قوستاناي وبلىسىندا مەكتەپ وقۋشىلارىنىڭ %27,3 ى قازاقشا وقيدى
استانا. KAZINFORM - قوستاناي وبلىسى - ءتۇرلى سالالاردى دامىتۋدا الەۋەتى جوعارى وڭىرلەردىڭ ءبىرى.
سوندىقتان ەل ەكونوميكاسىنا ەلەۋلى اسەر ەتەتىن سالالارعا ينۆەستيتسيا سالۋ مەن دامىتۋعا ەرەكشە ءمان بەرىلگەن. بۇل تۇرعىدا Kazinform اگەنتتىگىنىڭ «اكىمگە سۇراق» جوباسى اياسىندا وسى وڭىردە اتقارىلىپ جاتقان جۇمىستار جايىندا وبلىس اكىمى قۇمار اقساقالوۆتان سۇراپ كوردىك.
- قۇمار ىرگەباي ۇلى، قوستاناي وبلىسى اۋىل شارۋاشىلىعى سالاسىنداعى ماڭىزدى وڭىرلەردىڭ ءبىرى. مال شارۋاشىلىعىنداعى جايىلىم، ال ەگىن شارۋاشىلىعىندا استىقتىڭ ونىمدىلىگى ماسەلەسى قالاي شەشىلىپ جاتىر؟ بىلتىر كۇزگى جاۋىن- شاشىنعا بايلانىستى ەلىمىزدە ساپاسى تومەن استىقتىڭ كولەمى ارتتى. شارۋالار شىعىنعا ۇشىراماس ءۇشىن بۇل استىقتى ەكسپورتتاۋ ماسەلەسى شەشىلدى مە؟ بيىلعى ەگىن ەگۋ ناۋقانى قارساڭىندا شارۋالار تۇقىممەن قامتاماسىز ەتىلگەن بە؟
- ەگىن جيناۋ جۇمىستارى كەزىندەگى قولايسىز اۋا رايى بىلتىرعى ەگىن ساپاسىنا اسەر ەتتى. الىنعان استىقتىڭ ساپاسى الدىڭعى جىلدارعا قاراعاندا تومەن بولدى. ءداندى داقىلداردىڭ 4 ميلليون تونناسى جينالدى. جالپى ءونىمنىڭ 10 پايىزى 3-كلاسقا جاتقىزىلسا، 4-كلاسقا 15 پايىزى، 5-كلاسقا 20 پايىزى جاتادى. ال ءونىمنىڭ %55 سىنىپتان تىس قالدى.
2023 -جىلى اۋىل شارۋاشىلىعى تاۋارىن وندىرۋشىلەردى قولداۋ ماقساتىندا ۇكىمەت رەزەرۆىنەن «ازىق- تۇلىك كەلىسىم شارت كورپوراتسياسى» ا ق استىق ساتىپ الۋ ءۇشىن 8,5 ميلليارد تەڭگە ءبولىندى. استىق ساتىپ الۋ كولەمىن بولۋگە سايكەس وبلىستىڭ ۇلەسى جالپى رەسپۋبليكالىق كولەمنىڭ 29,4 پايىزىن قۇرايدى. «ازىق- تۇلىك كەلىسىم شارت كورپوراتسياسى» ا ق 152,7 مىڭ توننا نەمەسە جوسپاردىڭ %161 ساتىپ الدى.
سونىمەن قاتار، ەگىس ناۋقانىن جۇرگىزۋ ءۇشىن 2024 -جىلى وبلىستىڭ اۋىل شارۋاشىلىعى قۇرىلىمدارى 514,2 مىڭ توننا اۋىل شارۋاشىلىعى داقىلدارىنىڭ تۇقىمىن تولتىردى، قامتاماسىز ەتىلۋى -%100. تۇقىم زەرتحانالارىندا بارلىق تولتىرىلعان تۇقىمدار الدىن الا تەكسەرۋدەن ءوتتى.
