قوستاناي وبلىسىندا كيىكتەردىڭ كوكتەمگى اۋە ساناعى جۇرگىزىلدى
قوستاناي. قازاقپارات - 2025 -جىلعى ءساۋىردىڭ 15-19 ارىلىعىندا قوستاناي وبلىسىندا كيىكتەردىڭ بەتپاقدالا پوپۋلياتسياسىنىڭ كوكتەمگى اۋە ساناعى جاسالدى.
قوستاناي وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ جانۋارلار دۇنيەسى جانە اڭشىلىق شارۋاشىلىعى ءبولىمىنىڭ باس مامانى رۋستام بيدىبايەۆتىڭ ايتۋىنشا، ۇشۋ جۇمىستارى وڭىردە ءتۇرلى تابيعات قورعاۋ جانە عىلىمي ۇيىم-مەكەمەلەردىڭ وكىلدەرىنىڭ قاتىسۋىمەن جۇرگىزىلدى.
- اۋەدەن ساناق جۇرگىزۋ جۇمىستارىنا ورمان شارۋاشىلىعى جانە جانۋارلار دۇنيەسى كوميتەتىنىڭ «قوستاناي وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى» ر م ك- سى، «وحوتزووپروم» ر م ق ك، «بيوالۋانتۇرلىلىكتى ساقتاۋ قاۋىمداستىعى» ر ق ب، «التىن دالا» مەملەكەتتىك تابيعات رەزەرۆاتى، ق ر ع ج ب عىلىم كوميتەتى «زوولوگيا ينستيۋتى» ش ج ق ر م ك، سونىمەن قاتار «DALA AIR» ج ش س- نىڭ ماماندارى قاتىستى، - دەپ حابارلادى رۋستام بيدىبايەۆ.
جانۋارلاردىڭ ساناعى AS-350 تىكۇشاعىنان جۇرگىزىلدى. كيىكتەرمەن ۇشىراسۋ GPS- قۇرىلعىسىنا جازىلدى.
قوستاناي وبلىسىندا ۇشۋ جۇمىستارى 22 ساعات 47 مينۋتقا سوزىلدى. قازىرگى تاڭدا ساناق بارىسىندا جيناقتالعان مالىمەتتەرگە كامەرالدىق وڭدەۋ جۇرگىزىلىپ جاتىر. زەرتتەۋ ناتيجەسى كيىكتەردىڭ سانىن انىقتاپ، ولاردى ودان ءارى دە قورعاۋعا باعىتتالعان شارالاردى جوسپارلاۋعا مۇمكىندىك بەرەدى.
وسىعان دەيىن ق ر ەكولوگيا جانە تابيعي رەسۋرستار ۆيتسە- ءمينيسترى نۇركەن شاربيەۆ قازاقستانداعى كيىكتەر سانى 4,1 ميلليون باستى قۇرايتىنىن جەتكىزگەن بولاتىن.
