قوعامدىق ورىنداردا كاليان تارتۋعا باقىلاۋدى كۇشەيتۋ كەرەك - داۋلەت تۇرلىحانوۆ

Дәулет Тұрлыханов
Фото: Мәжілістің баспасөз қызметі

  استانا. KAZINFORM - بۇگىن ءماجىلىستىڭ جالپى وتىرىسىندا داۋلەت تۇرلىحانوۆ كاليان قويىپ جۇرگەن كوڭىل كوتەرەتىن ورىندار كوبەيىپ كەتكەنىن ايتتى.

«قازىر پايداسىنان زيانى كوپ ەلەكتروندى تەمەكى، سينتەتيكالىق ەسىرتكى، ەنەرگەتيكالىق سۋسىن سەكىلدى زياندى زاتتار كۇننەن كۇنگە كوبەيىپ بارادى. سولاردىڭ ءبىرى - كاليان. بۇل زاتتى ارنايى كوڭىل كوتەرەتىن، تاماقتاناتىن ورىنداردا قويىپ، جاستار كولىككە سالىپ الىپ جۇرەتىن جاعدايعا جەتتى. كالياندى قوعامدىق ورىنداردا قويۋعا زاڭ جۇزىندە تىيىم بار. الايدا، بۇل نورما ورىندالماي وتىر. ويتكەنى، 3 جىل بويى كاسىپكەرلىك سۋبەكتىلەرىن تەكسەرۋگە موراتوري بولدى. تەكسەرىستى توقتاتۋ دەگەن-زاڭدى بۇزۋعا نەگىز ەمەس. ال كالياننىڭ قۇرامىندا نە بار ەكەنى، نە قوسىپ جاتقانى مۇلدەم بەلگىسىز. وعان تەمەكىدەن بولەك، ءتۇرلى اروماتيزاتورلار، ماسايتاتىن زاتتار قوسىلاتىنى جاسىرىن ەمەس. وعان گاشيش تە، الكوگول دە قوسۋى ابدەن مۇمكىن. ونى قاداعالاپ جاتقان كىم بار؟»، - دەدى د. تۇرلىحانوۆ ۇكىمەت باسشىسى ورىنباسارى تامارا دۇيسەنوۆانىڭ اتىنا جولداعان ساۋالىندا.

ونىڭ پايىمىنشا، ىشكى ىستەر مينيسترلىگى قوعامدىق ورىنداردا كاليان بويىنشا باقىلاۋدى كۇشەيتۋى ءتيىس.

«دەنساۋلىق ساقتاۋ مينيسترلىگى ەلىمىزدەگى كالياننىڭ قۇرامىنا، تۇتىنىنە ساراپتاما جاساپ، ونىڭ ادام دەنساۋلىعىنا تيگىزەتىن زيانى بويىنشا قورىتىندى ازىرلەۋى ءتيىس. سونىمەن قاتار، ۇكىمەت ەلىمىزدە كاليانعا مۇلدەم تىيىم سالۋدى جانە تالاپتاردى بۇزعانداردى جازالاۋدى ەسكەرەتىن زاڭ جوباسىن ازىرلەۋى قاجەت»، - دەدى دەپۋتات.

بۇدان بۇرىن حابارلانعانداي، ءماجىلىس ۆەيپتەرگە تىيىم سالاتىن زاڭدى قابىلدادى.

سوڭعى جاڭالىقتار