قورعانىس مينيسترلىگى سارىوزەكتەگى سارباز ءولىمىنىڭ ىقتيمال سەبەبىن ايتتى
استانا. KAZINFORM - قورعانىس مينيسترلىگى 14-قاڭتاردا سارىوزەك گورنيزونىنداعى (جەتىسۋ وبلىسى) سارباز ولىمىنە قاتىستى رەسمي تۇسىنىك بەردى.

- 14-قاڭتاردا سارىوزەك كەنتىندەگى 12740 اسكەري بولىمىندە بولعان قاتارداعى جاۋىنگەر داستان قۇرمانبەكتىڭ ولىمىنە قاتىستى تۇسىنىك بەرگىم كەلەدى. اتالعان فاكتى بويىنشا قىزمەتتىك تەرگەۋ مەنىڭ باسشىلىعىممەن - قۇرلىق اسكەرلەرىنىڭ باس قولباسشىسىنىڭ باسشىلىعىمەن - «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ باسقارماسى، باس قولباسشى باسقارماسىنىڭ وفيتسەرلەر توبىنىڭ قاتىسۋىمەن جۇرگىزىلدى. قۇقىق قورعاۋ ورگاندارى قىلمىستىق ءىس قوزعادى جانە تەرگەۋ امالدارى ءجۇرىپ جاتىر، - دەدى ق ر قارۋلى كۇشتەرى قۇرلىق اسكەرلەرىنىڭ باس قولباسشىسى، گەنەرال-مايور مەرەكە كوشەكبايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق قۇرلىق اسكەرلەرىنىڭ باس قولباسشىسى سارباز ءولىمىنىڭ الدىن الا سەبەبىن ايتتى.
- قىزمەتتىك تەرگەۋ قورىتىندىسى بويىنشا قازانىڭ ىقتيمال سەبەبى قولباسشىلىقتىڭ قاراماعىنداعى جەكە قۇراممەن جۇمىس ىستەۋدە جەكەلەگەن ولقىلىقتاردىڭ بولۋى مۇمكىن دەگەن تۇجىرىم جاسادىق. قولباسشىلىق داستاننىڭ ىشكى الاڭداۋشىلىعىن ۋاقىتىندا بايقاي المادى، ياعني وعان مورالدىق جانە پسيحولوگيالىق قولداۋ كورسەتىپ، اسكەري قىزمەت جاعدايىنا بەيىمدەلۋىن انىقتاي المادى، - دەيدى ول.
وسى ورايدا قورعانىس مينيسترلىگىنىڭ وكىلى اسكەري بولىمدەردىڭ قولباسشىلىعى ساربازداردىڭ مىنەز-قۇلقىنداعى اۋىتقۋلارعا دەرەۋ ارەكەت ەتەتىنىن اتاپ ءوتتى.
- 8-قاڭتاردا قاتارداعى جاۋىنگەر داستان قۇرمانبەك تۋرالى اقپارات الىپ، ءبولىم كومانديرى ونىمەن جەكە اڭگىمەلەستى. 12-قاڭتاردا اتا-اناسى بولىمگە كەلدى جانە تەلەفونمەن سويلەستى. قولباسشىلىق داستاندى بوساتتى، ياعني كۇنى بويى داستان اتا-اناسىمەن بىرگە بولدى. اسكەري ۇجىم ىشىندەگى، ونىڭ ىشىندە وفيتسەرلەر، سەرجانتتار اراسىنداعى قارىم-قاتىناسقا بايلانىستى ەشقانداي پروبلەمالار بولعان جوق. تەرگەۋ مۇددەسىنە سايكەس وقيعانىڭ ەگجەي-تەگجەيىن ايتا المايمىن، - دەپ تولىقتىردى مەرەكە كوشەكبايەۆ.
ايتا كەتسەك، ءبىر اپتا بۇرىن سارىوزەكتە (جەتىسۋ وبلىسى) قاتارداعى جاۋىنگەر وقۋ-جاتتىعۋ كەزىندە مەرت بولدى.
بۇعان دەيىن اسكەردە ساربازداردان اقشا جيناۋ ماسەلەسى تۋرالى جازعان بولاتىنبىز.