قىرعىزستاندا بۇيرەك اۋىستىرۋ وتالارى تەگىن جاسالادى

قىرعىزستان. KAZINFORM -قىرعىزستاندا بۇيرەك ترانسپلانتاتسيالاۋ وتالارى تەگىن جاسالادى، دەپ حابارلايدى ەلدىڭ كابار اقپارات اگەنتتىگى.

قىرعىزستان رەسپۋبليكاسىنىڭ پرەزيدەنتى سادىر جاپاروۆتىڭ اگەنتتىككە بەرگەن سۇحباتىندا ايتقانىنداي، قازىر ەلدە 2,5 مىڭنان استام ازامات گەمودياليز الۋدا، ونىڭ 50 ى دونور تاۋىپ، تولىق مەديتسينالىق تەكسەرۋدەن ءوتىپ، ترانسپلانتاتسياعا دايىندالۋدا.

«مۇنداي العاشقى وتا ءساتتى ءوتتى. ەكى مەديتسينالىق بريگادا كۇنىنە 2-3 وتا جاساي الادى. اللا قالاسا، بۇدان بىلاي ءوزىمىز وتا جاسايتىن بولامىز. قۇنى 7-8 مىڭ دوللار گەمودياليزگە تۇسەتىن ناۋقاستاردىڭ بۇيرەگىن اۋىستىرۋ وتاسىن مەملەكەت وتەيدى»،- دەدى ول.

سادىر جاپاروۆ مەملەكەت وسىلايشا ەكى جەردەن ۇتادى. ءبىرىنشىسى -قىرعىزستان ازاماتتارىنا كومەك. ەكىنشىسى - شىعىنداردى ۇنەمدەۋ.

«مەملەكەت جىل سايىن گەمودياليز الاتىن ءاربىر پاتسيەنتكە 14-15 مىڭ دوللار جۇمسايدى. جىل سايىن 2,5 مىڭ ادامعا 3 ميللياردتان استام سوم بولىنەدى. دونور تاپقان ناۋقاستارعا ءوزىمىز وتا جاساساق، شىعىندى ازايتا الامىز. ناۋقاس دونوردى ءوزى تابادى، ەڭ باستىسى - گەنەتيكالىق ۇقساستىق بولۋى كەرەك. گەمودياليز الاتىن ءبىر ناۋقاسقا جىل سايىن جۇمسالاتىن قاراجاتتىڭ جارتىسىنا وتا جاساۋ ارقىلى ءبىز قالعانىن ۇنەمدەپ، كەلەسى جىلدىڭ شىعىنىن تولىقتاي ازايتا الامىز. ويتكەنى، ەگەر ناۋقاس گەمودياليز الۋدى توقتاتسا، مەملەكەت شىعىنى دا ازايادى»، - دەپ ءتۇسىندىردى قىرعىزستان باسشىسى.

بۇعان دەيىن حابارلانعانداي، بىشكەكتە انا مەن بالا ۇلتتىق ورتالىعىنىڭ ترانسپلانتولوگيا بولىمشەسى 22 جاستاعى ناۋقاسقا العاش رەت تەگىن بۇيرەك الماستىرۋ وپەراتسياسىن جاسادى.