قول قويىلعان تاريحي قۇجات قازاقستان مەن قىرعىزستاننىڭ ءوزارا بايلانىسىن دامىتادى - توقايەۆ
استانا. KAZINFORM - قازاقستان مەن قىرعىزستاننىڭ تاۋار اينالىمى 2 ميلليارد دوللارعا جەتەدى. بۇل تۋرالى بۇگىن اقوردادا قىرعىزستان پرەزيدەنتى سادىر جاپاروۆپەن كەلىسسوزدەن كەيىنگى بىرلەسكەن مالىمدە كەزىندە قازاقستان پرەزيدەنتى قاسىم-جومارت توقايەۆ ايتتى.
مەملەكەت باسشىسى قىرعىزستان پرەزيدەنتىنىڭ قازاقستانعا ساپارا ەكى ەل ءۇشىن ماڭىزى زور ەكەنىن اتاپ ءوتتى.
«مۇنى كوپتەن كۇتكەن ءىس- شارا دەپ ايتۋعا بولادى. قىرعىزستان ءبىز ءۇشىن وداقتاس مەملەكەت، سونداي-اق تاتۋ كورشى، باۋىرلاس ەل ءارى سەنىمدى سەرىكتەس. حالىقتارىمىزدىڭ دوستىعى ورتاق تاريحقا جانە رۋحاني قۇندىلىقتارعا نەنگىزدەلگەن. ءبىز ءاردايىم ءبىر-بىرىمىزگە تىلەكشى بولىپ، جەتىستىكتەرىمىزگە قۋانىپ جۇرەمىز. ەكى ەلدىڭ مىزعىماس قارىم-قاتىناسى ستراتەگيالىق سەرىكتەستىك رۋحىندا دامىپ جاتىر. ءبىز قازىر سادىر نۋرگوجويەۆيچ ەكەۋىمىز تاريحي كەلىمسىمگە قول قويدىق. بۇل - قازاقستان مەن قىرعىزستان اراسىنداعى وداقتاستىق قاتىناستاردى نىعايتۋ جانە كەڭەيتۋ تۋرالى شارت. وسى قۇجات ءوزارا بايلانىستاردى ودان ءارى دامىتۋعا جول اشادى، ەكى ەلدىڭ مۇددەسىنە تولىق ساي كەلەدى. ياعني، عاسىرلار بويى قالىپتاسقان باۋىرلاستىق بايلانىستى ساقتاۋعا مۇمكىندىك بەرەدى» - دەدى قاسىم- جومارت توقايەۆ.
مەملەكەت باسشىسى ەكى ەلدىڭ ءداستۇرىن، دوستىق جانە تاتۋ كورشىلىك قاتىناستارىن نىعايتۋعا قىرعىزستان باسشىسى زور ۇلەس قوسقانىن اتاپ ءوتتى.
«سول ءۇشىن قادىرلى ارىپتەسىمە العىس ايتامىن. بۇگىن ەكى ەل اراسىنداعى جوعارى مەملەكەتارالىق كەڭەستىڭ التىنشى وتىرىسى ءوتتى. جيىندا ەكىجاقتى ىنتىماقتاستىقتىڭ وزەكتى ماسەلەلەرى جونىندە جان-جاقتى پىكىر الماستىق، ناقتى ءارى ماڭىزدى كەلىسىمدەرگە قول جەتكىزدىك. باۋىرلاس ەكى ەل اراسىندا شەشىمىن تاپپاعان تۇيتكىلدى ماسەلە بولماۋى كەرەك دەپ ورتاق بايلامعا كەلدىك. سونىمەن بىرگە، ساۋدا- ەكونوميكالىق بايلانىستاردى نىعايتۋعا باسا ءمان بەردىك. قازاقستان - قىرعىزستاننىڭ ساۋدا جانە ينۆەستيتسيا سالىسىنداعى نەگىزگى سەرىكتەسىنىڭ ءبىرى. بىلتىر ءوزارا تاۋار اينالىمى 1,5 ميلليارد دوللارعا جەتتى. كەلىسسوزدەر بارىسىندا بۇل كورسەتكىشتى 2 ميلليارد دوللارعا جەتكىزۋگە مۇددەلى ەكەنىمىزدى راستادىق. جالپى، ءوزارا ساۋدا اينالىمىن قىسقا مەرزىمدە ەداۋىر ارتتىرۋعا مۇمكىندىك بار. ءبىز ونەركاسىپ ونىمدەرىن جانە باسقا دا تاۋارلاردى ەكسپورتتاۋعا دايىنبىز. قازاقستان قىرعىزستانعا قازىردىڭ وزىندە 195 تاۋار ءتۇرى بويىنشا ەكسپورت كولەمىن ۇلعايتا الادى. ونىڭ جالپى قۇنى - 260 ميلليون دوللار. قىرعىز ەلىنىڭ دە قازاقستانعا شىعاراتىن ونىمدەرى از ەمەس. وسى ورايدا قولدا بار مۇمكىندىكتى بارىنشا پايدالانامىز دەپ ۋاعدالاستىق. اسىرەسە، ۇكىمەتارالىق كەڭەس پەن ايماقارالىق فورۋمنىڭ جۇمىسىن جانداندىرعان ءجون»، - دەدى قازاقستان پرەزيدەنتى.
اتاپ ايتقاندا قازاقستان پرەزيدەنتى قاسىم- جومارت توقايەۆ پەن قىرعىزستان پرەزيدەنتى سادىر جاپاروۆ «قازاقستان رەسپۋبليكاسى مەن قىرعىز رەسپۋبليكاسى اراسىنداعى وداقتاستىق قاتىناستاردى تەرەڭدەتۋ جانە كەڭەيتۋ تۋرالى شارتقا» جانە «قازاقستان رەسپۋبليكاسىنىڭ جانە قىرعىز رەسپۋبليكاسىنىڭ جوعارى مەملەكەتارالىق كەڭەسىنىڭ التىنشى شەشىمىنە» قول قويدى.
