قولقانى قاپقان ساسىق ءيىس: قونايەۆ تۇرعىنى اكىمگە شاعىمداندى
قونايەۆ. KAZINFORM - قالا ماڭىنداعى كارىز- تازارتۋ جۇيەسى 100 پايىز توزعان. نىساندى جاڭارتۋ مەملەكەتتىك- جەكەمەنشىك ارىپتەستىك نەگىزىندە جۇزەگە اسادى. بۇل تۋرالى شاھار باسشىسى اسحات بەردىحانوۆ تۇرعىندارمەن كەزدەسۋ بارىسىندا ءمالىم ەتتى.
كەزدەسۋ كەزىندە قالا تۇرعىنى اكىمگە كەشكى ۋاقىتتا 4-شاعىناۋدانىندا شىعاتىن ساسىق يىسكە شاعىمداندى.
- قالا ماڭىنداعى كارىز- تازارتۋ جۇيەسى %100 توزعان. نىساندى جاڭارتۋ مەملەكەتتىك- جەكەمەنشىك ارىپتەستىك نەگىزىندە جۇزەگە اسادى. قاجەتتى قۇجاتتار راسىمدەلىپ جاتىر. جوبا بويىنشا نىساندى 18 شاقىرىمعا قازاقستان اۋىلىنا قاراي جىلجىتۋ كوزدەلىپ وتىر. جوبا قۇنى 38 ميلليارد تەڭگە، - دەدى اسحات بەردىحانوۆ.
سونىمەن قاتار ول نىساننىڭ قۇرىلىسى 2 جىلدا اياقتالاتىنىن تىلگە تيەك ەتتى.
- الداعى ۋاقىتتا ءماسليحات وتىرىسى، جاۋاپتى سالالىق مەكەمەلەردەن كەلىسىم الۋ سەكىلدى جوسپارلى ءىس-شارالار وتەدى. قازىرگى جاعداي وسى، تۇسىنىستىكپەن قاراۋ قاجەت، - دەدى اكىم.
بۇدان بولەك، جيىندا گاز تارتۋ، قوقىس كونتەينەرلەرىن ورناتۋ، اۆتوتۇراق، اۋلالاردى كوگالداندىرۋ بويىنشا ماسەلەلەر كوتەرىلدى.
اۆتور
الما مۇقانوۆا
