قوستاناي وبلىسىندا پوليتسەيلەر مۇز استىنان ەكى ادامدى شىعارىپ الدى

16-جەلتوقسان كەشكى ساعات 20:00 شاماسىندا 31 جانە 51 جاستاعى ەكى جەرگىلىكتى تۇرعىن شورتاندى وزەنى ارقىلى ۇيگە باراتىن جولدى كەسىپ وتۋگە شەشىم قابىلداعان. سالدارىنان مۇز وپىرىلىپ سۋعا ءتۇسىپ كەتتى، دەپ حابارلايدى Kazinform.

ءتورت پوليتسيا قىزمەتكەرى وقيعا ورنىنا 4 مينۋت ىشىندە كەلدى. قۇتقارۋ كەزىندە قۇتقارۋ تروستارى مەن جيلەتتەر پايدالانىلدى.

«ءتارتىپ ساقشىلارىنا تەز ارەكەت ەتۋ كەرەك بولدى. پاترۋلدىك پوليتسەيلەر نۇرلان شۋكمانوۆ پەن رۋسلان كۋجاحمەتوۆ مۇز ۇستىمەن ءجۇرىپ، تەرەڭدىگى شامامەن 6 مەترلىك سۋعا سەكىردى.

ولار سۋعا كەتكەن تۇرعىنداردى تەز ارادا جوعارىعا قاراي يتەرىپ، قالعان ەكى پوليتسيا قىزمەتكەرى كەزەك-كەزەك بارلىعىن سۋدان جاعاعا شىعارعان تروستى ۇستاپ تۇردى»، - دەلىنگەن ءى ءى م حابارلاماسىندا.

ەر ادامداردى جەدەل جاردەم الىپ كەتتى. ولاردىڭ جاعدايى تۇراقتى. قازىر دارىگەرلەردىڭ باقىلاۋىندا.

پوليتسەيلەر سۋعا تۇسكەن فورماسىن اۋىستىرىپ، قىزمەتىن جالعاستىردى.