قونايەۆتا جاڭا كازينولار اشىلۋى مۇمكىن

قونايەۆ. KAZINFORM - قازىرگى تاڭدا قونايەۆ قالاسىندا 5 كازينو رەسمي جۇمىس ىستەپ تۇر.

Kazinform ءتىلشىسىنىڭ سۇراعىنا جاۋاپ بەرگەن قونايەۆ اكىمى اسحات بەردىحانوۆ قۇمار ويىن سالاسىندا ءۇش مىڭنان استام ادام جۇمىس ىستەيتىنىن ايتتى.

- قازىرگى ۋاقىتتا بىزدە بەس كازينو جۇمىس ىستەپ تۇر. جابىلعان نىساندار تۋرالى اقپاراتىم جوق. بارلىق جۇمىس ىستەپ تۇرعان كازينو قالىپتى جاعدايدا، ءۇش مىڭنان اسا ادام جۇمىسپەن قامتىلعان، - دەدى ول.

اكىمنىڭ ايتۋىنشا، قۇمار ويىن بيزنەسىنەن تۇسەتىن سالىقتىڭ نەگىزگى بولىگى رەسپۋبليكالىق بيۋجەتكە، ال قالعانى جەرگىلىكتى بيۋجەتكە تۇسەدى. اسحات بەردىحانوۆ جاڭا كازينو ورتالىقتارىنىڭ اشىلۋى تۋرالى دا پىكىر ءبىلدىردى.

- ءبىز ينۆەستورلاردىڭ ناقتى جوسپارلارىن بىلە المايمىز. دەگەنمەن، ەكى ينۆەستور بۇل جەردە قوسىمشا كازينو اشقىسى كەلەتىنىن مالىمدەدى. الايدا، بارلىق نىسان قولدانىستاعى زاڭناماعا ساي كەلۋى جانە قاجەتتى ليتسەنزيالارعا يە بولۋى ءتيىس، - دەپ اتاپ ءوتتى اكىم.

ەسكە سالايىق، بۇعان دەيىن ءۇش وبلىستا تەك شەتەلدىكتەرگە ارنالعان كازينولار اشىلاتىنىن جازعانبىز.