بۇدان بولەك، حالىقتى جايىلىمدارمەن قامتاماسىز ەتۋ بويىنشا دا جۇمىستار جالعاسىپ جاتىر. اتاپ ايتقاندا، اۋىل شارۋاشىلىعى تاۋارىن وندىرۋشىلەرمەن 173 مىڭ گ ا القاپتا اۋىل حالقىنىڭ مالىن جايۋ ءۇشىن جايىلىمدىق جەرلەردى وتەۋسىز بەرۋ تۋرالى مەموراندۋمدار مەن كەلىسىمدەر جاسالدى. 2 اۋداندا القابى 2,4 مىڭ گ ا ەلدى مەكەندەردىڭ اۋماعىن ۇلعايتۋ ىسكە اسىرىلدى، حالىقتىڭ جەكە اۋلاداعى مالىن جايۋعا قاتىستى سۇرانىسىن قاناعاتتاندىرۋ ماقساتىندا جالپى اۋدانى 527,9 مىڭ گ ا جەر ۋچاسكەسى رەزەرۆكە الىندى. سونداي- اق، اۋىلدار مەن اۋىلدىق وكرۋگتەردىڭ اكىمدىكتەرىنە 54,7 مىڭ گ ا جەر ۋچاسكەسى تۇراقتى پايدالانۋعا بەرىلدى.
- قوستاناي وبلىسىندا اۆتوكولىك شىعارۋ ءوندىرىسىن دامىتۋعا ەرەكشە ەكپىن قويىلعان. وسى باعىتتا قانداي جوبالار ىسكە قوسىلادى؟ جالپى، اۆتوكولىك وندىرىسىندە وبلىستىڭ الەۋەتى قانداي؟
- «سارى ارقااۆتوپروم» ج ش س قازاقستان رەسپۋبليكاسىنداعى اۆتوموبيل شىعارۋ ءوندىرىسى بويىنشا ءىرى كاسىپورىن سانالادى، وندا 3 مىڭنان استام ادام جۇمىس ىستەيدى. كاسىپورىن 6 برەندتىڭ 50-دەن استام مودەلىن شىعارادى: JAC، KIA، chevrolet، LADA، Jetour، ۋاز.
وبلىستىڭ وڭدەۋ ونەركاسىبى قۇرىلىمىندا اۆتوموبيل جاساۋدىڭ ۇلەسى 2023 -جىلى شامامەن %50 قۇرادى. 2023 -جىلدىڭ قورىتىندىسى بويىنشا «سارىارقااۆتوپروم» ج ش س 90230 اۆتوموبيل شىعاردى، ونىڭ 9122 ءسى ەكسپورتتالدى. كاسىپورىن بيىل كەم دەگەندە 95 مىڭ اۆتوموبيلدى ءوندىرۋدى جوسپارلاپ وتىر. اۆتوموبيل جاساۋ سەكتورىن ودان ءارى دامىتۋ جاڭا وندىرىستەردى قۇرۋعا باعىتتالعان ينۆەستيتسيالىق جوبالاردى ىسكە اسىرۋ ەسەبىنەن جۇزەگە اسىرىلادى. اتالعان سالادا 377 ميلليارد تەڭگە سوماسىنا 11 ينۆەستيتسيالىق جوبانى ىسكە اسىرۋ اتقارىلىپ جاتىر، وندا 4 مىڭعا جۋىق جۇمىس ورنىن قۇرۋ كوزدەلگەن.
بۇل جەردە ىسكە اسىرىلاتىن جوبالاردىڭ ىشىندەگى ەڭ باستىسى - KIA اۆتوموبيلدەرىن شىعاراتىن جاڭا زاۋىت سالۋ جوباسى. وزدەرىڭىز بىلەتىندەي، بىلتىردىڭ قاراشا ايىنىڭ باسىندا قۇنى 90 ميلليارد تەڭگە جانە وندىرىستىك قۋاتتىلىعى جىلىنا 70 مىڭ اۆتوموبيل بولاتىن زاۋىت قۇرىلىسى باستالدى. ناتيجەسىندە، 1500 جاڭا جۇمىس ورنى قۇرىلۋى ءتيىس. سونداي- اق، جۇك تەحنيكاسىنا ارنالعان اۆتوكومپونەنتتەردى وندىرۋگە باعىتتالعان 3 جوبا ىسكە اسىرىلىپ وتىر. جوبالار بويىنشا ينۆەستيتسيالاردىڭ جالپى كولەمى 238,7 ميلليارد تەڭگەنى قۇرايدى، وندا مىڭنان استام جۇمىس ورنىن قۇرۋ ەسكەرىلگەن.
