قۇتلىق ەلتەرىس قاعان كەشەنىنەن تابىلعان بىتىكتاستىڭ ەكىنشى بولىگى تانىستىرىلدى

استانا. KAZINFORM - ۇلانباتىر قالاسىندا تۇركى اكادەمياسى جانە موڭعوليا عىلىم اكادەمياسى ارحەولوگيا ينستيتۋتى «نومعون-2» عۇرىپتىق كەشەنىنەن تابىلعان بىتىكتاستىڭ تومەنگى بولىگىنىڭ تانىستىرىلىمىن جاسادى.

ارحەولوگتار قۇتلىق ەلتەرىس قاعانعا تيەسىلى دەپ بولجاپ وتىرعان بىتىكتاستىڭ جوعارعى بولىگى الدىڭعى جىلى وسى كەشەندەگى قازبا جۇمىستارى كەزىندە تابىلعان بولاتىن.

«ونىڭ ەكىنشى بولىگىن ىزدەۋگە قاتىسقان عالىمداردىڭ مالىمدەۋىنشە، بىتىكتاستىڭ جاڭادان تابىلعان تومەنگى بولىگىندە كونە قىتاي تىلىندە ءماتىن بارى انىقتالعان. ەسكەرتكىشتىڭ ءبىرشاما بۇلىنگەنى بايقالادى. عالىمدار بىتىكتاستاعى جازۋلاردى وقىپ، زەرتتەۋ جۇمىستارىن جۇرگىزۋدە»، - دەپ حابارلادى تۇركى اكادەمياسىنىڭ باسپا ءسوز قىزمەتى.

وسى القاپتا تۇركى اكادەمياسى جۇرگىزگەن ارحەولوگيالىق قازبا جۇمىستارى بارىسىندا 2019، 2022، 2023 -جىلدارى مالداس قۇرىپ وتىرعان قاعانننىڭ ءبادىز ءتاسمۇسىنى مەن ءمۇسىننىڭ باس بولىگى تابىلعان بولاتىن. سونىمەن قاتار، باۋىرىندا ەكى الانى بەينەلەنگەن ارىستان تاس ءمۇسىنى جانە 5 ءبادىز تاس ءمۇسىننىڭ سىنىق بولشەكتەرى انىقتالعان.

تۇركى اكادەمياسى مەن موڭعوليا عىلىم اكادەمياسى ارحەولوگيا ينستيتۋتى بولاشاقتا نومعون جازىعىندا ارحەولوگيالىق قازبا جۇمىستارىن جالعاستىرۋدى جوسپارلاپ وتىر.

ايتا كەتەيىك، شىڭعىسحان مۇراجايىندا وتكەن عىلىمي ءىس-شاراعا تۇركى اكادەمياسىنىڭ پرەزيدەنتى شاھين مۇستافايەۆ، موڭعوليا عىلىم اكادەمياسىنىڭ پرەزيدەنتى دۇگەريين رەگدەل، قازاقستاننىڭ موڭعولياداعى ەلشىسى عابيت قويشىبايەۆ، تۇركيانىڭ موڭعولياداعى ەلشىلىگىنىڭ ۋاقىتشا سەنىمدى وكىلى الي سايد سەردەنگەچتي، ديپلوماتيالىق ميسسيا وكىلدەرى، ينستيتۋتتاردىڭ باسشىلارى جانە وزگە دە تانىمال عالىمدار قاتىستى.

بۇعان دەيىن KAZINFORM اگەنتتىگى قۇتلىق ەلتەرىس قاعان كەشەنى تۋرالى تىڭ مالىمەتتەردى جاريالاعان ەدى.

اۆتور
ايجان سەرىكجان قىزى