قولداۋشىلارى باردا قازاق ونەرى ولمەيدى - ەربولات شالدىبەكوۆ

استانا. KAZINFORM - بىرنەشە كۇن بۇرىن مەملەكەت باسشىسى قاسىم-جومارت توقايەۆ مادەنيەت سالاسىنداعى ءبىر توپ ازاماتتى مەملەكەتتىك ناگرادامەن ماراپاتتاعان ەدى.

قۇرمەتتى اتاققا يە بولعانداردىڭ ءبىرى ەربولات شالدىبەكوۆ «بۇگىن LIVE» ستۋدياسىنا قوناق بولىپ، قازاق ونەرىنىڭ قازىرگى جاي-كۇيىن باياندادى.

- قاي سالادا ەڭبەك ەتسە دە، ەڭبەگى باعالانىپ، پرەزيدەنتىمىزدىڭ قولىنان ارنايى ماراپات الۋ قاي پەندەگە بولسا دا، ۇلكەن باقىت دەپ بىلەمىن. ەڭ اۋەلى ونەردى باعالاعان، ونەردى قۇرمەتتەگەن ەل باسقارعان اعا بۋىن وكىلدەرىنە، مادەنيەت مينيسترلىگىنە، روزا باعلانوۆا اتىنداعى «قازاق كونسەرت» مەملەكەتتىك اكادەميالىق كونسەرتتىك ۇيىمىنا ريزاشىلىعىمدى بىلدىرەمىن. سەبەبى ونەر مەن ءومىردىڭ اراسىنداعى ءبىزدىڭ ورىنداۋشىلىعىمىزدى حالىقپەن قاۋىشتىرىپ وتىراتىن - وسىنداي كونسەرتتىك ۇجىمدار. «روزا باعلانوۆا اتىنداعى قازاق كونسەرت» مەملەكەتتىك اكادەميالىق كونسەرتتىك ۇيىمى - كوپتەگەن ورىنداۋشىنى ەلگە تانىتىپ، حالىق اراسىندا وسىنداي ۇلكەن مارتەبەگە جەتكىزگەن قارا شاڭىراق، - دەيدى قازاقستاننىڭ ەڭبەك سىڭىرگەن قايراتكەرى.

«حالىق قازىناسى» مەملەكەتتىك ۇلتتىق ونەر ورتالىعىنىڭ سوليس-ءارتىسى پرەزيدەنت قولىنان ماراپات العان كەزدەگى اسەرىن ءبولىستى.

- مەملەكەت باسشىسىنىڭ قولىنان ارنايى ماراپات العان كەزدە ۇلكەن تولقۋ ۇستىندە بولدىم. جاسىراتىنى جوق، كىشكەنە كوڭىلىم دە بوسادى. بۇل - ءبىز ءۇشىن ۇلكەن قۇرمەت. مەملەكەت تاراپىنان قۇرمەتكە يە بولۋ، پرەزيدەنت قولىنان «قازاقستان رەسپۋبليكاسىنىڭ ەڭبەك سىڭىرگەن قايراتكەرى» دەگەن اتاق الۋ - كىمنىڭ دە بولسا كۇتىپ، ارمانداپ، ءۇمىت ەتىپ جۇرگەن ارمانى، - دەيدى ونەر يەسى.

قايراتكەر قازاق ونەرى قولداۋشىلاردىڭ كوپتىگىنىڭ ارقاسىندا دامىپ كەلە جاتقانىن ايتادى.

- پرەزيدەنتتىڭ قولىنان قازىرگى تاڭداعى ءان ونەرىنىڭ ارداگەرى، پروفەسسور، حالىق ءارتىسى قايرات بايبوسىنوۆ «ەڭبەك ەرىن» الدى. «وتان» وردەنىمەن ماراپاتتالدى. ول، ارينە، مەملەكەت باسشىسىنىڭ ونەرگە بەرگەن باعاسى، ونەردى، مادەنيەتتى قۇرمەتتەگەنى دەپ بىلەمىز. سوندىقتان ول تۇرعىدان دا ريزاشىلىعىمىزدى ايتامىز. سول قايرات اعالارىمىزعا شاكىرت بولىپ، سوڭىنان ىلەسىپ، قايرات اعامىزبەن بىرگە ماراپات الۋ - مەن ءۇشىن ۇلكەن باقىت. سوندىقتان ەلىمىز قولداپ تۇرعاندا ءبىزدىڭ ونەر ولمەيتىنى بەلگىلى، تاسى ورگە ورلەيتىنى بەلگىلى. قاي ونەر ورتالىعى بولسا دا، ءوزىنىڭ العا قويعان جىلدىق جوسپارى بار. سول بويىنشا ءار سالانىڭ ونەرى جان-جاقتى دامىپ كەلە جاتىر. ونىمەن قويماي، ءبىزدىڭ ۇلتتىق ونەرىمىزگە كوپ جەرلەردە كوڭىل ءبولىنىپ، ناتيجەسىندە ساحناگەر ورىنداۋشىلارىمىز ءار وڭىردە حالىقپەن قاۋىشىپ جاتىر، - دەيدى ول.

ستۋديا قوناعى ونەرىن جان-جاقتى دامىتامىن دەگەن ادامعا قازىرگى زاماندا ەش كەدەرگى جوق دەگەن پىكىر ءبىلدىردى.

- جەكە باسىمدا ۇلتتىق ونەردى دارىپتەۋدە «اتتەگەن-اي» دەگەن جاعدايعا جولىقپادىم. ءبىز كەيدە مەملەكەت تاراپىنان قولداۋ بولسا، انانى جاساسا، مىنانى جاساسا دەيمىز. ءبىراق بۇگىنگى تاڭدا الەۋمەتتىك جەلى دەگەن دۇنيە بار. سول ارقىلى ءوزىڭىزدى حالىققا دارىپتەۋگە كوپ مۇمكىندىك جاسالعان. ارينە، ورىندى، ءوز شەڭبەرىمەن عانا. سوندىقتان قازىرگى دامىعان زاماندا قاي ونەر ادامى بولسا دا، قولىنان كەلگەنشە ونەرگە اتسالىسىپ، ەل ىشىندە ونەردىڭ جان-جاقتى دامۋىنا مۇمكىندىگى جەتكىلىكتى. قازىرگى ونەر ادامدارىندا ەش وكىنىش جوق دەپ ويلايمىن، - دەيدى ەربولات شالدىبەكوۆ.

اۆتور

ارۋجان ماحمۋت