قورعاسىن، مىس، مىرىش، مارگانەتس، حروم: جىل سايىن 14,3 ميلليون توننا كەن شەتەلگە ساتىلادى

استانا. KAZINFORM - ونەركاسىپ جانە قۇرىلىس مينيسترلىگى Kazinform ساۋالىنا جولداعان جاۋاپتا تاۋ-كەن جانە مەتاللۋرگيا سالاسىنداعى شيكىزات ەكسپورتىنىڭ كولەمى تۋرالى مالىمەت بەردى.

ماسەلەنىڭ ءمانى

ءماجىلىس دەپۋتاتى ازات پەرۋاشەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي مەن ونەركاسىپ جانە قۇرىلىس ءمينيسترى ەرسايىن ناعاسپايەۆقا «قازاقمىس» سياقتى پايدالى قازبا وندىرەتىن كومپانيالاردىڭ سىرتقا شىعارىپ جۇرگەن كەنى مەن كونسەنتراتتارى حيميالىق تالداۋسىز كەتىپ جاتقانى تۋرالى مالىمەتكە تۇسىنىكتەمە بەرۋدى تالاپ ەتىپ، ساۋال جولداعان بولاتىن.

- اقپان ايىندا الەۋمەتتىك «قازاقمىس» كورپوراتسياسىنىڭ بۇرىنعى زەرتحانا مامانىنىڭ اقپاراتى شىقتى. ايتۋىنشا، كورپوراتسيا توننا- توننا مىس كونسەنتراتى مەن كەندى حيميالىق تالداۋ جۇرگىزبەستەن، قۇرامىنداعى باعالى جانە سيرەك مەتالداردى جاسىرا وتىرىپ سىرتقا شىعارادى. ماماننىڭ پىكىرىنشە، وسى ارقىلى كومپانيا سىرتقا شىعارىلىپ جاتقان رەسۋرستاردىڭ باعاسىن قولدان تومەندەتىپ، وليگارحتاردىڭ پايداسى ءۇشىن ەل ەكونوميكاسىنا شىعىن كەلتىرىپ جاتىر. تاعى ءبىر سۇحباتتا گەولوگيا سالاسىنىڭ ساراپشىسى تاۋ-كەن الپاۋىتى ونداعان جىلدار بويى كەن مەن كونسەنتراتتىڭ تالداۋىن جۇرگىزبەستەن، شەتەلدەگى وندىرىسكە سيرەك مەتالدىڭ شيكىزاتىن شىعارىپ كەلگەن. اتالعان ماتەريالداردىڭ سىلتەمەسىن دەپۋتاتتىق ساۋالمەن بىرگە جولدايمىز، - دەگەن ازات پەرۋاشەۆ.

ونەركاسىپ مينيسترلىگىندەگىلەر نە دەيدى؟

- قازاقستان رەسپۋبليكاسى كەدەن وداعىنا (قازىر ەۋرازيالىق ەكونوميكالىق وداققا) كىرگەن ساتكە دەيىن ەل اۋماعىنان كەن ەكسپورتىنا رۇقسات بەرۋ قاراستىرىلماعان. 2009 -جىلدان باستاپ قۇرامىندا التىنى بار شيكىزاتتى ەكسپورتتاۋعا شەكتەۋلەر قويىلدى. «باعالى مەتالدار مەن اسىل تاستار تۋرالى» زاڭنىڭ 8-بابى 2-تارماعىنا سايكەس قۇرامىندا باعالى مەتالدار بار شيكىزات تاۋارلارىن قازاقستان اۋماعىنان اكەتۋگە نيەتى بار تۇلعا ۋاكىلەتتى ورگان ايقىنداعان تارتىپپەن، ۋاكىلەتتى ورگان بەكىتەتىن تىزبەدەگى باعالى مەتالداردى ءوندىرۋدىڭ بارلىق سۋبەكتىلەرىنەن ءتيىستى باس تارتۋدى نەمەسە وسىنداي باس تارتۋدىڭ بار ەكەنى تۋرالى ۋاكىلەتتى ورگاننىڭ راستاماسىن الۋعا مىندەتتى، - دەپ جازىلعان مينيسترلىك جاۋابىندا.

رەسمي مالىمەت نە دەيدى؟

- تاۋ-كەن جانە مەتاللۋرگيا كەشەنىندەگى شيكىزات ەكسپورتىنىڭ كولەمى نەگىزىنەن كونسەنتراتتارعا تيەسىلى، - دەلىنگەن رەسمي جاۋاپتا.

2024 -جىلى ەكسپورتتالعان كونسەنتراتتاردىڭ ىشىندە كومىرتەكتەنبەگەن تەمىر كونسەنتراتتارى - 5,7 ميلليون توننا (2023 -جىلعىدان %9,4 از)، اگلومەراتسيالانعان تەمىر كونسەنتراتتارى - 4,8 ميلليون توننا (2023 -جىلعىدان %2,4 از)، مىس كونسەنتراتتارى - 1,8 ميلليون توننا (2023 -جىلعىدان %5,6 از)، مارگانەتس كونسەنتراتتارى - 214,4 مىڭ توننا (2023 -جىلعىدان %36,3 كوپ)، قورعاسىن كونسەنتراتتارى - 45,7 مىڭ توننا (2023 -جىلعىدان %18 از)، مىرىش كونسەنتراتتارى - 431,1 مىڭ توننا (2023 -جىلعىدان %15,9 از)، حروم كونسەنتراتتارى - 294,2 مىڭ توننا (2023 -جىلعىدان %24,7 از)، سازبالشىق (گلينوزەم) - 997,9 مىڭ توننا (2023 -جىلعىدان %14,3 كوپ).

ەسكە سالساق، Kazinform ءتىلشىسى قازاقستاندا سيرەك كەزدەسەتىن مەتالداردىڭ قانشا قورى بارىن، الەمدە ونىڭ ءرولى نەسىمەن ماڭىزدى ەكەنىن زەردەلەپ شىققان بولاتىن.

اۆتور

ەسىمجان ناقتىباي