قىرعىزستان ينتيم قىزمەت كورسەتەتىن ورىنداردىڭ ءبارىن جاپپاق

وسى جىلدىڭ 1-جەلتوقسانىنان باستاپ قىرعىزستاندا ينتيم قىزمەت كورسەتەتىن بارلىق ورىننىڭ جۇمىسىنا تىيىم سالىنادى. بۇل تۋرالى قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ باسشىسى قامشىبەك تاشيەۆ ءمالىم ەتتى، دەپ حابارلايدى Kazinform.

ايتا كەتەرلىگى، كەشە ىستىقكول وبلىسىنىڭ بالىقشى قالاسىندا ۇلتتىق قاۋىپسىزدىك مەملەكەتتىك كوميتەتىنىڭ قالالىق اكىمشىلىگىنىڭ جاڭا عيماراتى اشىلعان بولاتىن.

ونىڭ اشىلۋ سالتاناتىنا كوميتەت باسشىسى قامشىبەك تاشيەۆ قاتىسىپ، ۆەدومستۆو قىزمەتكەرلەرىنە ءبىرقاتار مىندەت جۇكتەدى.

ونىڭ اتاپ وتۋىنشە، ازاماتتارعا ينتيم قىزمەت كورسەتەتىن ءتۇرلى كوڭىل كوتەرۋ ورىندارىن، مونشا كەشەندەرىن ۇيىمداستىرۋداعى زاڭعا قايشى ءىس-ارەكەتتەردىڭ الدىن الۋداعى مەمورگانداردىڭ قىزمەتىنە باقىلاۋ جاساۋ - كوميتەت قىزمەتكەرلەرىنىڭ باسىم مىندەتتەرىنىڭ ءبىرى بولماق.

وسىعان وراي قامشىبەك تاشيەۆ مەملەكەتتىك جانە جەرگىلىكتى ورگاندارعا، قۇقىق قورعاۋ ورگاندارىنىڭ باسشىلارىنا مۇنداي ورىنداردىڭ جۇمىسىن رەسپۋبليكانىڭ بۇكىل اۋماعىندا 2023 -جىلدىڭ 1-جەلتوقسانىنا دەيىن توقتاتۋدى تاپسىردى.

ۇ ق م ك باسشىسىنىڭ اتاپ وتۋىنشە، ينتيمدىك قىزمەت كورسەتەتىن ورىننىڭ ودان ارى جۇمىس ىستەپ تۇرعانى جايلى اقپارات تۇسكەن جاعدايدا جەرگىلىكتى ءوزىن-ءوزى باسقارۋ ورگاندارىنىڭ جانە قۇقىق قورعاۋ ورگاندارىنىڭ باسشىلارى قىزمەتىنەن بوساتىلادى.