قورعاستاعى اۋەجاي كىمنىڭ ەسەبىنەن سالىنادى

استانا. KAZINFORM - «قورعاس» شەكاراماڭى ىنتىماقتاستىق حالىقارالىق ورتالىعىندا اۋەجاي سالىنادى. تولىعىراق كولىك ءمينيسترىنىڭ ورىنباسارى ماقسات قالياقپاروۆ ايتىپ بەردى.

- اۋەجاي قۇرىلىسى تولىقتاي جەكە ينۆەستوردىڭ ەسەبىنەن جۇزەگە اسىرىلادى. قارجىنى Skyhanza كومپانياسى قۇيادى. بۇگىندە جوبالىق قۇجاتتاردى ازىرلەۋ جانە جەر ۋچاسكەلەرىن رەسىمدەۋ جۇمىستارى ءجۇرىپ جاتىر. بارلىق ءتيىستى قۇجاتتاردى ازىرلەگەننەن كەيىن الدىمەن بىزدەن، سودان سوڭ مەملەكەتتىك ساراپتامادان وتەدى، - دەدى ماقسات قالياقپاروۆ ەلوردادا وتكەن «كولىك جانە لوگيستيكا نارىعى» VI حالىقارالىق كونفەرەنسياسى جانە GLOBAL Avia DAY اۋە تاسىمالدارىن دامىتۋ جونىندەگى I حالىقارالىق فورۋمى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي-اق، ۆيتسە-مينيستر اۋەجاي ۋاقتىلى پايدالانۋعا بەرىلەتىنىن ايتىپ سەندىردى.

«Skymax tehnologies» كومپانيالار توبى» ج ش س باس ديرەكتورى ەرىك شورتانبايەۆتىڭ ايتۋىنشا، ءۇش كەزەڭنەن تۇراتىن جوبا اياسىندا حالىقارالىق جۇك-جولاۋشىلار اۋەجايىن سالۋدان بولەك، قاجەتتى ينفراقۇرىلىممەن قامتۋ، وندىرىستىك قۋاتتى ۇلعايتۋ، قوناق ءۇي، ساۋدا- ويىن- ساۋىق ورتالىعىن ىسكە قوسۋ كوزدەلگەن. وسىلايشا، جوبا 2032 -جىلى تولىعىمەن اياقتالادى. ءبىراق اۋەجاي 2027 -جىلى پايدالانۋعا بەرىلەدى دەپ جوسپارلانعان.

ايتا كەتەيىك، بيىل ماۋسىمدا جەكەنىڭ قولىندا كەتكەن قورعاستىڭ تەرمينالى مەملەكەتكە قايتارىلدى.

داۋلەت ىزتىلەۋ

اۆتور