قىمىزدى قازاق سۋسىنى رەتىندە پاتەنتتەۋ مۇمكىن ەمەس - ادىلەت مينيسترلىگى
قىمىزدى قازاق سۋسىنى رەتىندە پاتەنتتەۋ مۇمكىن ەمەس. بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي ايتتى، دەپ حابارلايدى Kazinform.
«ۇلتتىق ءوتىنىم بەرۋشىلەرىمىز دە ءداستۇرلى ونىمدەرگە، سونىڭ ىشىندە شۇبات، قۇرت، قازى، ەت قامىرى جانە تاعى باسقالارى بويىنشا سوڭعى تەحنولوگيالاردى پاتەنتتەپ الدى. قىمىزدى تەك قازاقستاندىق سۋسىن دەپ پاتەنتتەپ الۋ مۇمكىن ەمەس. بۇعان دەيىن الماتىنىڭ اپورتىن «گەوگرافيالىق كورسەتكىش» رەتىندە شىعۋ تەگى الماتى ەكەندىگىن بەكىتىپ العانىمىزدى ايتقان ەدىك. ياعني، اپورتتىڭ الماتى توڭىرەگىندە وسەتىندىگىن راستاۋعا بولادى. ال بيەنىڭ ءسۇتى، قىمىزى الەمدە وندىرىلەتىن ءونىم بولعاندىقتان ونى تەك قازاقستانعا عانا ءتان دەپ ايتۋ ورىنسىز بولادى»، - دەدى تالعات ءۋالي ەلوردادا وتكەن بريفينگ بارىسىندا.
ت. ءۋالي گەرمانيادا قىمىزعا ەمەس، ونى ءوندىرۋ ادىستەرىنە عانا پاتەنت بار ەكەندىگىن ءمالىم ەتتى.
«قازىر قوعامدا ءداستۇرلى سۋسىنىمىز - قىمىزعا قاتىستى الىپ- قاشپا اڭگىمەلەر كوپ. ءتىپتى كەيبىر اقپارات قۇرالدارىندا قىمىزدى گەرمانيا پاتەنتتەپ الىپتى دەگەن اڭگىمە دە بار. وسى ورايدا گەرمانيادا قىمىز بەن بيە سۇتىنە، ياعني ساۋمالعا ەشكىم پاتەنت الماعانىن اتاپ وتكىم كەلەدى. ءيا، شىنىندا دا، گەرمانيادا پاتەنتتەر بار، ءبىراق قىمىزعا ەمەس، ونى ءوندىرۋ ادىستەرىنە عانا. قىمىز گەرمانيانىكى دەگەن تۇسىنىك ەش ۋاقىتتا بولمايدى. ويتكەنى، قىمىز تەك قازاقستاندا ەمەس، ورتالىق ازيا ەلدەرىندە وندىرىلەدى. ول ءبىر ەلدىڭ ءونىمى دەپ پاتەنتتەلمەيدى»، - دەدى تالعات ءۋالي.
رەسمي وكىلدىڭ اتاپ وتۋىنشە، گەرمانيادا قىمىزدىڭ قۇرعاق ۇنتاعىنان كاپسۋلا نەمەسە تۇيىرشىكتەلگەن تۇرلەرىن جاساۋعا پاتەنت بەرىلگەن.
«ال قازاقستاندا ۇلتتىق ءوتىنىم وندىرۋشىلەرگە قىمىزدىڭ وزىنە ەمەس، تابلەتكاداعى قىمىزعا، سونداي- اق كەپتىرىلگەن بيە سۇتىنە، ياعني ءوندىرۋ ادىستەرىنە پاتەنت بەرىلدى»، - دەدى ول.
اۆتور
مارلان جيەمباي