- اۋىل شارۋاشىلىعى ماشينالارىن جاساۋ سالاسىندا قانداي جەتىستىكتەر بار؟
- وڭىردە اۆتوموبيل جاساۋمەن قاتار، اۋىل شارۋاشىلىعى تەحنيكاسىنىڭ ءوندىرىسى بەلسەندى دامىپ كەلەدى. اۋىل شارۋاشىلىعى تەحنيكاسىن شىعارۋعا «اگروماشحولدينگ KZ» ا ق، «قوستاناي تراكتور زاۋىتى» ج ش س، «م ت ز قازاقستان - ماشينا جاساۋ زاۋىتى» ج ش س، «قوستاناي اگرومەحانيكالىق زاۋىتى» ج ش س، «دون مار» ج ش س ىسپەتتى زاۋىتتار جۇمىلدىرىلعان. 2023 -جىلى بارلىعى 310 كومباين، 2571 تراكتور جانە 639 دەستەلەگىش شىعارىلدى. بيىل كاسىپورىندار 233 كومباين جانە 3 مىڭنان استام تراكتور، سونداي- اق 440 دەستەلەگىش شىعارۋدى جوسپارلاپ وتىر.
ينۆەستيتسيالىق جوبالاردى ىسكە اسىرۋ اياسىندا تراكتور قۇراستىرۋ سەكتورىندا «بەلارۋس»، «كيروۆەتس»، «LOVOL» ماركالى اۋىل شارۋاشىلىعى تەحنيكاسىنىڭ ءوندىرىسى جولعا قويىلعانىن اتاپ ءوتۋ قاجەت.
- وڭىردە تۇرعىن ءۇي قۇرىلىسىنداعى نەگىزگى ماسەلەلەرگە توقتالساڭىز. باسپانا كەزەگىندە تۇرعانداردىڭ پروبلەمالارى شەشىلىپ جاتىر ما؟
- 2023 -جىلى وبلىس اۋماعىندا قارجىلاندىرۋدىڭ بارلىق كوزدەرىن قوسا ەسەپتەگەندە، 474,7 مىڭ شارشى مەتر باسپانانىڭ پايدالانۋعا بەرىلگەنىن ايتا كەتكەن ءجون. اتاپ ايتقاندا، 4118 پاتەر تاپسىرىلدى. باسپانانىڭ باسىم بولىگى قوستاناي، رۋدنىي قالالارى، قوستاناي اۋدانىنا تيەسىلى.
بيىل وبلىس بويىنشا 500 مىڭ شارشى مەتر باسپانانى پايدالانۋعا بەرۋ جوسپارلانعان. 56 كوپقاباتتى ءۇي سالىنادى. ونىڭ 35 ءى بيۋدجەت قاراجاتىمەن سالىنسا، 21 ۇيگە ينۆەستيتسيا تارتۋ كوزدەلگەن. وسى باعىتتاعى اتقارىلاتىن جۇمىس تۇرعىن ءۇي سالاسىن دامىتۋعا سەپتىگىن تيگىزۋى ءتيىس.
