قونايەۆتىڭ اتى اڭىزعا اينالعان كولىگىن كاسىپكەر كەڭەس راقىشەۆ ساتىپ العانى راس پا؟
دىنمۇحامەد قونايەۆ اتىنداعى قوردىڭ وكىلدەرى قونايەۆتىڭ كولىگى بەلگىلى كاسىپكەر كەڭەس راقىشەۆكە ساتىلىپ كەتتى دەگەن اقپاراتقا قاتىستى پىكىر ءبىلدىردى.

قور وكىلدەرى بۇل اقپاراتتى جوققا شىعاردى.
«دىنمۇحامەد احمەت ۇلى قونايەۆتىڭ اتى اڭىزعا اينالعان زيل 114 اۆتوكولىگىن كورسەتكىمىز كەلىپ وتىر. بۇل كولىك جايلى ب ا ق- تا جالعان اقپارات تاراپ كەتتى. اۆتوكولىك د. ا. قونايەۆ اتىنداعى حالىقارالىق قوردىڭ مەنشىگىندە جانە ەشقاشان باسقا ادامدارعا بەرىلمەگەنىن اتاپ وتكىمىز كەلەدى.
بۇل كولىكتىڭ يەسى كەڭەس راقىشەۆ ەمەس، ول كەرىسىنشە كولىكتى رەستاۆراتسيالاۋعا قارجىلاي كومەك كورسەتىپ جۇرگەن ادام»، - دەيدى قور وكىلدەرى.
سونىمەن قاتار، قور وكىلدەرى كەڭەس راقىشەۆ ۇنەمى قارجىلاي كومەك كورسەتىپ تۇراتىنىن اتاپ ءوتىپ، العىس ايتتى.
«قونايەۆ قالاسىندا قونايەۆ-ورتالىعىنىڭ اشىلۋىن اسىعا كۇتىپ ءجۇرمىز، سەبەبى زيل 114 اۆتوكولىگى سول مۋزەيدە ورىن تاپپاق»، - دەلىنگەن جازبادا.
Massaget.kz