قوستانايدا تاكسيست ءوزىن پىشاقپەن قورقىتقان جولاۋشىدان قۇتىلۋ ءۇشىن ادەيى پوليتسيانىڭ كولىگىن سوققان

قوستانايدا تاكسي جۇرگىزۋشىسىن پىشاقپەن قورقىتقان ەر ادام ۇستالدى. ول ۋاقىتشا ۇستاۋ يزولياتورىنا قامالدى. ول ءتورت جىلعا دەيىن باس بوستاندىعىنان ايىرىلادى، - دەپ حابارلايدى polisia.kz.

قوستاناي وبلىسىنىڭ پوليتسيا دەپارتامەنتى وقيعانىڭ ءمان-جايىن ايتتى.

6-قاڭتاردان 7-قاڭتارعا قاراعان ءتۇنى رۋدنىيدىڭ ەكى تۇرعىنى وبلىس ورتالىعىنا تاكسيمەن بارعان. جولاۋشىلاردىڭ ءبىرى قالاعا كىرە بەرىستە تاكسي جۇرگىزۋشىسىنىڭ موينىنا پىشاق تاقاپ، اقشا تالاپ ەتىپ، ونى باسقا ەلدى مەكەنگە جەتكىزسىن دەگەن.

تاكسي جۇرگىزۋشىسى پوليتسەيلەردىڭ قىزمەتتىك كولىگىن كورىپ، نازارىن اۋدارۋ ءۇشىن ادەيى سوقتىعىسقان. وسى ءساتتى پايدالانىپ، ول كولىكتەن قاشىپ شىققان. وسى كەزدە كۇدىكتى وقيعا ورنىنان جاسىرىنۋعا تىرىسقان. ءبىراق ونى پاترۋلدىك پوليتسەيلەر تەز ارادا ۇستادى.

«توناۋعا وقتالۋ» قىلمىستىق ءىس فاكتىسى بويىنشا سوتقا دەيىنگى تەرگەۋ باستالدى. ۆەدومستۆو قاقتىعىس ناتيجەسىندە ەشكىم زارداپ شەكپەگەنىن اتاپ ءوتتى. قىزمەتتىك اۆتوكولىككە ەلەۋسىز ماتەريالدىق زالال كەلتىرىلدى»، - دەپ حابارلادى پوليتسيا.