قوجا احمەت ياساۋي كەسەنەسىنىڭ اينالاسىندا بيىك عيمارات سالۋعا تىيىم سالىندى - زاڭ

استانا. KAZINFORM - بۇگىن سەناتتىڭ جالپى وتىرىسىندا «تۇركىستان قالاسىنىڭ ەرەكشە مارتەبەسى تۋرالى» زاڭى مەن ىلەسپە قۇجات ماقۇلداندى.

زاڭنىڭ ماقساتى - قازاقستان رەسپۋبليكاسىنىڭ رۋحاني-مادەني جانە تاريحي ورتالىعى رەتىندە تۇركىستان قالاسىنىڭ ەرەكشە مارتەبەسىن ايقىندايتىن قۇقىقتىق نەگىزدەردى رەتتەۋ.

سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مالىمەتىنە قاراعاندا، قۇجاتتا تۇركىستان قالاسىنىڭ تاريح جانە مادەنيەت ەسكەرتكىشتەرى مەن تاريحي-مادەني مۇراسى وبەكتىلەرىن، ونىڭ ىشىندە قوجا احمەت ياساۋي كەسەنەسىنىڭ قورعاۋ ايماقتارىندا ورنالاسقان وبەكتىلەردى باسقارۋدىڭ، ساقتاۋدىڭ جانە ولاردىڭ بۇتىندىگىن ساقتاپ تۇرۋدىڭ ءتيىمدى جۇيەسىن قۇرۋ ەسكەرىلگەن. سونىمەن قاتار، قوجا احمەت ياساۋي كەسەنەسى مەن ونىڭ قورعاۋ ايماقتارىنىڭ اۋماعىنداعى تاريح جانە مادەنيەت ەسكەرتكىشتەرىنە ارحەولوگيالىق جانە عىلىمي-رەستاۆراتسيالىق جۇمىستاردى جوسپارلاۋ جانە باسقارۋ قاراستىرىلعان. زاڭدا تاريحي-مادەني مۇرانى ساقتاۋ، قايتا جاڭعىرتۋ جانە ۇلتتىق قولونەردى دامىتۋعا، تۇركىستان قالاسىنىڭ تاريحي-مادەني مۇراسى وبەكتىلەرىن قورعاۋ ءارى پايدالانۋ جونىندە قابىلدانعان شەشىمدەردى عىلىمي قامتاماسىز ەتۋگە ەكپىن قويىلعان.

قۇجات اياسىندا تۇركىستان قالاسىنىڭ جەرگىلىكتى وكىلدى ورگانىنىڭ، ونىڭ ىشىندە ديزاين-كودتى، قالا قۇرىلىسى رەگلامەنتىن، وڭىرلىك نىشاندى پايدالانۋ ءتارتىبىن بەكىتۋ جونىندەگى قۇزىرەتى بەلگىلەنەدى.

- بۇدان باسقا، زاڭدا تاريح جانە مادەنيەت ەسكەرتكىشتەرىن قورعاۋدى قامتاماسىز ەتۋ جونىندەگى نورمالار، سونداي-اق تۇركىستان قالاسىنىڭ ارحەولوگيا جانە ينفراقۇرىلىم ەسكەرتكىشتەرىنىڭ رەزەرۆاتىنا قاتىستى نورمالار ايقىندالادى. اتاپ ايتقاندا، قۇرىلىس سالۋدى رەتتەۋ ايماعىندا قۇرىلىس جۇمىستارىن جۇرگىزۋ كەزىندە ساۋلەت كەلبەتى بويىنشا ولاردىڭ تاريح جانە مادەنيەت ەسكەرتكىشتەرىنەن اسىپ كەتۋىنە جول بەرىلمەيدى دەپ كوزدەلەدى. قوجا احمەت ياساۋي كەسەنەسىنىڭ بىرەگەيلىگىن ساقتاۋ جانە ونىڭ اينالاسىنداعى اۋماققا قۇرىلىس سالۋعا جول بەرمەۋ ماقساتىندا كەسەنەنىڭ قورعاۋ ايماعىنىڭ شەكاراسىنان ءبىر ءجۇز مەتر قاشىقتىقتا بيىكتىگى جەتى مەتردەن اساتىن جانە اۋقىمى، ءتۇسى جانە قۇرىلىس ماتەريالدارى بويىنشا تاريح جانە مادەنيەت ەسكەرتكىشتەرىمەن ۇيلەسپەيتىن وبەكتىلەر سالۋعا جول بەرىلمەيدى، - دەلىنگەن سەنات كوميتەتىنىڭ اقپاراتىندا.

ىلەسپە زاڭدا جەر كودەكسىنە جانە 4 زاڭعا وزگەرىستەر مەن تولىقتىرۋلار ەنگىزۋ ەسكەرىلگەن. ءتۋريزمدى دامىتۋ ءۇشىن قولايلى جاعدايلار جاساۋ ماقساتىندا مۇگەدەكتىگى بار ادامدار مەن حالىقتىڭ ءجۇرىپ- تۇرۋى شەكتەۋلى توپتارىن (ينكليۋزيۆتى تۋريزم) قوسا العاندا، بارلىق تۋريستەر ءۇشىن تۋريزم ينفراقۇرىلىمىنا تەڭ قولجەتىمدىلىكتى قامتاماسىز ەتۋدى كوزدەيتىن تۇزەتۋلەر ەنگىزىلەدى.

ايتا كەتەيىك، پارلامەنت ءماجىلىسى اتالعان زاڭداردى بىلتىر جەلتوقسان ايىندا قابىلداعان.

بۇدان بۇرىن حابارلانعانداي، تۇركىستان وبلىسى اكىمىنىڭ ورىنباسارى بەيسەنباي تاجىبايەۆ تۇركىستان قالاسىنا زاڭمەن ەرەكشە مارتەبە بەرىلسە، شاھار اۋماعىندا جەر ءۇي سالۋدىڭ تالاپتارى قالاي وزگەرەتىنىن ايتتى.

اۆتور

رۋسلان عابباسوۆ