قىمىزدىڭ ءوزىن شەتەلدەن الدىرۋعا كوشىپپىز

استانا. قازاقپارات - باسقانى ايتپاي-اق قويايىق، قىمىزدىڭ ءوزىن شەتەلدەن الدىرۋعا كوشىپپىز. بىلتىر ەلگە 4 مىڭ توننادان اسا قىمىز كىرگەن، دەپ حابارلايدى 24KZ.

ونىڭ باسىم بولىگى رەسەيدەن جەتكىزىلىپتى. ول جاقتا باشقۇرت اعايىندار بار. قىرعىز اعايىنداردان دا الاتاۋدان اسىپ 500 توننادايى كەلىپتى. ءتىپتى بەلارۋستار دا بىزگە 2 توننا قىمىز بەرىپ جىبەرگەن. ءسويتىپ، سىرتتان قانداي قىمىز كەلىپ جاتىر؟ وزىمىزدىكىن نەگە مەنسىنبەي قالدىق؟ وزگەگە قول جايۋىمىزدىڭ ءجونى قالاي؟

قىمىزدىڭ بىرنەشە ءتۇرى بار. بال قىمىز، قۇنان قىمىز، دونەن قىمىز دەپ جىلىكتەپ جاتامىز. دايىنداۋ تاسىلىنە، ۋاقىتىنا قاراي اتالادى. ال قازىر ءىشىپ جۇرگەنىمىز قاي قىمىز؟ كەيدە قالاداعى اعايىننىڭ ساتىپ العان سۋسىنعا كوڭىلى تولماي جاتاتىنى راس.

بليتس:

- اۋىل جاقتان جىبەرگەندى عانا ىشەسىز بە؟

- ءيا، قاتونقاراعايدىكىن عانا ىشەمىن.

- كوپ جەردەن تازا قىمىزدى تاپپايسىڭ.

- مەن ءوزىم تۇراقتى الىپ جۇرەتىن جاقسى قىمىزىم بار، وسى سوفيەۆكادا ءبىر اعامىز بار. سول كىسىنىكى قىستا بولماي قالادى. ايتپەسە، ءىشىپ تۇرامىز.

ارينە، اركىمنىڭ تالعامى ءارتۇرلى. ونىڭ ۇستىنە قازىرگى نارىق زامانىندا بابالارىمىزدان قالعان ءتارتىپتى ساقتاۋعا ۋاقىت تا تار شىعار. دەگەنمەن، ماماندار قىمىزدىڭ بابىن كەلتىرۋ ءۇشىن تابيعي بۇيىمداردى قولدانۋ كەرەك دەيدى.

ايتۋعان مۇقاشيەۆ كاسىپكەر:

- تاپ-تازا قىمىزدى ءىشىپ كورىڭىز دە، ءبىر كۇننەن كەيىن بوتەلكەدەگى قىمىزدى ءىشىپ كوردىڭىز بە، قانداي ءدام بەرەدى؟ سەبەبى ول رەاكسياعا تۇسكەندە انا پلاستماسسىنىڭ بويىنداعى ءدامدى وزىنە تارتىپ الادى. قىمىزدىڭ نازىك جەرى وسىنداي، ءسىز جاي عانا توڭازىتقىش، مۇزداتقىشتىڭ ىشىنە قىمىزدى قويىپ قويىڭىزشى، ول قاسىندا تۇرعان ەت، ماي، ءبارىنىڭ ءدامىن وزىنە تارتىپ الادى.

اۋىلدىق جەرلەردە، مىسالى جاڭاارقانى ايتىپ جاتىرمىز، قىمىز مادەنيەتى ساقتالىنعان جەرلەردە ولار كۇبىدە ىستاپ وتىر. سول ءۇشىن قىمىز جاقسى.

ەرجان جاۋباي، Argymaq.kz سايتىنىڭ باس رەداكتورى:

- پلاستماسسىدا ساقتالعان، 5 ليترلىك تورسىقتاردا ساقتالعان قىمىزدى شاما كەلگەنشە الماي-اق قويعان دۇرىس. ويتكەنى اۋزى مىقتى ۇزاققا ساقتالادى دەيدى دە، گازىن شىعارىپ-شىعارىپ، 5 ليترلىك باكلاشكا دەيمىز عوي، سولارعا قۇيىپ ساقتايدى. بۇل ەندى جوقتىڭ امالى. شاما كەلسە، جىلىعىپ وراپ، كۇبىگە ساقتاسىن، بولماسا، ساباعا ساقتاسىن. ەندى تەرى سابا تابىلماسا، برەزەنت بار. قىمىز ساقتاۋ ءۇشىن سونى تاۋىپ السا، 200 ليرتلىك مەس جاساپ قويىپ، جىلىلاپ، ادەمىلەپ، قويدىڭ جاباعى جۇنىمەن تونعا وراپ ساقتاسا.

