قىرعي-قاباق سوعىس قايتا ورالدى ما

استانا. KAZINFORM - ناتو-عا مۇشە ەلدەر مىڭداعان اسكەري قىزمەتكەرى مەن تەحنيكاسىن جۇمىلدىردى. پولشادا «ايداھار-24» اتتى ەڭ ءىرى اسكەري جاتتىعۋلار ءوتىپ جاتىر.

وعان قاتىسۋشىلار جەردە، اۋەدە، تەڭىزدە جانە كيبەركەڭىستىكتە جاۋىنگەرلىك تاكتيكالىق بىلىمدەرىن جەتىلدىرەدى، تاجىريبەسىن مولايتادى. سەبەبى شىعىس ەۋروپاداعى جاعداي شيەلەنىسە ءتۇستى. ناتو اليانسقا مۇشە ەلدەردى جانە قۇندىلىقتارىن قورعاپ، ەۋرواتلانتيكالىق ايماقتا ۇجىمدىق قاۋىپسىزدىكتى ساقتاعىسى كەلەدى، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.

بريتان اسكەرىنىڭ جۇك كولىكتەرى گەرمانيانىڭ سەننەلاگەر ەلدى مەكەنىندەگى جاتتىعۋ پوليگونىنان پولشاعا بەت الدى. شامامەن 600 دەي ءىرى اسكەري تەحنيكا. ولار ءبىر ەلدەن ەكىنشى ەلگە جىلدام جەتە الاتىن قاۋقارى بار ەكەنىن كورسەتىپ جاتىر. بريتان اسكەريلەرى تۇماندى البيوندا جۇرگەندە-اق جاۋىنگەرلىك دايىندىقتارىن پىسىقتاعان. كولىكتەرىن كەمەگە تيەپ، ەندى قۇرلىق ارقىلى جاتتىعۋلار وتەتىن جەرگە جەتۋلەرى كەرەك.

«اسكەري وپەراتسيانىڭ اۋقىمى كەڭ. سوڭعى 20 جىلدا وتكىزىلگەن جاتتىعۋلاردان الدەقايدا ۇلكەن. تاجىريبە جيناۋ ءۇشىن ارەكەت ەتىپ جاتىرمىز. دابىل جاريالانعان كەزدە ءبارى ءساتتى ءوتۋى كەرەك. البەتتە، الداعى بىرنەشە اپتا كولەمىندە قاتەلىكتەرگە جول بەرۋىمىز مۇمكىن. ءبىراق ولار بارىمىزگە ساباق بولادى، دەپ الدىن الا قامدانىپ جاتىرمىز»، - دەيدى كورولدىك انگليا پولكىنىڭ مۇشەسى سايمون كوكس.

ۇلى بريتانيا مەن ا ق ش-تان بولەك ناتو-نىڭ باسقا دا وداقتاس 31 ەلىنەن شامامەن 90000 جاۋىنگەر مەن تەحنيكا تارتىلىپ وتىر. بۇل قىرعي قاباق سوعىس اياقتالعالى ناتو اليانسىنىڭ وتكىزىپ جاتقان ەڭ ءىرى شاراسى. جاتتىعۋلار مامىر ايىنا دەيىن جالعاسادى. ول اتلانتيكادان باستاپ، ناتو- نىڭ شىعىس قاناتىنا دەيىنگى اۋماقتى قامتىماق. ماقساتى «كۇشى شامالاس جاۋمەن» قاقتىعىسقا دايىندالۋ.

«پولشا قورعانىس سالاسىن نىعايتۋ ءۇشىن باتىل جوسپارلار قۇردى. امەريكا قاۋىپسىزدىك بويىنشا ءبىزدىڭ ماڭىزدى سەرىكتەسىمىز ەكەندىگى قۋانتادى. ءبىز ناتو سامميتتەرىندە بەرگەن ۋادەلەرىمىزدە تۇردىق. مەنىڭ ويىمشا، ءبىز قازىر سولتۇستىك اتلانتيكالىق شارت اسىندا قورعانىسقا بارىنەن دە كوپ قاراجات قۇيىپ جاتىرمىز. وسىلايشا باسقالارعا ۇلگى بولعىمىز كەلەدى» - دەيدى پولشا سىرتقى ىستەر ءمينيسترى رادوسلاۆ سيكورسكي.