- ەلىمىزدە جىلۋ بەرۋ جۇيەسى مەن ينفراقۇرىلىمدى جەتىلدىرۋگە، گازبەن قامتاماسىز ەتۋگە ەرەكشە نازار اۋدارىلىپ وتىر. قوستاناي قالاسىنداعى جىلۋ بەرۋ جۇيەسى توزعان. جاقىن ارادا بۇل ماسەلەنىڭ شەشىمى بولا ما؟
- وبلىستا جىلۋمەن جابدىقتاۋ جەلىلەرىنىڭ ۇزىندىعى 743,6 شاقىرىم، ونىڭ %47,4 توزعان. ق ر پرەزيدەنتىنىڭ سايلاۋالدى باعدارلاماسىن ىسكە اسىرۋ اياسىندا ءبىزدىڭ الدىمىزعا 2029 -جىلعا دەيىن جىلۋ جەلىلەرىنىڭ توزۋ دەڭگەيىن 43 پايىزعا دەيىن تومەندەتۋ مىندەتى قويىلعان. بيىل ۇزىندىعى 11 ك م جىلۋ جەلىلەرىن قايتا قۇرۋ بويىنشا 6 جوبا رەسپۋبليكالىق بيۋدجەتتەن قاراستىرىلاتىن 8,2 ميلليارد تەڭگەگە جاڭارتىلادى. سونداي- اق، 20 ك م جىلۋ جەلىسىن جاڭارتۋ بويىنشا 15 جوبا 2024 -جىلعى رەسپۋبليكالىق بيۋدجەتتى ناقتىلاۋ كەزىندە جولداندى. رەسپۋبليكالىق بيۋدجەت كوميسسياسى ماقۇلداعان جاعدايدا، قوسىمشا 15 جاڭا جوبا بويىنشا قۇرىلىس- مونتاجداۋ جۇمىستارى باستالادى، وسى جوبالاردى ىسكە اسىرۋ جىلۋ جەلىلەرىنىڭ توزۋىن 1,1 پايىزعا تومەندەتۋگە مۇمكىندىك بەرەدى.
- اۋىلدىق ەلدى مەكەندەردى اۋىز سۋمەن قامتۋدىڭ ەڭ تومەن دەڭگەيى قوستاناي وبلىسىندا بايقالدى. سوندىقتان بۇل ماسەلەنى شەشۋ ءۇشىن وبلىس بويىنشا جەكە باعدارلاما قابىلدانۋى مۇمكىن بە؟
- قوستاناي وبلىسى بويىنشا 2023 -جىلدىڭ اياعىندا سۋمەن جابدىقتاۋ قىزمەتتەرىمەن قامتۋ 80,4 پايىزدان 86,7 پايىزعا دەيىن ءوستى. ەلدى مەكەندەر بويىنشا 492 اۋىلدىڭ 347 ءسى نەمەسە 70,5 پايىزى سۋمەن قامتاماسىز ەتىلدى. اتالعان باعىتتاعى جۇمىس بيىل دا جالعاسادى. اتاپ ايتقاندا، قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگىنىڭ 2023-2029 -جىلدارعا ارنالعان تۇجىرىمداماسى اياسىندا 59 جوبانى (24 قالالىق، 35 اۋىلدىق) ىسكە اسىرۋعا 18,8 ميلليارد تەڭگە ءبولىندى. رەسپۋبليكالىق بيۋدجەتتى ناقتىلاۋعا ۇستىمىزدەگى جىلدىڭ اقپان ايىندا ق ر ونەركاسىپ جانە قۇرىلىس مينيسترلىگىنە 48 جوبا مالىمدەلدى، ونىڭ ىشىندە 31 اۋىلدىق جانە 17 قالالىق، جالپى سوماسى 20,6 ميلليارد تەڭگە سۇراتىلدى. رەسپۋبليكالىق بيۋدجەت كوميسسياسى ماقۇلداعان جاعدايدا، قوسىمشا 36 جاڭا جوبا بويىنشا قۇرىلىس- مونتاجداۋ جۇمىستارى باستالادى.
