«قورقۋدىڭ قاجەتى جوق»: موبيلدى اۋدارىمداردى تەكسەرۋ جەكە تۇلعالاردىڭ قۇقىعىن تاپتاماي ما

استانا. KAZINFORM - مەملەكەتتىك كىرىستەر كوميتەتى ءموبيلدى اۋدارىم بويىنشا قالاعان ۋاقىتىندا كەز كەلگەن تۇلعانىڭ شوتىن تەكسەرە المايدى.

«Қорқудың қажеті жоқ»: Мобильді аударымдарды тексеру жеке тұлғалардың құқығын таптамай ма
Фото: видеодан алынды

100 اۋدارىم ولشەمشارتىنان اسقان تۇلعالار تۋرالى ماعلۇمات ەكىنشى دەڭگەيلى بانكتەردەن كەلەدى. بۇل تۋرالى مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى ايتىپ بەردى.

− بۇل ازاماتتاردىڭ قۇقىعىن تاپتايدى دەپ ەسەپتەمەيمىز، ءبىزدىڭ ماقساتىمىز - تەك كاسىپكەرلىك نىشانىن انىقتاۋ. ەلىمىزدىڭ ءاربىر ازاماتىنىڭ ءوز كىرىسىنەن سالىق تولەۋى - ازاماتتىق بورىشى جانە مىندەتى. وكىنىشكە قاراي، بىزدە سالىق مادەنيەتى تومەندەۋ ەكەنىن ايتۋ كەرەك. وسىنىڭ سالدارىنان كىرىسىن كورسەتپەي، سالىق تولەۋدەن جالتارۋ ارەكەتتەرى وتە كوپ. ءبىزدىڭ ماقساتىمىز سونى انىقتاۋ، − دەدى ەرسايىن كوپتىلەۋ ۇلى اگەنتتىكتىڭ «Bizdin orta» پودكاستىندا.

ەگەر ول تەك جەكە تۇلعا بولسا، كاسىپكەرلىكپەن اينالىسپاسا، بانكتەن ول تۋرالى اقپارات كەلمەيدى. ياعني كوميتەتتە ءار ازاماتتىڭ قانشا اۋدارىم الاتىنى تۋرالى مالىمەت بولمايدى، تەك ولشەمشارتتان اسقان كەزدە عانا بانكتەر اقپارات بەرەدى.

«Қорқудың қажеті жоқ»: Мобильді аударымдарды тексеру жеке тұлғалардың құқығын таптамай ма
Фото: видеодан алынды

− ەكىنشى دەڭگەيلى بانكتەردىڭ ولشەمشارتتارعا سۇيەنىپ، مالىمەت بەرگەنى دۇرىس. ويتكەنى بانك قۇپياسى بار، ولشەمشارتتان اسقان كىسىلەردىڭ عانا مالىمەتى كىرىستەر ورگاندارىنا بەرىلۋى كەرەك دەپ ەسەپتەيمىز. مەملەكەتتىك كىرىستەر كوميتەتى قالاعان ۋاقىتىندا كەز كەلگەن تۇلعانىڭ شوتىن تەكسەرە المايدى. اۆتوماتتاندىرىلعان اقپاراتتىق جۇيە بارلىق اقپاراتتى وڭدەيدى جانە ولشەمشارتتان اسقان سالىق تولەۋشىگە حابارلاما جىبەرەدى. حابارلامادا اۋدارىم سانى جانە اينالىم سوماسى كورسەتىلەدى جانە سالىق تولەۋگە 30 جۇمىس كۇنى بەرىلەدى. كىرىسىن مويىنداعان جاعدايدا ازامات ءتيىستى ەسەبىن تاپسىرادى جانە سالىق تولەيدى، - دەدى ول.

ارينە، ءتۇرلى تەحنيكالىق اقاۋعا بايلانىستى موبيلدى اۋدارىم جۇرگىزىلۋى مۇمكىن، بۇل جاعدايدا كاسسا اپپاراتىنىڭ تۇبىرتەگى بەرىلۋى كەرەك.

− ياعني بۇل جەردە تۇتىنۋشى قۇقىعى تاپتالماۋى كەرەك. بىزدە سالىق كودەكسىنە سايكەس، ءاربىر زات ساتىپ العاندا، قىزمەت العاندا ءۇش ءتۇرلى جولمەن تولەم جۇرگىزە الاسىز - قولما-قول اقشا، بانك كارتاسى ارقىلى جانە QR- كود ارقىلى. كاسىپكەرلەر وسى ءۇش تولەم ءتاسىلىن قامتاماسىز ەتۋى كەرەك. قولما-قول اقشامەن تولەگەندە دە ك ك ن تۇبىرتەگى بەرىلۋى كەرەك. بۇل سالىقتاندىرىلىپ جاتقانىنىڭ بىردەن-ءبىر بەلگىسى، - دەپ ءتۇسىندىردى مامان.

كوميتەت وكىلى ءموبيلدى اۋدارىمداردى باقىلاۋدان قورقۋدىڭ قاجەتى جوق ەكەنىن جەتكىزدى.

− ەگەر ءسىز كاسىپكەرلىكپەن اينالىسپاساڭىز، قورقاتىن ەشتەڭە جوق. ءتىپتى ولشەمشارتتان اسىپ كەتكەن كۇننىڭ وزىندە كاسىپكەرلىكپەن اينالىسپاعانىڭىز انىق بولسا، تۇسىنىك بەرەسىز. ەگەر ول سالىقتاندىرۋعا جاتپاسا، سالىق سالىنبايدى. ەشكىمنىڭ قۇقىعى تاپتالمايدى. سوندىقتان قازاقستان ازاماتتارىن ءموبيلدى اۋدارىمنان قورىقپاي، قولداۋ كورسەتۋگە شاقىرامىز، - دەدى ە. كوپتىلەۋ ۇلى.

بۇعان دەيىن سپيكەر موبيلدى اۋدارىمدار تەك كاسپيدە ەمەس، بارلىق بانكتەردە باقىلاناتىنىن، كاسىپكەرلىكتە موبيلدى اۋدارىمدى پايدالانۋعا بولمايتىنىن تۇسىندىرگەن ەدى.

سوڭعى جاڭالىقتار