇسىنىلدى. كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋدى كوزدەيتىن ءتيىستى زاڭ جوباسى جالپىحالىقتىق تالقىلاۋعا شىعارىلدى، دەپ حابارلايدى Kazinform ءتىلشىسى.

ۇسىنىستىڭ باستاماشىسى، پارلامەنت دەپۋتاتى جىلدىز سادىربايەۆانىڭ ايتۋىنشا، زاڭ جوباسىن ازىرلەۋدىڭ ماقساتى - بالا مەن انانىڭ ءومىرى مەن دەنساۋلىعىن ساقتاي وتىرىپ، دەنساۋلىق ساقتاۋ جۇيەسىن جاڭعىرتۋ.

سونىمەن قاتار، اۋرۋحانادان تىس قاۋىپتى بوسانۋ سانىن ازايتۋعا جانە جاڭا تۋعان نارەستەسىن بەيتانىس ادامدارعا تاستاپ كەتەتىن انالارعا بالاما ۇسىنىس جاساۋعا مۇمكىندىك بەرەدى.

جاسىرىن بوسانۋ كەزىندە انانىڭ ارنايى مەكەمەدە بوسانۋ مۇمكىندىگى بار جانە ءوزىنىڭ جەكە باسىن، اتى- ءجونىن ءۇشىنشى تۇلعالاردان، ونىڭ ىشىندە بوسانۋ پروتسەسىنە قاتىساتىن مەديتسينا قىزمەتكەرلەرىنەن جاسىرا الادى.

دەپۋتات بالانى تاستاپ كەتكەن جاعدايدا قۇپيالىلىققا كەپىلدىك بەرەتىن مامانداندىرىلعان بولىمشە ءبىرقاتار ماسەلەنىڭ الدىن الۋدىڭ ءتيىمدى قۇرالى بولاتىنىن اتاپ ءوتتى.

اتاپ ايتقاندا، الەۋمەتتىك جەتىمدىك. مامانداندىرىلعان بولىمشە بالانى تاستاپ كەتۋگە شەشىم قابىلداعان ايەلدەرگە بالادان باس تارتۋدىڭ الدىن الۋ بويىنشا مامانداردىڭ تىكەلەي قولجەتىمدىلىگىن قامتاماسىز ەتەدى.

دەر كەزىندەگى كاسىبي كومەك پەن قامقورلىق ايەلدىڭ بالاسىنان باس تارتۋ شەشىمىنە تۇبەگەيلى اسەر ەتىپ، بۇل ارەكەتكە جول بەرمەيدى. ال جاڭا تۋعان بالاسىن الەۋمەتتىك قىزمەتتەر مەن قوعامدىق ۇيىمدار ارقىلى تاربيەلەۋگە بەل بۋعان ايەلگە بوسانعاننان كەيىنگى قولداۋ ءبىر كەزدەرى بالادان باس تارتۋ تۋرالى ويلانۋعا تۇرتكى بولعان قيىندىقتاردى جەڭۋگە مۇمكىندىك بەرەدى. ۇيلەردە، جەرتولەلەردە، گاراجداردا، انتيسانيتاريالىق جاعدايدا انا مەن ءسابيدىڭ ولىمىنە نەمەسە اۋرۋىنا اكەپ سوقتىراتىن قاۋىپتى بوسانۋ ماسەلەسى دە شەشىلەدى.

اۆتور

ەركەجان سماعۇلوۆا