قىرعىز رەسپۋبليكاسى بيىل قازاقستانعا 600 ميلليون تەكشە مەتردەن استام سۋ جىبەرەدى
استانا. KAZINFORM - سۋارۋ ماۋسىمى باستالعان ءساۋىر ايىنىڭ وزىندە-اق 45 ميلليون تەكشە مەتر سۋ بەرىلدى. ءساۋىر ايىنىڭ سوڭىنان باستاپ قىرعىز رەسپۋبليكاسى قازاقستانعا تالاس وزەنى ارقىلى تاعى 400 ميلليون جانە شۋ وزەنى ارقىلى 180 ميلليون تەكشە مەتر سۋ جىبەرەدى.
بۇل تۋرالى سۋ رەسۋرستارى جانە يرريگاتسيا مينيسترلىگى حابارلادى.
ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن قىرعىز رەسپۋبليكاسىنىڭ مينيسترلەر كابينەتى ءتوراعاسىنىڭ ورىنباسارى - سۋ رەسۋرستارى، اۋىل شارۋاشىلىعى جانە قايتا وڭدەۋ ونەركاسىبى ءمينيسترى باقىت توروبايەۆ شۋ جانە تالاس وزەندەرىندەگى مەملەكەتارالىق سۋ شارۋاشىلىعى قۇرىلىمدارىن پايدالانۋ جونىندەگى قازاق-قىرعىز كوميسسياسىنىڭ 35- وتىرىسىندا وسى جونىندە كەلىسىمگە كەلدى.
بۇل سۋ جامبىل وبلىسىنداعى اۋىل شارۋاشىلىعى القاپتارىن سۋارۋعا جۇمسالادى. سونىمەن قاتار تاراپتار قورشاعان ورتانى قورعاۋ جانە سۋ ساپاسىن باقىلاۋ بويىنشا بىرلەسكەن جۇمىس توبىنىڭ قىزمەتىن تالقىلادى.
وتىرىسقا سونداي-اق سىرتقى ىستەر مينيسترلىگى، توتەنشە جاعدايلار مينيسترلىگى، ەكولوگيا جانە تابيعي رەسۋرستار مينيسترلىگى مەن جامبىل وبلىسى اكىمدىگى وكىلدەرى قاتىستى.
كوميسسيانىڭ تەڭ ءتوراعالارى - ق ر سۋ رەسۋرستارى جانە يرريگاتسيا ۆيتسە- ءمينيسترى نۇرلان الدامجاروۆ جانە قىرعىز رەسپۋبليكاسىنىڭ سۋ رەسۋرستارى قىزمەتىنىڭ ديرەكتورى، مينيستر ورىنباسارى نۇرلان جۇمايەۆ.
- بىلتىر قىرعىز ارىپتەستەرىمىزبەن بىرلەسكەن جۇمىستىڭ ارقاسىندا جامبىل وبلىسىنىڭ ديقاندارىن سۋارمالى سۋمەن تولىق قامتاماسىز ەتتىك. مىسالى، تالاس وزەنى ارقىلى قازاقستانعا جوسپارلانعان 380 ميلليون تەكشە مەتردىڭ ورنىنا 418 ميلليون تەكشە مەتر سۋ كەلدى. ال شۋ وزەنى ارقىلى 165,3 ميلليون تەكشە مەتر سۋ كەلدى، بۇل ءبىر جىل بۇرىنعى كولەممەن سالىستىرعاندا 29,7 ميلليونعا ارتىق، - دەدى ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ايتا كەتەيىك، مينيستر بۇعان دەيىن جاڭا سۋ كودەكسى مەن وعان قاتىستى زاڭ جوبالارىن ازىرلەۋ بارىسىندا بەلسەندىلىك تانىتقانى ءۇشىن ءماجىلىس دەپۋتاتتارىنا العىس ءبىلدىردى.
- قۇجات 10-ماۋسىمنان باستاپ كۇشىنە ەنەدى. سوندىقتان جاڭا سۋ زاڭناماسىندا قويىلعان مىندەتتەردى ءتيىمدى ىسكە اسىرۋدى قامتاماسىز ەتۋىمىز كەرەك، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