سولتۇستىك اتلانتيكالىق كەلىسىم ۇيىمى، ياعني ناتو باستاعان اسكەري جاتتىعۋلار بەيبىتشىلىكتىڭ ءبىتىپ، قىرعي قاباق سوعىستىڭ قايتا باستالعانىن كورسەتەدى. ساراپشىلار وسىلاي دەيدى. ءبىرىنشى قىرعي-قاباق سوعىس وتكەن عاسىردىڭ قىرقىنشى جىلدارى باستالىپ، الەمنىڭ بارلىق بۇرىشىن قامتىعانى بەلگىلى. سوتسياليستىك بلوك پەن ا ق ش باستاعان باتىستىق دەموكراتيا اراسىنداعى كەلىسپەۋشىلىك 40 جىلدان استام ۋاقىتقا سوزىلدى. قازىر ول قايتا اينالىپ كەلگەنگە ۇقسايدى.

«مۇنداي ءىرى جاتتىعۋلار، اسىرەسە كورشىلەس ەلدىڭ شەكاراسىنا جاقىن وتكىزىلسە، ناعىز ارانداتۋ بولۋى مۇمكىن. بىتپەيتىن ينفلياتسيا، سىرتقى ساۋدا سۇرانىسىنىڭ السىزدىگى، كورشى ەلدەرمەن ءجيى بولاتىن گەوساياسي قاقتىعىستار كوپشىلىكتى شارشاتتى. حالىقتىڭ نازارىن باسقا ارناعا اۋدارۋ ءۇشىن ەۋروپا مەن ا ق ش قارۋلى كۇشتەرىن كورسەتىپ جاتىر»، - دەيدى دجون فون نەيمان ۋنيۆەرسيتەتى ەۋرازيالىق ورتالىعىنىڭ ديرەكتورى لەۆەنتە حورۆات.

ساراپشىلاردىڭ پىكىرىنشە، ناتو ءوزىنىڭ الەمدى بيلەپ-توستەي الاتىندىعىن جاريا ەتۋگە تىرىسىپ باعۋدا. باتىس ەلدەرىنىڭ گەگەمونيالىق بولىگى دۇنيەجۇزىندەگى جەتەكشى ءرولىن جوعالتۋدان قورقادى-مىس. ەكونوميكالىق تۇرعىدا السىرەگەن مەملەكەتتەر اسكەري مىقتىلىعىن پاش ەتكىسى بار.

«ناتو ۇشاقتار مەن تانكىلەر ساتىپ الۋعا ءماجبۇر ەكەندىگىن دالەلدەپ، حالىقتى سەندىرۋ ءۇشىن جىل سايىن ۇگىت-ناسيحاتقا ميلليونداعان ەۋرو جۇمساپ جاتىر. ول - سالىق تولەۋشىلەردىڭ ماڭداي تەرىمەن كەلگەن اقشا. ونىڭ ورنىنا قوعامدىق كولىك پەن پويىز ساتىپ الىپ، اۋرۋحانالار مەن مەكتەپتەر تۇرعىزسا بولادى عوي. ناتو، دەموكراتيا، بوستاندىق جانە قاۋىپسىزدىك تەڭ ۇعىمدار ەمەس. ناتو- سىز دا الەم جاقسىراق»، - دەيدى بەلگيا پارلامەنتىنىڭ بۇرىنعى دەپۋتاتى لودە ۆانووست.

قالاي بولعاندا دا بۇكىل ەۋرو وداق بويىنشا قورعانىس شىعىندارى جىلدام ءوسىپ جاتىر. ناتو- نىڭ باس حاتشىسى يەنس ستولتەنبەرگ بيىلعى جىلى اليانسقا مۇشە 31 مەملەكەتتىڭ 18 ى جالپى ىشكى ءونىمىنىڭ 2 پايىزىن نەمەسە ودان دا كوپ بولىگىن قورعانىس سالاسىنا جۇمسايتىنىن مالىمدەگەن. بۇل ون جىل بۇرىنعى ۋاقىتپەن سالىستىرعاندا التى ەسە كوپ.

اۆتور
عالىمجان قارامان ۇلى