08:43, 06 - ءساۋىر 2025 | GMT +5
قوسشىدا ەكى جاسار قىزدى كولىك باسىپ كەتتى
استانا. KAZINFORM - وقيعا كەشە، 5- ءساۋىر كۇنى بولدى. تۇرعىن ءۇي اۋلاسىنان كولىگىمەن شىعىپ كەلە جاتقان ايەل كىشكەنتاي قىزدى كورمەي قالعان.
قايعىلى وقيعانىڭ ۆيدەوسى جەرگىلىكتى پابليكتەردىڭ بىرىندە جاريالاندى. وندا اۋلادا بالالاردىڭ ويناپ جۇرگەنىن كورۋگە بولادى. ءبىر كەزدە ەرەسەكتەۋ بالالار دوپتىڭ ارتىنان جۇگىرىپ كەتىپ، كىشكەنتاي قىز قاراۋسىز قالادى. سول ساتتە اۋلادان شىعىپ كەلە جاتقان كولىك قىزدى باسىپ كەتەدى.
- قوسشىداعى تۇرعىن ۇيلەردىڭ ءبىرىنىڭ اۋلاسىندا Kia Sportage ماركىلى كولىك جۇرگىزۋشىسى 2023 -جىلى تۋعان قىزدى باسىپ كەتكەن. ءسابي وقيعا ورنىندا كوز جۇمدى، - دەلىنگەن اقمولا وبلىستىق پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
پوليتسيا اتالعان وقيعا بويىنشا قىلمىستىق ءىس قوزعادى، تەرگەۋ ءجۇرىپ جاتىر.
