قىرعىزستان ازاماتتارىنا ا ق ش-قا كىرۋگە تىيىم سالىنۋى مۇمكىن
بىشكەك. KAZINFORM - دونالد ترامپ اكىمشىلىگى تاعى 36 ەلدىڭ، سونىڭ ىشىندە قىرعىزستان ازاماتتارىنىڭ ا ق ش- قا كىرۋىنە شەكتەۋ قويۋدى قاراستىرىپ وتىر. بۇل تۋرالى Washington Post حابارلادى.
ۆيزا بەرىلۋىنە تىيىم سالىنۋى نەمەسە باسقا شەكتەۋلەرگە ۇشىراۋى مۇمكىن ەلدەردىڭ جاڭا تىزىمىنە انگولا، انتيگۋا جانە باربۋدا، بەنين، بۋتان، بۋركينا-فاسو، كابو- ۆەردە، كامبودجا، كامەرۋن، كونگو دەموكراتيالىق رەسپۋبليكاسى، دجيبۋتي، دومينيكا، ەفيوپيا، مىسىر، گابون، گامبيا، گانا، قىرعىزستان، ليبەريا، مالاۆي، ماۆريتانيا، نيگەر، نيگەريا، سەنت-كيتس جانە نيەۆيس، سەنت-ليۋسيا، سان- تومە جانە پرينسيي، سەنەگال، وڭتۇستىك سۋدان، سيريا، تانزانيا، تونگا، تۋۆالۋ، ۋگاندا، ۆانۋاتۋ، زامبيا جانە زيمبابۆە كىردى.
قۇجاتقا مەملەكەتتىك حاتشى ماركو رۋبيو قول قويىپ، 14-ماۋسىمدا ەلدەرمەن جۇمىس ىستەيتىن امەريكالىق ديپلوماتتارعا جىبەرىلدى. وندا اتالعان ەلدەردىڭ ۇكىمەتتەرىنە مەملەكەتتىك دەپارتامەنت بەلگىلەگەن جاڭا كورسەتكىشتەر مەن تالاپتاردى ورىنداۋ ءۇشىن 60 كۇن بەرىلگەنى ايتىلعان. ىشكى حاتتا ترامپ اكىمشىلىگى ەلدەردىڭ ورىنداي الماعانىن باعالاعان ءارتۇرلى كورسەتكىشتەر انىقتالدى.
قىرعىز رەسپۋبليكاسىنىڭ سىرتقى ىستەر مينيسترلىگى ا ق ش ەلشىلىگىنىڭ قىرعىز رەسپۋبليكاسىنداعى كونسۋلىن ا ق ش- تىڭ ءبىرقاتار ەلدەردىڭ، سونىڭ ىشىندە قىرعىز رەسپۋبليكاسىنىڭ ازاماتتارى ءۇشىن كىرۋگە شەكتەۋلەر ەنگىزۋ مۇمكىندىگى تۋرالى رەسمي تۇسىنىكتەمەلەر بەرۋگە شاقىرادى.
- قازىرگى كەزدە ا ق ش- تا قاۋىپسىزدىكتى قامتاماسىز ەتۋگە جانە شەتەلدىك ازاماتتاردىڭ كىرۋىن رەتتەۋگە باعىتتالعان ميگراتسيالىق زاڭنامانى قايتا قاراۋ جالعاسىپ وتىر. قازىرگى ساتتە امەريكالىق تاراپتان قىرعىز رەسپۋبليكاسىنىڭ ازاماتتارىنا قاتىستى قانداي ءدا بىر شەكتەۋلەر ەنگىزىلگەنى تۋرالى رەسمي اقپارات تۇسكەن جوق. سونىمەن بىرگە قىرعىز رەسپۋبليكاسى ءۇشىن The Washington Post باسىلىمىندا كورسەتىلگەندەي ازاماتتارى شەكتەۋلەرگە ۇشىراۋى مۇمكىن ەلدەردىڭ ءتىزىمى قانداي كريتەريلەر بويىنشا قۇرىلاتىنى تۋرالى تۇسىنىكسىز كۇيدە قالىپ وتىر، - دەلىنگەن ۆەدومستۆو حابارلاماسىندا.
بۇعان دەيىن قىرعىزستان زاڭسىز كوشى-قونعا قارسى كۇرەستى كۇشەيتكەنىن جازعان بولاتىنبىز.
