قولما-قول اقشامەن ەسەپ ايىرىسۋدان تولىقتاي باس تارتۋ كەرەك - ساراپشى

استانا. KAZINFORM - ەكونوميست، تاۋەلسىز ساراپشى ەرلان كاريموۆ Kazinform اگەنتتىگىنىڭ پودكاسىندا ۇلتتىق قوردى ساقتاۋ مەن بيۋجەت تاپشىلىعى ماسەلەسىن شەشۋگە قاتىستى پىكىر ايتتى.

- ۇلتتىق قوردى بولاشاققا، ۇرپاققا قالدىرۋىمىز كەرەك. ويتكەنى، زامان قيىنداپ بارادى. اسىرەسە، كليماتتىڭ وزگەرۋىنە نازار اۋدارعان ءجون. حالىقارالىق ۇيىمداردىڭ زەرتتەۋىنە قاراساق، قازاقستاندا سۋ تاپشىلىعى ماسەلەسى وزەكتى بولادى. سەبەبى كورشى ەلدەردەن وزەن سۋىن الىپ وتىرمىز. بۇل باعىتتا بىزگە قوماقتى ينۆەستيتسيا كەرەك، ياعني جەراستى سۋىن جانە باسقا دا تەحنولوگيالار ارقىلى سۋ تارتۋ جوبالارىن ىسكە اسىرۋعا قوماقتى قارجى سالۋ قاجەت، - دەدى ە. كاريموۆ.

ونىڭ پايىمىنشا، بيۋجەت تاپشىلىعىن بولدىرماۋ جانە ونى باسقارۋعا قاتىستى نەگىزگى ماسەلەلەردى شەشۋ كەرەك.

- بىرىنشىدەن، «كولەڭكەلى» ەكونوميكامەن كۇرەسكە ءمان بەرگەن ءجون. رەسمي ستاتيستيكاعا سۇيەنسەك، قازاقستاندا «كولەڭكەلى» ەكونوميكانىڭ دەڭگەيى 18 پايىز شاماسىندا، ياعني ەكونوميكانىڭ بەستەن ءبىرى. ونىمەن كۇرەسۋ ءۇشىن قازاقستان تولىقتاي قولما-قول اقشادان باس تارتۋى كەرەك دەپ سانايمىن. قازىردىڭ وزىندە بىزدە ەلەكتروندى تارتىپتە ەسەپ ايىرىسۋ جاپپاي تاراعان... ەگەر ءبىز قولما-قول اقشامەن ەسەپ ايىرىسۋدان تولىقتاي باس تارتساق، جەمقورلىقپەن جانە «كولەڭكەلى» ەكونوميكاعا توسقاۋىل قويۋدا ناتيجەلى بولادى، - دەدى ساراپشى.

ەسكە سالساق، بيىل ناۋرىز ايىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين پاتەر ساتىپ الۋ كەزىندە قولما-قول اقشاسىز ەسەپ ايىرىسۋ ۇسىنىسىنا پىكىر ايتتى.