قورعانىس مينيسترلىگى سۋ باسقان ايماقتارعا قوسىمشا اسكەري كۇشتەرىن جولدايدى - توقايەۆ
استانا. KAZINFORM - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ەلدەگى سۋ تاسقىنىنان زارداپ شەككەندەرگە كومەك رەتىندە مەملەكەتتىك ماتەريالدىق رەزەرۆتى پايدالانۋدى تاپسىردى.
«مەنىڭ بۇيرىعىممەن اپاتقا قارسى كۇرەسكە قورعانىس مينيسترلىگى قوسىمشا اسكەري كۇشتەرىن جولدايدى. حالىققا كومەكتەسۋ ءۇشىن ۇكىمەتكە مەملەكەتتىك ماتەريالدىق رەزەرۆتى پايدالانۋدى تاپسىرامىن. سونداي-اق ۇكىمەت شىعىنداردى وتەۋدىڭ ءتيىمدى جولدارىن شۇعىل قاراستىرۋعا ءتيىس. ونى زارداپ شەككەن ازاماتتارعا جان- جاقتى ءتۇسىندىرۋ كەرەك. بەرىلەتىن وتەماقى شىعىندى تولىق جابۋى قاجەت»، - دەدى قاسىم-جومارت توقايەۆ حالىققا ۇندەۋىندە.
سونداي-اق، مەملەكەت باسشىسى ۇكىمەت باسشىسىنىڭ ورىنباسارلارىنا سۋ باسقان ايماقتاردى ارالاۋدى تاپسىردى.
«جاعدايى نەعۇرلىم كۇردەلى ايماقتارداعى جۇمىستى ۇيلەستىرۋ ءۇشىن ۇكىمەت باسشىسىنىڭ ورىنباسارلارىنا ايماقتارعا شىعۋدى تاپسىرامىن. ولار احۋال تۇزەلگەنشە سول جەردە بولادى. اقپاراتتىق شتاب ازاماتتاردى مەملەكەت قابىلداپ جاتقان بارلىق شارالار جونىندە ۇزدىكسىز جانە جان- جاقتى حاباردار ەتىپ وتىرۋعا ءتيىس»، - دەيدى ول.
بۇگىن مەملەكەت باسشىسى سۋ تاسقىنى سالدارىنان قالىپتاسقان اۋىر جاعدايعا بايلانىستى ۇندەۋ جولدادى.