2024 -جىلدىڭ قورىتىندىسى بويىنشا ءبىزدىڭ وبلىسىمىز ءۇشىن قالا حالقى بويىنشا -%99، ال اۋىل حالقى بويىنشا %90 سۋمەن جابدىقتاۋ قىزمەتتەرىنە قول جەتكىزۋدى قامتاماسىز ەتۋ مىندەتى قويىلدى. 2025 -جىلدىڭ سوڭىنا دەيىن مەملەكەت باسشىسىنىڭ تاپسىرماسى بويىنشا قالالار مەن اۋىلداردىڭ %100 تازا اۋىز سۋمەن قامتاماسىز ەتۋ قاجەت.
- وبلىستا ورىس تىلىندە وقىتاتىن مەكتەپتەرىنىڭ سانى قازاق مەكتەپتەرىنەن ەكى ەسە كوپ. مەملەكەتتىك تىلدە ءبىلىم بەرەتىن ۇيىمداردى، قازاق تىلىندە وقيتىن وقۋشىلاردىڭ سانىن كوبەيتۋ - وڭىردەگى وزەكتى ماسەلەنىڭ ءبىرى. وڭىردە 2021 -جىلدان بەرى مەملەكەتتىك تىلدە ءبىلىم بەرەتىن ۇيىمداردى دامىتۋ ءۇشىن جول كارتاسى جۇمىس ىستەپ جاتىر. بۇل جول كارتاسى قازاق تىلىندە وقيتىن وقۋشىلاردى كوبەيتۋگە ىقپال ەتتى مە؟
- قوستاناي وبلىسىندا جالپى كونتينگەنتى 111818 وقۋشىسى بار 445 مەملەكەتتىك مەكتەپ جۇمىس ىستەپ جاتىر، ونىڭ ىشىندە مەملەكەتتىك تىلدە وقىتاتىن سىنىپتاردا وقۋشىلاردىڭ %27,3 ءبىلىم الىپ وتىر.
مەملەكەتتىك تىلدە وقىتاتىن مەكتەپتەر مەن بالالار كونتينگەنتىن ۇلعايتۋ ماسەلەسى وبلىس اكىمدىگىنىڭ كۇن تارتىبىنەن تۇسكەن ەمەس. مەملەكەتتىك تىلدە ءبىلىم الۋشىلار كونتينگەنتىن ۇلعايتۋ ماقساتىندا 2021-2025 -جىلدارعا ارنالعان مەملەكەتتىك تىلدە ءبىلىم بەرۋ ۇيىمدارىنىڭ جەلىسىن جانە ءبىلىم الۋشىلار كونتينگەنتىن ۇلعايتۋ جونىندەگى جول كارتاسى ءۇشىنشى جىل ىسكە اسىرىلىپ جاتىر.
ءۇش جىل ىشىندە مەكتەپكە دەيىنگى ءبىلىم بەرۋ ۇيىمدارىندا مەملەكەتتىك تىلدە وقىتاتىن 61 توپ اشىلدى. سونىمەن قاتار اتالعان كارتاعا سايكەس، 2022-2023 وقۋ جىلىندا ورىس تىلىندە وقىتاتىن قوستاناي قالاسىنىڭ فيزيكا- ماتەماتيكا ليتسەيى، قوستاناي اۋدانىنىڭ مايكول جببم، جۋكوۆ نوم جانە رۋدنىي قالاسىنىڭ № 12 جببم جانە № 4 مەكتەپ- ليتسەيى ىسپەتتى 5 مەكتەپتە قازاق سىنىپتارى اشىلدى. سونداي- اق قوستاناي قالاسىنداعى №115 ارالاس تىلدە ءبىلىم بەرەتىن مەكتەبى تولىقتاي مەملەكەتتىك تىلگە كوشىرىلدى.
قازىرگى كەزدە، اتا- انالار اراسىندا مەملەكەتتىك ءتىلدىڭ ماڭىزدىلىعىنا قاتىستى ءتۇسىندىرۋ جۇمىستارى جۇرگىزىلىپ جاتىر. بۇل ماسەلەنى، بارشامىز - قوعام، جەرگىلىكتى اتقارۋشى ورگاندار مەن اتا- انالارمەن بىرلەسە وتىرىپ شەشەمىز دەگەن ۇمىتتەمىز.