بىلتىر رەسەيگە 2760 توننا قىمىز ەكسپورتتالدى. ال، يمپورت كولەمى ەكى ەسە ارتىق. ونىڭ ىشىندە رەسەي مەن قىرعىزستاننىڭ ۇلەسى جوعارى. بۇلاردىڭ باسىم بولىگى قۇتىداعى قىمىز. دەگەنمەن، دۇكەندە تۇرعان قىمىزدىڭ ءبارى تابيعي ءونىم دەۋگە كەلمەيدى. دامدەۋىش قوسىپ، ءدامىن قىمىزعا ۇقساتىپ قوياتىندار كوپ.

ماماندار، اسىرەسە، سىرتتان كەلگەن قىمىزدى العاندا ابايلاۋعا كەڭەس بەرەدى.

قىمىز ەكسپورتى رەسەي - 2760 توننا

قىمىز يمپورتى رەسەي - 4279 توننا

قىرعىزستان - 521 توننا

بەلارۋس - 2 توننا

ايتۋعان مۇقاشيەۆ، كاسىپكەر:

- مەن ءدامىن كورگەن بەتتە بىردەن ايتقام، مىناۋ ەشقانداي جىلقىنىڭ ءسۇتى ەمەس دەپ. ونىڭ قۇرامىندا ەڭ قۇرىعاندا %5-10 بيە ءسۇتى دە جوق. ول جەردە جەڭىلدەتىلگەن سيىر ءسۇتى دەيدى، كەپكەن بيە ءسۇتى. ول بىلايشا ايتقاندا، بەلارۋستەن كەلىپ تۇرعان %1- تىك سيىر سۇتىنەن ءبىزدىڭ مىنا تاندەم دەگەن سۋسىندى جاسايدى عوي، سوعان «مەد» دەپ قويادى عوي الگى، كۆاس، مەدوۆىي كۆاس دەپ، سول ەكەۋىن ءبىر- بىرىنە ارالاستىرىڭىز دا ءىشىڭىزشى. ەكەۋىنىڭ قۇرامىندا كونسەنترات بولعاننان كەيىن ادام ءبىر ىشكەننەن كەيىن توقتاماي ىشە بەرگىسى كەلەدى. ويتكەنى ول اشىتىلعان ءسۇت، ونىڭ ەشقانداي دەنساۋلىققا پايداسى جوق. قىمىزعا ءسۇت نەمەسە سۋ قوسىلعانىن تۇسىنە قاراپ ايىرۋعا بولادى. ول ءۇشىن ءدامىن تاتۋدىڭ قاجەتى جوق.

«تازا قىمىز كوگەرىپ تۇرادى»، - دەيدى مامان.

ەرجان جاۋباي، Argymaq.kz سايتىنىڭ باس رەداكتورى:

- مىنا قىمىزعا ءتۇرلى قوسپا قوسىپ، جاڭاعى مىنا «تاڭ» دەگەن «تاندەم» دەگەن سەكىلدى، سودان كەيىن كۇرىشتىڭ سۋىن قوساتىندار بار، ەشكىنىڭ ءسۇتىن قوساتىندار بار. بىردەن بايقاۋعا بولادى ءسۇت قوسقان قىمىز سارعىش بولادى. مىسالى، شۇباتتى كورسەڭىزدەر اپپاق بولادى. ال، قىمىزبەن شۇباتتى قاتار قويعان كەزدە قىمىز كوكشىلدەۋ بولادى. ال، سيىردىڭ سۇتىمەن قىمىزدى قاتار قويعان كەزدە قىمىز اپپاق، سيىردىڭ ءسۇتى سارعىشتاۋ بولادى. سوندا قىمىز، مىنا ءسۇت قوسقان قىمىز سارعىش بوپ تۇرادى. ول بىردەن بىلىنەدى. ال، قىمىزدىڭ ءوزى كوكشىلدەۋ بولادى.

قىمىزدى كوبىرەك ءپىسۋ قاجەت. ماماندار كۇبىنى ارشا، قايىڭ مەن ۇيەڭكىدەن جاساعان ءجون دەيدى. ال شىنى ىدىسقا بويىنداعى گاز ابدەن سەيىلگەن سوڭ قۇيۋ كەرەك. سەبەبى ۋاقىت وتە ىشتەگى گاز شولمەكتى جارىپ جىبەرۋى مۇمكىن.

24.kz