قىمىز گەرمانيادا ەمدىك تۇرعىدان سۇرانىسقا يە - نەمىس كاسىپكەرى
استانا. KAZINFORM - حانس تسولمان - نەمىس كاسىپكەرى، فەرمەر، بيە سۇتىنەن جاسالعان قۇرعاق (سۋبليماتسيالانعان) ونىمدەر، قىمىز جانە بيە ءسۇتى نەگىزىندەگى كوسمەتيكا ءوندىرۋشى.
شەتەلدىك مەيمان استانادا ءوتىپ جاتقان «BaiQymyz» ۇلتتىق تاعامدار گاستروفەستيۆالىنە ارنايى كەلگەن. وسى ورايدا Kazinform ءتىلشىسى قىمىزدى كاسىپ ەتكەن شارۋا يەسىمەن تىلدەسكەن ەدى.
- قىمىزدى گەرمانياعا العاش اكەلگەن مەنىڭ قايىن اتام، ناقتى ايتقاندا 1959-جىلى قازاقستاننان قىمىز الىپ بارعان. ءقازىر ءبىزدىڭ قىمىز وندىرەتىن كاسىپورىن 66 جىل جۇمىس ىستەپ تۇر، كاسىپورىن جۇمىسىن ودان ءارى ىلگەرىلەتە بەرەمىز. گەرمانيادا قىمىزعا سۇرانىس بار، اسىرەسە ەمدىك تۇرعىدان. نەمىستەر قىمىزدى تابيعي ءونىم رەتىندە، دەنساۋلىعىن قالپىنا كەلتىرۋگە تۇتىنادى، - دەدى حانس تسولمان.
كاسىپكەردىڭ ايتۋىنشا، نەمىس حالقى قىمىزدىڭ مايلى بولعانىن قالامايدى، سوندىقتان قىمىز بىرنەشە رەت وڭدەۋدەن وتەدى.
- ءبىز قىمىزدى ساۋا سالىپ، سول كۇيىندە ۇسىنبايمىز، ول وڭدەلەدى. سونداي-اق نەمىستەر ءۇشىن قىمىز كۇندىز تۇتىناتىن تاعام قاتارىنا جاتپايدى، ونى كەشكە قاراي ىشەدى. باعاعا كەلسەك، ءبىر ليتر قىمىز 15 ەۋرو تۇرادى. ءبىز ايىنا 2-3 مىڭ ليتر قىمىز وندىرەمىز. تاعى ءبىر ايتا كەتەتىن جايت، بىزدە قىمىز ۇنتاق تۇرىندە دە ساتىلادى. ءبىزدىڭ كليەنتتەر قاتارىندا، نەمىس حالقىنان بولەك، گەرمانياداعى قازاقستاندىقتار ءبىزدىڭ فەرماعا كەلىپ قىمىز ىشەدى، ودان بولەك گەرمانياداعى قازاقستاندىق ەلشىلەر ءبىزدىڭ تۇراقتى قوناعىمىز، - دەيدى نەمىس كاسىپكەرى.
حانس تسولمان باسقاراتىن ميۋلبەن قالاسىنداعى فەرما - گەرمانياداعى قىمىز وندىرۋگە ماماندانعان ەڭ ءىرى ءارى كونە كاسىپورىن. وسى ورايدا كاسىپكەر ءوزىن قىمىز وندىرۋمەن اينالىساتىن ەكىنشى بۋىن وكىلى دەپ سانايدى.
ايتا كەتەيىك، حانس تسولمان ەلوردادا ءوتىپ جاتقان قىمىز فەستيۆالى اياسىندا ۇيىمداستىرىلعان عىلىمي كونفەرەنتسيادا بايانداما جاسادى. ول جەردە قىمىزدىڭ ەمدىك قاسيەتتەرى، جىلقى شارۋاشىلىعى مەن ءداستۇرلى مال شارۋاشىلىعىنىڭ دامۋ بولاشاعى تالقىلاندى. عىلىمي كونفەرەنتسياعا گەرمانيا، رەسەي، قىرعىزستاننان كەلگەن عالىمدار، دارىگەرلەر، ۆەتەرينارلار مەن كاسىپكەرلەر قاتىستى.
ەسكە سالساق، كەشەدەن بەرى ەلوردادا «BaiQymyz» ۇلتتىق تاعامدار گاستروفەستيۆالى وتىپ جاتىر.
قازىر قىمىز وندىرۋشىلەر «ەڭ ۇزدىك قىمىز» اتاعى ءۇشىن تالاسىپ جاتىر. جۇلدە قورى - 45 ميلليون تەڭگە (I ورىن - 20 ميلليون تەڭگە، II ورىن - 15 ميلليون تەڭگە، III ورىن - 10 ميلليون تەڭگە). جەڭىمپازدار بۇگىن بەلگىلى بولادى.
بايقاۋدىڭ ماقساتى - ەلىمىزدەگى ەڭ ساپالى ءارى شيپالى قىمىزدى انىقتاۋ. نەگىزگى ماقسات - قىمىزدى دەنساۋلىق پەن قوناقجايلىقتىڭ سيمۆولى رەتىندە تانىتۋ، سونىمەن قاتار اگروتۋريزم مەن جىلقى شارۋاشىلىعىن دامىتۋعا سەرپىن بەرۋ.
سونداي-اق ەلوردادا ءوتىپ جاتقان فەستيۆالگە ەل وڭىرلەرىنەن 30 تونناعا جۋىق قىمىز اكەلىندى، وسى ورايدا ۇيىمداستىرۋشىلار رەكورد ورناعانىن ايتىپ وتىر.
