قوستانايداعى جارىلىس: قيراعان ءۇيىندى استىنان ءۇش ادامنىڭ دەنەسى تابىلدى

قوستاناي قالاسى امانگەلدى كەنتىندەگى جارىلىس بولعان جەردە قۇتقارۋ جۇمىستارى اياقتالدى، دەپ حابارلايدى Kazinform.

بۇگىن ساعات 12:36 دا قوستاناي قالاسىندا گاز-اۋا قوسپاسى جارىلىپ، سالدارىنان ءبىر قاباتتى عيمارات تولىعىمەن وپىرىلعان بولاتىن.

«ءورت اۋماعى - 5 شارشى مەتر. سونىڭ سالدارىنان الدىن الا ەسەپ بويىنشا اۋماعى 280 شارشى مەتر ءبىر قاباتتى عيمارات تولىق وپىرىلعان. ءورت 13:25 تە وقشاۋلانىپ، 13:52 دە ءسوندىرىلدى»، - دەپ حابارلادى وبلىس اكىمدىگى.

ءورت ءسوندىرۋ جانە ىزدەستىرۋ-قۇتقارۋ جۇمىستارىنا توتەنشە جاعدايلار قىزمەتىنىڭ 263 قىزمەتكەرى مەن 61 تەحنيكا جانە ەرىكتىلەر جۇمىلدىرىلدى.

ىزدەستىرۋ-قۇتقارۋ جۇمىستارى ناتيجەسىندە 12 ادام قۇتقارىلدى. ءبىر كۇن بۇرىن ءۇش ادام قۇتقارىلعانىمەن، قالعان ۇشەۋىن قۇتقارۋ مۇمكىن بولمادى.

ءتورت ادام وبلىستىق اۋرۋحاناعا جاتقىزىلدى. قالالىق اۋرۋحانادا التى ادام جاتىر. ءبىر ادام مەديتسينالىق كومەككە ءوز بەتىنشە جۇگىنسە، بىرەۋى اۋرۋحاناعا جاتۋدان باس تارتقان. زارداپ شەككەندەردىڭ بارلىعى قاجەتتى مەديتسينالىق قىزمەتپەن قامتاماسىز ەتىلدى.

الدىن الا مالىمەت بويىنشا، وسى وقيعادان 7 جەڭىل كولىك پەن 5 اۋىر جۇك كولىگى، سونداي-اق جاقىن ماڭداعى 12 جەكە عيمارات زارداپ شەككەن.

قوستاناي قالالىق پوليتسيا باسقارماسى ق ر ق ك 292-بابى 3-بولىگى، «ابايسىزدا ەكى جانە ودان دا كوپ ادامنىڭ ولىمىنە اكەلىپ سوققان ءورت قاۋىپسىزدىگى تالاپتارىن بۇزۋ» بويىنشا سوتقا دەيىنگى تەرگەپ-تەكسەرۋدى باستادى.

ايتا كەتەيىك، قوستانايدا ءۇي وپىرىلىپ، جەتى ادام ءۇيىندى استىندا قالىپ قويعان ەدى.

ءۇيىندى استىنان 3 ادام شىعارىلدى.

قيراعان ءۇيدىڭ استىندا ءالى دە ادامدار بار ەكەنى انىقتالدى.

سونداي-اق قيراعان ءۇيدىڭ ورنىندا قۇتقارۋ جۇمىسى جالعاسىپ جاتقانى حابارلاندى.