قىرعىز پرەزيدەنتىنىڭ استاناعا ساپارى اياسىندا تاريحي كەلىسىمگە قول قويىلادى - توقايەۆ

استانا. KAZINFORM - قازاق-قىرعىز قارىم- قاتىناسى ستراتەگيالىق سەرىكتەستىك رۋحىندا دامىپ كەلە جاتىر. بۇل تۋرالى اقوردادا قىرعىزستان پرەزيدەنتى سادىر جاپاروۆپەن كەلىسسوز بارىسىندا مەملەكەت باسشىسى قاسىم-جومارت توقايەۆ ايتتى.

«ەڭ الدىمەن، شاقىرۋىمدى قابىل الىپ، قازاقستانعا رەسمي ساپارمەن كەلگەنىڭىز ءۇشىن سادىر نۋرگوجويەۆيچكە شىنايى العىسىمدى ايتامىن. مەن بۇل ساپارعا ەرەكشە ءمان بەرىپ وتىرمىن. قىرعىزستان - ءبىز ءۇشىن باۋىرلاس ەل، ماڭىزدى ءارى سەنىمدى سەرىكتەس. حالىقتارىمىزدىڭ مىزعىماس دوستىعى ورتاق تاريحقا جانە رۋحاني قۇندىلىقتارعا نەگىزدەلگەن. وسىنداي باستاۋى بار قازاق-قىرعىز قارىم-قاتىناسى ستراتەگيالىق سەرىكتەستىك رۋحىندا دامىپ كەلە جاتىر»، - دەدى قاسىم-جومارت توقايەۆ.

بۇل تۇرعىدا مەملەكەت باسشىسى ەكى ەل وداقتاستىق بايلانىستى نىعايتۋدى قولعا العانىن اتاپ ءوتتى.

«بۇگىن ءبىز تاريحي كەلىسىمگە قول قويامىز. وسى ماڭىزدى قۇجات قازاق-قىرعىز قاتىناستارىنىڭ دامۋىنا تىڭ سەرپىن بەرەتىنىنە ەشقانداي كۇمان جوق. سوندىقتان ۇلكەن ۇمىتپەن قاراپ وتىرمىز. وعان ءبىزدىڭ مۇمكىندىگىمىز دە، ىنتا-جىگەرىمىز دە جەتكىلىكتى. جوعارعى مەملەكەت ارالىق كەڭەستىڭ وتىرىسى ىنتىماقتاستىق اياسىن كەڭەيتۋگە جول اشادى دەپ سانايمىز»، - دەدى قازاقستان پرەزيدەنتى.

اۆتور

رۋسلان عابباسوۆ