- وبلىس ورتالىعىن دامىتۋدا قانداي جاڭا جوبالار قامتىلعان؟ بيىل الەۋمەتتىك جانە مادەني نىساندار سالىنا ما؟
- وبلىس ورتالىعىندا قۇرىلىس باسقارماسى وقۋشى ورىندارىنىڭ تاپشىلىعىن تومەندەتۋ ماقساتىندا «بەرەكە» جانە «قوناي» جاڭا شاعىن اۋداندارىندا 1880 ورىندىق ورتا مەكتەپتەردىڭ قۇرىلىسىن اياقتاۋعا جاقىندادى. «جايلى مەكتەپ» اۋقىمدى ۇلتتىق جوباسى اياسىندا 2025 -جىلعا دەيىن 2700 ورىندىق 3 مەكتەپتى ىسكە قوسۋ جوسپارلانعان. جىل اياعىنا دەيىن 280 ورىندىق 2 بالاباقشا سالىنادى. ودان بولەك، 2023 -جىلى «يۋبيلەينىي» شاعىن اۋدانىندا دەنە شىنىقتىرۋ- ساۋىقتىرۋ كەشەنىنىڭ قۇرىلىسى باستالدى. كەشەننىڭ قۇرىلىس جۇمىستارى جوسپار بويىنشا 2024 -جىلى اياقتالادى.
- قوستاناي قالاسىندا قوعامدىق كولىكتى جاڭارتۋ بارىسى جايىندا ايتىپ بەرسەڭىز.. .
- وبلىس ورتالىعىنىڭ بارلىق اۆتوپاركتەرىندەگى اۆتوبۋستاردىڭ جالپى سانى - 296. 2023 -جىلى تاسىمالداۋشىلار وتاندىق «Yutong» ماركالى 37 جاڭا اۆتوبۋستى ساتىپ الدى. 2024 -جىلى «كومپانيا STA» ج ش س تاسىمالداۋشىسى 15، «تۋريستترانسسەرۆيس» ج ش س 7 قوعامدىق كولىكپەن تولىقتى. وسى باعىتتاعى جۇمىس بيىل دا جالعاسادى. بىرەر جىلدىڭ كولەمىندە وبلىس ورتالىعىندا تولىقتاي جاڭا اۆتوبۋستار جۇرەتىنىنە سەنىمىم زور.
- ءبىرازدان بەرى وڭىردەگى جول قۇرىلىسى ماسەلەسى وزەكتى. سونىڭ ىشىندە قارجاتتىڭ ءتيىمدى جۇمسالۋىنا باقىلاۋدى كۇشەيتۋ كەرەك دەگەن ۇسىنىستار ايتىلىپ جاتىر. بيىل بۇل سالادا ىلگەرىلەۋ بولا ما؟
- 2024 -جىلى اۆتوجول سالاسىن جوندەۋگە بارلىق باعدارلامالار بويىنشا 54,5 ميلليارد تەڭگە باعىتتاۋ جوسپارلانعان، بۇل 2023 -جىلعى بيۋدجەتتەن 25 پايىزعا ارتىق. قاراجات 108 ەلدى مەكەندە 820 ك م جەرگىلىكتى ماڭىزى بار اۆتوجولداردى (83 ۋچاسكە) جانە 364 كوشە ۋچاسكەسىن جوندەۋگە مۇمكىندىك بەرەدى. بولىنگەن قارجىنى تولىقتاي يگەرۋ جانە ءتيىمدى جۇمساۋ جەرگىلىكتى بيلىكتىڭ باستى نازارىندا.
