قوعامدىق كولىكتى ماس كۇيدە باسقارعان 10 جۇرگىزۋشى انىقتالدى
استانا. KAZINFORM - ەلىمىزدە بەس كۇندە كۇندە پوليتسەيلەر جول قوزعالىسىن قاداعالاۋ كەزىندە قوعامدىق كولىك جۇرگىزۋشىلەرى جاساعان 5470 جول قوزعالىسى ەرەجەسىن بۇزۋشىلىقتى انىقتادى. ونىڭ ىشىندە الكوگولدىك ماساڭ كۇيدە كولىكتى باسقارۋدىڭ 10 فاكتىسى تىركەلدى - دەپ حابارلايدى Polisia.kz.
ءى ءى م-دە «اۆتوبۋس» رەسپۋبليكالىق وپەراتسياسىنىڭ قورىتىندىسى شىعارىلدى.
مىسالى، پەتروپاۆلدا پاترۋلدىك پوليتسيا باتالونىنىڭ قىزمەتكەرلەرى Volkswagen Transporter كولىگىن توقتاتتى. تەكسەرۋ كەزىندە پوليتسەيلەر ميكرواۆتوبۋس جۇرگىزۋشىسىنىڭ ماس كۇيىندە ەكەنىن انىقتادى. مۇنى مەديتسينالىق كۋالاندىرۋ اكتىسى راستادى. كولىك ارنايى اۆتوتۇراققا جىبەرىلدى.
اقمولا وبلىسىندا دا وسىنداي جاعداي بولدى. وپەراتسيا بارىسىندا پوليتسيا قىزمەتكەرلەرى جاقسى - ەسىل - بۋزۋلۋك اۆتوجولدارىنا قوستاناي تۇرعىنىنىڭ باسقارۋىمەن Toyota Alphard اۆتوكولىگىن توقتاتتى.
ءىس جۇرگىزۋ بارىسىندا پوليتسەيلەر جۇرگىزۋشىنىڭ جولاۋشىلاردى جەكە تاسىمالداۋمەن زاڭسىز اينالىسقانىن انىقتادى. سونىمەن قاتار ەر ادام ماريحۋانا ەسىرتكىسىن قولدانىپ، سالوندا بولعان بەس جولاۋشىنىڭ ومىرىنە قاۋىپ ءتوندىردى. ءتارتىپ بۇزۋشىلارعا قاتىستى پوليتسيا قىزمەتكەرلەرى ءتيىستى اكىمشىلىك حاتتامالار جاسادى.
بۇدان بولەك، قارسى جولاققا شىعۋدىڭ 7 دەرەگى، ەڭبەك جانە دەمالىس رەجيمىن بۇزۋعا قاتىستى - 29، مىندەتتى ساقتاندىرۋ تۋرالى زاڭنامانى بۇزۋدىڭ - 351، رەيس الدىنداعى تەكسەرۋدەن وتپەۋدىڭ - 123، تەحنيكالىق بايقاۋدان وتپەۋدىڭ - 799، جىلدامدىقتى ارتتىرۋدىڭ - 174، تەلەفوندى پايدالانۋدىڭ - 1357، 1445 - مانەۆر جاساۋ ەرەجەلەرىن بۇزۋ، 174 - لاستاۋشى زاتتار شىعارىندىلارىنىڭ نورمالارىنان اسىپ كەتۋ، 498 - جولاۋشىلاردى، باگاجدى جانە جۇكتەردى تاسىمالداۋ قاعيدالارىن بۇزۋ، جولاۋشىلاردى زاڭسىز تاسىمالداۋدىڭ 112 فاكتىسى تىركەلدى، ونىڭ ىشىندە 100 ى تاكسي جۇرگىزۋشىلەرى بولعان.
سونداي-اق وپەراتسيا كەزىندە ءتارتىپ ساقشىلارى جول قاۋىپسىزدىگى تالاپتارىنا ساي كەلمەيتىن 23 رۇقسات ەتىلمەگەن اۆتوتۇراقتى جاۋىپ، 4 مىڭعا جۋىق قوعامدىق كولىكتى تەكسەرىپ، 371 زاڭسىز تۇرلەندىرىلگەن اۆتوبۋستى انىقتادى. اۆتوبۋس پاركتەرىنىڭ 112 لاۋازىمدى تۇلعاسى اكىمشىلىك جاۋاپكەرشىلىككە تارتىلدى. ايتا كەتەيىك، «اۆتوبۋس» پروفيلاكتيكالىق ءىس-شاراسىن وتكىزۋگە 9 مىڭنان استام پوليتسيا قىزمەتكەرى، سونداي-اق جەرگىلىكتى اتقارۋشى ورگانداردىڭ وكىلدەرى مەن جۇرتشىلىق جۇمىلدىرىلدى.
