قىرعىزستاندا 12 بالا تاتتىدەن ۋلاندى

بىشكەك. KAZINFORM - قىرعىزستاننىڭ شۋ اۋدانى يسكرا اۋىلىندا 27-قاراشادا مەكتەپ وقۋشىلارى كامپيت پەن ءتاتتى سپرەيدەن ۋلانعان، دەپ حابارلايدى Kazinform مەنشىكتى ءتىلشىسى.

شۋ وبلىسى ىشكى ىستەر باسقارماسىنىڭ مالىمەتىنشە، 27-قاراشادا توقماق قالالىق اۋرۋحاناسىنا يسكرا اۋىلىنىڭ كامەلەتكە تولماعان 12 تۇرعىنى (2012، 2009، 2008 ج. ) «تاماقتان ۋلانۋ» دياگنوزىمەن تۇسكەن. زارداپ شەككەندەرگە مەديتسينالىق كومەك كورسەتىلىپ، بارلىعى ۇيلەرىنە جىبەرىلدى. اتالعان فاكتى تىركەلىپ، تەرگەۋگە دەيىنگى تەكسەرۋ امالدارى باستالدى.

انىقتالعانداي، 12 جاستاعى 7 سىنىپ وقۋشىسى يسكرا اۋىلىنداعى قوقىس پوليگونىنان ءبىر پاكەت «BEN 10» كامپيتتەرى مەن بوتەلكەدەگى ءتاتتى سپرەيدى تاۋىپ الىپ، مەكتەپتەگى سىنىپتاستارىنا بەرگەن. ارتىنشا بالالار تاتتىلەردەن ۋلانعان. ونىمدەر تاركىلەنىپ، سوت- مەديتسينالىق ساراپتامالار تاعايىندالدى. قازىرگى تاڭدا مەكتەپ وقۋشىلارىنىڭ جاعدايى تۇراقتى دەپ باعالانىپ وتىر.

ەسكە سالا كەتسەك، 2023 -جىلدىڭ ناۋرىز ايىندا قىرعىزستاننىڭ وش وبلىسىنىڭ قارا- سۋۋ اۋدانىندا 43 مەكتەپ وقۋشىسى بەلگىسىز زاتتان ۋلانعان بولاتىن. الدىن الا مالىمەت بويىنشا، وقۋشىلاردىڭ ءبىرى ءاتىر سەۋىپ، سودان كەيىن وقۋشىلار اۋىرىپ قالعان.