- رەسپۋبليكانىڭ جۇمىس كۇشى ارتىق وڭىرلەرىنەن ازاماتتار مەن قانداستاردى وبلىسقا تارتۋ قاراستىرىلعان. جالپى، قونىس اۋدارعان ادامدار وڭىردە تۇراقتاماي، قايتا كوشىپ كەتۋى پروبلەماسى بار. قوستاناي وبلىسىندا قونىس اۋدارعان ادامدارعا قاتىستى ءتيىستى جاعداي جاسالعان با؟ ولاردىڭ باسپانا ماسەلەسى شەشىلگەن بە؟ سەبەبى ەلىمىزدىڭ باتىسى مەن وڭتۇستىگىنەن ارتىق جۇمىس كۇشىن قوستاناي وبلىسىنا ورنالاستىرۋ تىپتەن جۇرگىزىلمەي وتىر دەگەن ءۋاج ايتىلىپ جاتىر. وسى باعدارلاما اياسىندا قونىس اۋداراتىنداردى تۇراقتاندىرۋ تۇرعىسىندا قانداي دا ءبىر وزگەرىستەر ەنگىزىلە مە؟
- بىلتىر «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى اياسىندا وڭىرگە 2322 ادام كوشىپ كەلدى. وسى باعىتتاعى جۇمىستى كۇشەيتۋ ماقساتىندا اۋقىمدى جۇمىستار قولعا الىنادى.
كوشىپ كەلۋشىلەرگە ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى اياسىندا قولداۋ كورسەتىلەدى. ەڭبەككە قابىلەتتى جانداردىڭ بارلىعى دا جۇمىسپەن قامتىلىپ، كاسىپ باستاعىسى كەلەتىندەرگە ءتۇرلى مەملەكەتتىك گرانت، نەسيەلەر بەرىلىپ، كاسىپ باستاۋىنا مۇمكىندىك جاساۋ قاراستىرىلعان.
- وبلىستىڭ تۋريستىك تارتىمدىلىعىن ارتتىرۋ جۇمىستارىنا ءجيى سىن ايتىلىپ جاتىر. جول بويىنداعى سەرۆيس پروبلەمالارى وتە وتكىر. وڭىردە وسى سالادا ىسكە اسىرىلاتىن تىڭ قادامدارعا توقتالساڭىز.. .
- تۋريزم جانە سپورت مينيسترلىگى جول بويىنداعى سەرۆيس سالاسىن دامىتۋ ماقساتىندا 2022 -جىلعى 1-قاڭتاردان باستاپ مەملەكەتتىك قولداۋدىڭ جاڭا شارالارىن، ونىڭ ىشىندە جول بويىنداعى سەرۆيس وبەكتىلەرى - موتەلدەر، كەمپينگتەر، تاماقتانۋ جانە ساۋدا پۋنكتتەرى بار ج ق س سالۋعا جۇمسالعان شىعىنداردىڭ %10 وتەۋ شارالارىن ىسكە قوستى.
ءبىزدىڭ وبلىستا جول بويىنداعى سەرۆيس وبەكتىلەرىن سالۋعا جۇمسالعان شىعىنداردىڭ %10 وتەۋگە 2 ءوتىنىم قابىلداندى. شىعىنداردى وتەۋدىڭ جالپى سوماسى 100 ميلليون تەڭگەدەن اسادى.
اتالعان وبەكتىلەر اۋليەكول جانە دەنيسوۆ اۋداندارىنداعى رەسپۋبليكالىق ماڭىزى بار اۆتوموبيل جولدارىنىڭ بويىندا ورنالاسقان. بۇل رەتتە ساۋدا زالى، ءدامحانا، اباتتاندىرىلعان سانيتاريالىق- گيگيەنالىق توراپ جانە نامازحاناسى بار زاماناۋي فورماتتاعى جانارماي قۇيۋ ستانتسيالارى ەسكەرىلگەن.
بۇدان باسقا، 7 بيزنەس سۋبەكتىسىنە تۋريستەر ءۇشىن تارتىمدى اۋماقتاردا جانە ولارعا باراتىن جولداردا ورنالاسقان سانيتاريالىق- گيگيەنالىق توراپتاردى كۇتىپ- ۇستاۋعا اي سايىن 83300 تەڭگە مولشەرىندە شىعىندار وتەلەدى.
- اڭگىمەڭىزگە راقمەت!
اۆتور
رۋسلان عابباسوۆ
